சிவகங்கை மாவட்ட எழுத்தாளர்களுக்கு விஞ்ஞானி ரகுபதி விருது

 தமிழ்நாடு அறிவியல் இயக்கம் காரைக்குடியில் இரண்டாம் ஆண்டாகப் புத்தகத் திருவிழாவைச் சிறப்புற நடத்தியது. அதில் சிக்ரியோடு ( செண்டரல் எலக்ட்ரோ கெமிக்கல் ரிசர்ச் இன்ஸ்டிடியூட் ) இணைந்து  சிவகங்கை மாவட்ட எழுத்தாளர்களுக்கு விஞ்ஞானி  ரகுபதி விருது அளிக்கப்பட்டது. எனக்கும் விருது வழங்கிக் கௌரவப்படுத்தினார்கள். இது பற்றி முன்பே எழுதி இருக்கிறேன். மொத்தப் புகைப்படங்களையும் இங்கே பகிர்ந்துள்ளேன். 

ஜெகஜ்ஜாலப் புரட்டனும் இரிசி மட்டையும்.

 161. 1731. கமறுதல், காந்துதல், காய்வான்/ள்.. - தாளிக்கும் கார வாசனை பட்டுத்தொண்டையைச் செறுமுதல் கமறுதல் எனப்படும். தீயைக் கொறைச்சு வையி. கமறுது என்பார்கள். மிளகாய்த்துவையல் போன்றவற்றை அம்மியில் அரைத்தால் கை சுடுவதுபோல் காந்தல் = எரிச்சல் எடுக்கும். காய்ச்சல் அடிச்சாலும் தொட்டுப் பார்த்தால் உடம்பு சுடுவதைக் காந்துது என்பார்கள். சட்டியில் அடிப்பிடித்ததையும் காந்தல் என்பார்கள். அடுத்தவர் வாழப் பொறுக்காதவரை அவன்/ள் அடுத்தவுகளைப் பார்த்துக் காய்வான்/ள்( கடுப்பாவான்/ள், எரிச்சலாவான்/ள் , கோபப்படுவான்/ள்)  என்பார்கள். 

1732*நறுங்கிப் போய் - வயசுக்கேத்த வளர்ச்சி இல்லாமல் இருப்பவரை அது நறுங்கிப் போய்க் கிடக்கும் என்பார்கள். 

1733*பாய்ச்சுருட்டு - மெத்தைச் சுருட்டு பாய்ச்சுருட்டு . நான்கைந்து பாய்களை ஒன்றாக அடுக்கிச் சுருட்டிக்கட்டி வைப்பதுதான் பாய்ச்சுருட்டு. 

1734*சிலாகை - மரச்சாமான் பெயர்ந்து வந்தால் சிலாகை வந்திருச்சு என்பார்கள். முள்போல் குத்திவிடும் என்பதாலும் சாப்பாட்டில் விழுந்து விடலாம் என்பதாலும் அது பயன்பாட்டுக்கு ஆகாது என்று அர்த்தம். 

1735*வரட்டுவரட்டுன்னு - வரளித்தனமாக இருப்பது. வரட்டு என்று வெறிச்சோடி இருப்பது. இருப்பதை எல்லாம் சுரண்டி வரட்டி எடுப்பது. 

பிள்ளை எடுக்கிக் கொடுக்கும் துண்டும் சிட்டிச்சாமான்களும்.

 156. 1641. தடுக்கு. இவை சிகரெட் அட்டைப்பெட்டிகளினால் செய்யப்பட்டவை. கீழே இருப்பது ஓலைத் தடுக்கு. பட்டி தைப்பது இங்கே ஸ்பெஷல்.

1642. சாமி எழுந்தருளப் பண்ணுதல். கானாடு வள்ளிமயில் அவர்கள் வீட்டில் சஷ்டியப்த பூர்த்திக்காக சிவனையும் அம்பாளையும் எழுந்தருளப் பண்ணியிருந்தார்கள். ஓம் சிவோஹம். 

பேர் பெற்ற வீடு.

காரைக்குடி கானாடுகாத்தான் மற்ற செட்டிநாட்டு ஊர்களில் வீட்டுக்கெல்லாம் பெயர் உண்டு. இது பற்றி முன்பே குறிப்பிட்டு இருக்கிறேன். இது 1581.மல்லுப்பட்டியார் வீடு. பொதுவாக செட்டிநாட்டு ஊர்களில் வீடுகள் மேற்குப் பார்த்துத்தான் கட்டப்படுகின்றன. கிழக்கில் பின் வாசல் இருக்கும். 

கூம்பு ஆலாத்தியும் சதுராலாத்தியும்.

கூம்பு ஆலாத்தியும் சதுராலாத்தியும். 

1571. சுவாமிக்குக் காசு முடிந்து வைத்தல் -  திருமணம் போன்ற நல்ல நிகழ்வுகளின் போது ஊரில் இருக்கும் எல்லாச் சாமிக்கும் நிகழ்வு நல்லபடியாக நிறைவேற வேண்டுமென்று காசு முடிந்து வைப்பார்கள். இது அந்தக்காலத்தில் நாலணா, எட்டணா என்ற அளவில் இருந்தது. சோமண்ணன் என் அம்மாவிடம் இந்தப் பணத்தைப் பெற்று ( விட்டுப் போன சாமிகளையும் அவரே சொல்லுவார் – நெல்லிமரத்துப் பிள்ளையார் கோவில், கீழ ஊரணிப் பிள்ளையார் கோவில், முத்தாளம்மா, முத்துமாரி, அத்திமரத்துக்காளி என்று இன்னும் பல சாமிகள் உண்டு ) கோவில்களில் செலுத்தி விடுவார்.

1572. படிஅளத்தல் :- உக்கிராணத்துக்குப் பொருட்களைக் கொடுக்கும் முன் தலைமைச் சமையல்காரரிடம் அரிசி அளந்து கொடுப்பார்கள். வீட்டின் பெரியவர் தலைப்பாகை கட்டிச் சாமி வீட்டில் எதிரில் தடுக்குப் போட்டு அமர்ந்து இருப்பார். அவர் முன் அரிசி நிறைந்த பாத்திரமும் மரக்கால் அல்லது படியும் இருக்கும். தலைமைச் சமையற்காரர் வீட்டுப் பெரியவரிடம் ஒரு பெரிய அண்டாவில் அரிசி அளந்து போடச் சொல்லி வாங்கிக் கொள்வார். சாமியைக் கும்பிட்டு விட்டு வீட்டுப் பெரியவரும் ஒரு கைப்பிடி முதலில் போட்டுவிட்டு அதன்பின் மரக்காலிலோ படியிலோ அரிசி அளந்து அண்டாவில் போடுவார்.

தும்பு பிடித்தலும் மாப்பிள்ளைக்கு மிஞ்சி அணிவித்தலும்.

தும்பு பிடித்தலும் மாப்பிள்ளைக்கு மிஞ்சி அணிவித்தலும்.

1561. கோவில் மாலை வருதல் :- கோவிலில் பாக்கு வைத்து மணமக்கள் குறித்த விபரங்களைப் பதிவு செய்தபின் திருமணத்தன்று முதல்நாள் கோவில் மாலை வரும். இதை சங்கு ஊதி வாங்கி வைத்துக் கொண்டு வந்த அர்ச்சகருக்கு ( குலதெய்வக் கோவிலில் இருந்து கொண்டு வரும் வேளாருக்கும் ) சில்வர் வாளியில் பழம் தேங்காய் பிஸ்கட்  பணம் வைத்துக் கொடுப்பார்கள்.

1562. நிச்சயம் செய்தல் :- திருமணத்தன்று முதல்நாள் மாப்பிள்ளை வீட்டிலோ பெண் வீட்டிலோ கல்யாணத்தைப் பேசி முடித்து நிச்சயம் செய்து கொள்வார்கள். காலைப் பலகாரம் பேசி முடித்துக் கொள்ளும் வீட்டில் நடைபெறும். இதற்கு மாப்பிள்ளை வீட்டார் பதினொன்று பதினாறு என்ற வகையில் சீர்வரிசை எடுத்துச் செல்வார்கள். அண்டாவில் மஞ்சள் தடவிய தேங்காய் 31, வாழைப்பழச் சீப்பு ( மலைப்பழம் அல்லது செவ்வாழை ) 51 அல்லது 101, சாத்துக்குடி - 16, ஆரஞ்சு - 16, ஆப்பிள்- 16, திராட்சை - 2 கிலோ, மாதுளை - 16, எலுமிச்சை - 21, பேரீச்சம்பழம் - பெரிய பாக்கெட், கல்கண்டு - 1 கிலோ, வெளிநாட்டு பிஸ்கட் - 1 டின் , வேஃபர்ஸ் - 1 டின்,  வெளிநாட்டுச் சாக்லெட் - 1 டின், வெற்றிலை - 5 கவுளி, பாக்கு - 1 கிலோ, மல்லிகைப் பூ - 3 பந்து, இவை வைக்க சில்வர் அண்டா, பேஸின், வாளிகள் தூக்குச் சட்டிகள் எடுத்துச் சென்று பரப்புவார்கள். பெண் வீட்டில் இந்த முறையில் கொஞ்சம் திருப்பித் தருவார்கள்.   

1563. முகூர்த்தம் வைத்தல்/ கழுத்துருவுக்குப் பொன் தட்டுதல்/ கொடுத்தல் :- கழுத்துருவைப் பெண் வீட்டில் முன்பே செய்து வைத்திருப்பார்கள். அதனால் மாப்பிள்ளை வீட்டில் பொற்கொல்லரை அழைத்துச் சென்று புதிதாகப் பவுனைக் கொடுத்துத் தட்டித்தரச் சொல்லி அதைக் கழுத்துரு செய்யும்போது சேர்த்துக் கொள்ளச் சொல்வார்கள். அந்தக்காலத்தில் ஏழுநாள் திருமணம் என்பதால் பொன் கொடுத்துத் தட்டிச் சேர்த்துக் கொள்ளச் சொல்லும் பழக்கம் இருந்தது. இந்த நாளிலும் அது ஒரு நாள் திருமணமாகச் சுருங்கிய பின்னும் இந்த முறைகளைப் பின்பற்றுகிறோம்.

கெட்டிபண்ணிக் கொள்ளுதலும் கல்யாணம் சொல்லுதலும்.

1551.பெண்பார்த்தல் :- மாப்பிள்ளை பெண் இருவருக்கும் ( கோவில், வயது, கல்வி, அந்தஸ்து, தகுதி, அழகு , ஜாதகம் பார்த்து ஒத்துவந்தால் ) தோதான ஒரு இடத்தில் , கோவிலிலோ அல்லது உறவினர் வீட்டிலோ மாப்பிள்ளையும் பெண்ணையும் பார்த்துக்கொள்ள வைப்பார்கள்.


1552. திருமணம் பேசி முடித்துக் கொள்ளுதல்/கெட்டி பண்ணிக் கொள்ளுதல் - பெண்பார்த்து பெண்ணுக்கும் மாப்பிள்ளைக்கும் பிடித்தபின்பு இருவீட்டுப் பங்களாளிகளையும் கூட்டித் திருமணம் பேசி முடித்துக் கொள்வார்கள். இதை கெட்டி பண்ணிக் கொள்ளுதல் என்றும் சொல்வதுண்டு. ஜோசியரிடம் கேட்டு நாளை முடிவு செய்து அறிவிப்பதும் உண்டு.

மூன்று சகோதரிகளின் நூல் வெளியீட்டு விழா.

கார்த்திகேயன் பள்ளியில் சென்றவாரம் மூன்று சகோதரிகளின் நூல் வெளியீடு நடந்தது.

 என் முகநூல் பதிவு. 

காரைக்குடிச் சொல்வழக்கு. பொன்னுளியும் விராகனும்.

1321. இன்னம்புட்டு - இன்னும் கொஞ்சம். இன்னம் இம்புட்டு. இன்னம் இவ்வளவு. 

1322. கிண்டிக் கிழங்கெடுத்துப்புடுவாக - ஒருவர் ஒரு விஷயத்தைப் பற்றித் துருவித் துருவிக் கேள்வி கேட்டால் அதை கிண்டிக் கிழங்கெடுத்துப்புடுவாக என்று சொல்வது வழக்கம். கிழங்கை அகழ்ந்தெடுப்பதுபோல் விஷயத்தைத் (தோண்டி வெளியே எடுத்து விடுவார்கள் ) வாங்கி விடுவார்கள்.  

1323. பொறமாட்டாதவள் - பெண்கள் தான் ஆசைப்பட்ட ஒரு விஷயம் நடக்காவிட்டால் நான் என்ன பொறமாட்டாதவளா என்று ஆதங்கத்திலோ ஆத்திரத்திலோ கேட்பதுண்டு. அல்லது ஒரு விஷயத்துக்கு அல்லது தகுதிக்கு ஒருவர் லாயக்கில்லாவிட்டாலும் அவ பொறமாட்டாதவ என்று சொல்வதுண்டு. எதற்கும் அவசரப் படுபவர்களையும், பொறுக்காதவர்களையும் கூட சமயத்தில் பொறமாட்டாதவள் என்று குறிப்பிடுவதுண்டு. 

1324. அரிச்செடுத்துப்புடுவா - தான் விரும்பிய விஷயம் நடக்க வேண்டி தொணதொணத்தோ, தொடர்ந்து சொல்லியோ, அனத்தியோ அதை செயல்படுத்திக்கொள்பவர்களை அரிச்செடுத்துப்புடுவா என்று சொல்வதுண்டு. தான் நினைத்தது நடக்க வேண்டி ஆசிட் ஊற்றினால் அரித்தெடுப்பது போல் தொடர்ந்து கோபித்தோ கொந்தளித்தோ பேசுதல். 

காரைக்குடிச் சொல்வழக்கு :- மகமையும் புள்ளி வரியும்.

1301. மெத்த சந்தோஷம் - மிகுந்த மகிழ்ச்சி/ அளவற்ற சந்தோஷம். 

1302. பீம சாந்தி - 55 ஆவது பிறந்ததினம்.

1303. சாந்திக் கல்யாணம்/உக்ர ரத சாந்தி/சஷ்டியப்த பூர்த்தி  - 60 ஆம் கல்யாணம். ( 60 ஆவது பிறந்தநாள் கொண்டாட்டம் சாந்திக்கல்யாணம் என்று கொண்டாடப்படுகிறது ). கணபதி பூஜை, ஹோமம், ஆயுஷ் ஹோமம், நவக்ரஹ சாந்தி ஆகியன செய்து உற்றம் சுற்றம் அனைவரையும் அழைத்து ஹோமத்தில் வைக்கப்பட்ட கும்ப நீர் சொரிந்து அபிஷேகம் செய்து கொள்வார்கள். ( 59 ஆம் பிறந்த நாளிலும் திருக்கடையூரில் ஆயுஷ் ஹோமம் செய்து கொள்வார்கள் ) 

1304. பீமரத சாந்தி - 70 ஆவது பிறந்த தினம். 

1305. விஜய ரத சாந்தி - 75 ஆவது பிறந்த தினம்.  

1306. சதாபிஷேகம் - 80 ஆவது பிறந்த நாள் . ஒருவர் தன் வாழ்நாளில் ஆயிரம்பிறை கண்ட நாளைக் கொண்டாட சதாபிஷேகம் செய்து கொள்வார்கள். 

காரைக்குடிச் சொல்வழக்கு. கா(ல்)ப்பொறப்பும் தோமாலையும்

1281. சதப்பெறட்டு, - சதை பிரண்டு போதல். ஏதாவது கடினமான காரியம் செய்யும்போது சதை பிசகிப் போதல். பொதுவாக கை அல்லது காலில். படிகள் அல்லது சீரற்ற தரையில் நடக்கும்போது கால் பிசகி கெண்டைக்காலில் அல்லது பாதத்தில்தான் அதிகம் சதைப்பிரட்டு ஏற்படும்.

1282. தவிடு வறுத்து ஒத்தனம், - இந்த சதைப்பிரட்டுக்குத் தவிட்டை வறுத்து ஒத்தடம் கொடுப்பார்கள். ஒரு துணியில் தவிட்டை முடிந்து வெறும் வாணலியை அடுப்பில் சூடேற்றி அதில் இந்த தவிட்டு மூட்டையைச் சூடுபடுத்தி வலிக்கும் இடத்தில் ( சுளுக்கு அல்லது சதைப்பிரட்டு ) ஒத்தடம் கொடுப்பார்கள்.

1283. புளிப்பத்து, - இந்த ஒத்தடத்தில் ( தவிட்டு ஒத்தனம் ) வலி தீராவிட்டால் புளியைக் கெட்டியாக கரைத்துக் கொதிக்க வைத்து வலிக்கும் இடத்தில் அந்தப் புளிச்சாறால் தடவி சூடாகப் பத்துப் போடுவார்கள்.

1284. முட்டப்பத்து, - நரம்பு போன்றவை பிசகி இருந்தாலோ அல்லது எலும்பில் விரிசல், மெல்லிய விரிசல் இருந்தாலோ ரத்தக்கட்டு ஏற்பட்டாலோ அதற்கு முட்டைப் பத்துப் போடுவார்கள். முட்டையின் வெள்ளைக்கருவை எடுத்துப் பத்தாகப் பூசி விடுவார்கள். அது இறுக இறுக வலி குறையும். எலும்பை இணைக்கும். இந்தப் பத்துக்களை எல்லாம் முட/நுட வைத்திய சாலையில் போடுவார்கள்.  

காரைக்குடிச் சொல்வழக்கு. சிலேட்டு விளக்கும் சாரட்டும்.

இவர்கள் எங்கள் பெரியப்பா வெ. தெ. மாணிக்கனார் அவர்கள். இவர்கள் 1276*ஆவுடையான் செட்டியார் வீட்டைச் சேர்ந்தவர்கள். மாபெரும் தமிழறிஞர். பச்சையப்பா கல்லூரியில் தமிழ்ப் பேராசிரியராகப் பணிபுரிந்தவர். இவரது மாமனார் 1277* சேந்தனியார் வீட்டு ராமசாமி செட்டியார் அவர்கள். 1278* செட்டிநாட்டு அரசர் ராஜா சர் முத்தையா செட்டியார் அவர்களுடன் இருவரும் எடுத்துக் கொண்ட அரிய புகைப்படம்.

சேந்தனியார் வீட்டு ராமசாமி அண்ணன் அவர்களின் மகன்தான் ( பெரிய கருப்பன் அவர்கள் ) காரைக்குடியில் தமிழ்க் கல்லூரியை நிறுவியவர். இன்றும் அது மாத்தூர் சாலையில் செயல்பட்டு வருகிறது. 

வள்ளல் அழகப்பரின் அண்ணன் மகள் வள்ளியாச்சியின் வீட்டில் நான்காம் உலகத் தமிழ்க் கருத்தரங்கு நடைபெற்றபோது இந்தப் புகைப்படத்தை எடுத்தேன். மேங்கோப்பும் ஷாண்ட்லியர்களும் மிக அழகு.

காரைக்குடிச் சொல்வழக்கு :- ஊட வாரதும் நெருக்குவெட்டும்.

1256.சடைப்பெரம்பாய் - கெட்டிப்பிரம்பால் பின்னப்பட்ட பாய். இது பட்டாலையில் விரிக்கப்படும். சுமாராக ஆறடி அகலமும் பத்தடி நீளமும் கூட இருக்கும். பொதுவாக பட்டாலையில் விரிக்கப்படும் இது திருமணம், குடிபுகல் போன்ற விசேஷம் அனுவல் என்றாலும் திருவிழா சமயங்களிலும் பட்டாலை தவிர பத்தி முகப்பு ஆகியவற்றிலும் பெரும்பாலும் ஆண்கள் அமர விரிக்கப்படும். பெண்கள் அமர சமுக்காளம் விரிப்பார்கள். 

1257.குரிச்சி - சாய்வு நாற்காலி.இது வீட்டில் இருக்கும் பெரியவர்கள் ஓய்வெடுக்கப் பயன்படுத்துவது. ஈஸி சேர் போன்ற அமைப்பில் இருக்கும். மரத்தால் ஆனது. கால் வைக்க இருபுறமும் இருக்கும் கட்டைகளைப் பிரித்துவிட்டுக் காலை நீட்டித் தூங்கலாம். இதன் உடல் பகுதி பிரம்பு அல்லது பட்டை ப்ளாஸ்டிக்கால் பின்னப்பட்டிருக்கும். இதன் மேற்பகுதி/முழுப்பகுதியும் யானையின் முகபடாம் மாதிரி வெல்வெட் துணியால் போர்த்தப்பட்டிருக்கும்.  

1258.கவுளி சொல்லுதல் - பல்லி தட்டும் சத்தம். இது தட்டும் திசைக்கேற்பப் பலன் கொள்வார்கள்.  

காரைக்குடிச் சொல்வழக்கு :- வக்கூடும் சத்தகமும்.

1241. கல்யாணத்தில் மாப்பிள்ளை வீட்டார் பெண் வீட்டாருக்கு பேசிக்கொள்ளும் முறையும் திருப்பூட்டும் முறையும் வைத்தல்.

வகைப்பழம் வாங்குவார்கள். அண்டா, வாளி, பேஸின்,தூக்குச்சட்டி, தட்டுகள், தாம்பாளங்களில் 9, 11, 16 என்று சீர் தட்டு கொண்டு வருவார்கள். வாழைப்பழம் ரஸ்தாளி அல்லது செவ்வாழையாக இருக்கும். இது 101 அல்லது 51 என்ற கணக்கில் இருக்கும். மஞ்சள் பூசிய தேங்காய் 11, ஆப்பிள், ஆரஞ்சு, மாம்பழம், மாதுளை, சாத்துக்குடி ஆகியன 21 இருக்கும். எலுமிச்சை 16 இருக்கும். வெற்றிலை பாக்கு ஒரு தட்டிலும், பூப்பந்து ஒரு தட்டிலும், பேரீச்சம்பழம் ஒரு தட்டிலும், ரொட்டி/வேஃபர்ஸ் ஒரு வாளியிலும் , மிட்டாய் ( சாக்லேட்/ஃபாரின் சாக்லேட் ) ஒரு தூக்குச் சட்டியில்  இருக்கும். கல்கண்டு ஒரு தூக்குச் சட்டியில் இருக்கும். இதில் சில முறைகளை அவர்கள் நமக்குத் திருப்பித் தருவார்கள்.

1242. மாப்பிள்ளை சாமான். இதில் வைக்கப்பட்ட டேபிள் ஃபேன் & டேபிள் லாம்ப் & அலார்ம் கெடிகாரம். வெளிநாட்டு ஐட்டம் என்பதால் எனாமலில் செய்த ஷிப் ஷேப்பில் உள்ளது. 

கண்டனூர், கானாடுகாத்தான், தெக்கூர் வீடுகள்.

ஒரு சஷ்டியப்த பூர்த்தி விழாவுக்காக கண்டனூர் சென்றிருந்தபோது எடுத்தது. இவ்வீட்டின் முன்புற முகப்பில் இந்த ஓவியங்கள் அழகூட்டின. கோயில்களில்தான் துவாரபாலகர்கள் பார்த்திருப்போம். ஆனால் இங்கே வீட்டைக் காவல் காக்கும் வீரர்களை ஓவியத்தில் பார்த்து ரசித்தேன். படைச் சிப்பாய் போல் இரு கைகளிலும் வாள்சுமந்து நிற்கின்றான் இவ்வீரன். 

அவன் எதிரில் இன்னொரு பட்டாலைப் பத்தியில் அதே போன்றதொரு வீரன். இடுப்பில் ஒரு சுருக்குப் பை போன்ற ஒன்றும் அதை இடுப்பைச் சுற்றிக் கட்டிய குஞ்சலமும் அழகு.  போர்க்கோலத்தில் நீண்ட மீசையும் ரோமானியத் தொப்பியும் புஜங்களில் இந்திய மணிமாலைகளும் நெஞ்சில் ஆங்கிலேய சிப்பாய் போன்றதுமான ஒரு கலந்து கட்டிய காஸ்ட்யூம். 

காரைக்குடிச் சொல்வழக்கு. துடுப்பும் ஒலுகும்.

1221. நட ஒட - நடை உடை என்பதைப் பேச்சுவழக்கில் இப்படிச் சொல்லுவார்கள்.

1222. பொறகாடி - பின்னாடி, பின்னால், அதன் பிறகு, ஒருவருக்குப் பின்னால் பேசுதல், பின்னால் நடப்பதைக் குறித்தல்.

1223. சிஞ்சமிருதம் - ஒருவருக்கு /அவர் சொல்வதற்கு ஆமாம் சாமி போடுதல், ஜால்ரா அடித்தல். காக்கா பிடித்தல், ஐஸ் வைத்தல். சோப்புப் போடுதல். 

1224. தோது - சரிக்குச் சரி. தோது என்றால் பொதுவாக சீர் செனத்தியில் வரும். பெண்ணுக்கு என்ன தோது கொடுப்பார்கள் என்றால் மூணும் ஒண்ணும், ஐஞ்சும் ரெண்டும், பத்தும் மூணும் எனக் குறிப்பார்கள். சிலர் கோடிக்கணக்கில் கூட கொடுப்பார்கள். இதில் முதலில் சொல்வது தொகை, பின்னே சொல்வது நகை. மூன்று லட்சம் ஒரு வைர நகை, ஐந்து லட்சம், இரண்டு வைர நகை, பத்து லட்சம், மூன்று வைர நகை. ( வரதட்சணைதான். - இப்ப இதெல்லாம் கிடையாது.  பெண் வீட்டில் கொடுப்பதை பெண் அல்லது பையன் & பெண் பெயரிலேயே போட்டு விடுகிறார்கள், போட்டு விடுகிறோம் . நகை பெண்ணுக்குக் கொடுப்பது, அவள் போட்டுக்கொள்வது என்பதால் அதிலும் இப்போது டிமாண்ட் கிடையாது. போட்டாலும் சரி போடாவிட்டாலும் சரி என இருக்கிறார்கள் மாப்பிள்ளை வீட்டார். ) 

காரைக்குடிச் சொல்வழக்கு. கிட்டங்கியும் பொட்டகமும்.

1201.சாத்து ( வணிகர்) - வியாபார நிமித்தம் இடம் பெயர்ந்து செல்லும் குழுவினர். எனவே சாத்தப்பன் என்ற பெயர் இங்கே உண்டு. சாத்தையனார் என்பதும் ஐயனார் பெயர். ஊனையூர் கோவிலில் உள்ள சாமிக்கு முத்துவெள்ளைச் சாத்தையனார் என்று பெயர். 

1202. செலவு நடை - நடைமுறைச் செலவுகள்/ தினசரிச் செலவுகள் / ஒரு வருடச்செலவு / செலவானவைகளைக் குறிப்பெடுத்தல்.  

1203. மேலாள், அடுத்தாள், சமையலாள், எடுபிடிப் பையன்கள் - சைகோன், மலாயா, சிங்கப்பூர் போன்ற ஊர்களில் வட்டிக்கடைக் கிட்டங்கியில் வேலை செய்தோர். மேலாள் மேனேஜர் போன்ற பதவி, அடுத்தாள் அதற்கு அடுத்த உத்யோகமான கணக்குவழக்குப் பார்ப்பவர் ,  சமையலாள் இவர்களுக்கு சமையல் செய்து கொடுப்பவர், எடுபிடிப்பையன்கள் இவர்கள் வட்டிப் பணம் வசூல் செய்யப் பணிக்கப்பட்டவர்கள். கிட்டங்கியிலேயே வசிப்பார்கள். காலையில் பெட்டியடியை சுத்தம் செய்வதும் இறைவன் திருவுருவங்களைத் துடைத்து பூமாலை பாமாலைகளால் ( திருப்புகழ்) தொழுது, தினப்படி நடைமுறைச் செலவுகளை அடுத்தாளிடம் ஒப்புவித்து பின் கிஸ்தி ( தினப்படி வட்டி ) வசூலுக்குச் செல்வார்கள். 

காரைக்குடிச் சொல்வழக்கு. லண்டியன் விளக்கும் லஸ்தர் விளக்கும்.

1181. ஒரம் ( குழந்தைக்கு ) - கைக்குழந்தைகளுக்கு கழுத்தில் விழும் சுளுக்கு. இதை நீக்க புடவையில் குழந்தையைப் போட்டு உருட்டுவார்கள். 

1182. ஒறங்க - தூங்க.   

1183. குத்தாலந்துண்டு - பெண்கள் குளிக்கும்போது ( முடிந்துகொண்டு )   உடுத்தும் துண்டு. இருபுறமும் கரைகொண்டு சிறிது கெட்டியான பருத்தித் துணியில் அடர் வெளிர் நிறங்களில் இருக்கும். 

1184. மோந்தூத்தி - நீரை முகர்ந்து ஊத்தி. 

1185. ரொட்டிமுட்டாய் -பிஸ்கட் , சாக்லெட் , பிஸ்கட்டை ரொட்டி என்றும் சாக்லேட்டை மிட்டாய் என்றும் கூறுவார்கள்.  

காரைக்குடிச் சொல்வழக்கு :- கித்தானும் நடையனும்.

1161. பூச்சிபொட்டு - பூச்சிகள், சிறு வண்டுகள், பாம்பு, ஊர்வன.

1162. முட்டைச்சுவர் - சுவர் அமைக்கும்போது காரையுடன் முட்டையின் வெள்ளைக்கருவையும்  கருப்பட்டியையும் சேர்த்து அரைத்துப் பூசுவார்கள். அதனால் அவை பாலீஷ் போட்டதுபோல் இருக்கும் . வெள்ளை ( சுண்ணாம்பு ) அடிக்க வேண்டிய அவசியம் இருக்காது.

1163. அப்பைக்கி அப்ப - அப்போதைக்கு அப்போதே.

1164. சேயகொள்ள - திருமணம் செய்யக் கொள்ள, ஒருவேலையைச் செய்வது குறித்து மற்றும் உறவுகளுக்குள் பந்தம் கொள்வது.

1165. பொய்த்தாரேன், போயாறேன், வந்தாரோம் - பொய்த்தாரேன் - போய் வருகிறேன் , போயாறேன் - இதுவும் போய் வருகிறேன் என்று சொல்வதுதான். வந்தாரோம் - வந்துவிடுகிறோம் என உறுதி அளிப்பது.

1166. ஒருதடியா - ஒரு வழியாக, ஒரே தரமாக,

1167.சத்த - கொஞ்ச நேரம்.

1168. கடுசு - கடுமை கொண்டவரைக் குறிப்பிடுவது.  பொல்லாதவர்.

காரைக்குடிச் சொல்வழக்கு. சம்போவும் கவுடும்.

1141. வேதபாடசாலை – ரிக் வேதம் பயிற்றுவிக்கும் பாடசாலை. பாடசாலை கட்டுவித்து அதில் கனபாடிகள் ஒருவர் வேதத்தை மாணவர்களுக்கு இலவசமாகக் கற்பிப்பார். இதற்கு என இறையிலி நிலங்கள் மூதாதையரால் எழுதப்பட்டு அவற்றில் இருந்து கிடைக்கும் பயன்கள் ( நெல், தானியம் காய்கறி ) இந்தப் பாடசாலையில் பயில்வோருக்கு உணவாக வழங்கப்படும். பாடசாலை நிர்வாகச் செலவுக்கும் பயன்படும்.

1142. பசுமடம் – கோசாலை, தினப்படி பூஜைக்கு கடவுளுக்கு அபிஷேகம் செய்யப் பால் வழங்கும் பசுக்களைப் போஷித்துப் பராமரிக்கும் இடம். நகரத்தார் பரிபாலனம் செய்யும் ஒவ்வொரு கோவிலுக்கும் அநேகமாக பசுமடம் இருக்கும். இப்பசுமடத்தில் முதிர்ந்த மாடுகளையும் பராமரிப்பார்கள்.

1143. சம்போ (பூஜை) – காசியில் சிவனுக்கு செய்யப்படும் பூஜை சம்போ பூஜை.  காசி விஸ்வநாதர் கோயிலில் ஆறுகாலமும் நடக்கும் பூஜை நாட்டுக்கோட்டை நகரத்தார் சத்திரத்திலிருந்து கூடைகூடையாய்ப் பூக்கள், அபிஷேகதிரவியங்கள் ஆகியன கொண்டு செல்லப்பட்டு நடத்தப்படும். சத்திரத்திலிருந்து ஆறு காலமும் மேள தாளத்துடன் தலைமேல் பித்தளைப் பூக்குடலைகளையும் அபிஷேகப் பொருட்களையும் சுமந்து பணியாளர்கள் முன்னே செல்ல அவர்களுடன் சத்திரத்தில் தங்கி இருக்கும் நகரத்தார் மக்கள் கோவிலுக்குச் சென்று அபிஷேகத்தையும் அலங்காரத்தையும் தீபாராதனையையும் கருவறையின் படியில் அமர்ந்து தரிசிக்கலாம். இந்தப் பூஜை ஊர்வலத்த்தும் பூஜைக்கும் சம்போ பூஜை என்று பெயர்.  

1144. மகேஸ்வர பூஜை – சிவனுக்கு செய்யும் பூஜை. திருமண சமயங்களில் வேண்டிக்கொண்டவர்கள் இப்பூஜையைச் செய்வார்கள். ஏழு பானைகளில் பொங்கலிட்டுப் படைப்பார்கள். மிக விமரிசையான பூஜை இது.

1145. கார்த்திகை வேல் பூஜை:- கார்த்திகை மாதத்துக்காரர்கள் ( விரதமிருப்பவர்கள் ) கார்த்திகை மாதம் ஒவ்வொரு சோமவாரமும் முருகனின் தெண்டாயுதம் வேலுக்கு அபிஷேகம் செய்து மாவிளக்கு வைத்து அர்ச்சனை செய்து ஏழுவகைக்காய்கறிகளுடன் சர்க்கரைப் பொங்கல் அன்னம் படைத்து பூஜித்து ஊரோடு உணவிட்டு உண்பார்கள். சஷ்டிக் கவசம், சண்முகக் கவசம், அறுபடைக் கவசம், ஸ்கந்த குரு கவசம், காவடிப் பாடல்கள், வேல் மாறல், வேல் வகுப்பு,  பாமாலைப் பாடல்கள் படிப்பார்கள். இதற்கு கார்த்திகை வேல் பூஜை என்று பெயர்.