ட்ராச்சென்பர்க் கோட்டை

ட்ராச்சென்பர்க் கோட்டை

ஜெர்மனிக்குச் சென்றிருந்த போது பையர் ட்ராச்சன்பர்க் கோட்டைக்கு அழைத்துச் சென்றார். நம்மூரு என்றால் மலை உச்சியில் கோவில் இருக்கும். இங்கே கோட்டைகள் இருக்கின்றன. 

வூப்பர்டால், ஓபர்ஹௌஸன், டோர்ட்மெண்ட், ஹம், சுந்தர்ன் ரயில்வே ஸ்டேஷன்கள்

 ஜெர்மனி சென்றிருந்தபோது நான் மிகவும் ரசித்தவை ரயில் , மெட்ரோ ரயில், மோனோ ரயில், ட்ராம் போக்குவரத்துக்கள். 

இது ஓபர்ஹௌஸன் என நினைக்கிறேன். வூபர்டாலா எனவும் தெரியவில்லை.   

கட்டிடங்களை வித்யாசமாக வடிவமைப்பதில் வல்லவர்கள் ஜெர்மானியர்கள். 

ஜெர்மனி தமிழ்க் கடைகள், வீடுகள், உணவகங்கள்

 ஜெர்மனி தமிழ்க் கடைகள், உணவகங்கள்

இங்கே தமிழர்களுக்கான உணவகங்கள் அன்னம், அம்மா, இன்னும் சரவணபவன் போன்றவையும் உள்ளன.  விருந்து வைபவங்கள் என்றால் இங்கே அனைத்துமே கிடைக்கின்றன.ஆர்டர் செய்யலாம். ஹாயாக இருக்கலாம். பொரித்த பரோட்டா, டீ இங்கே அருமை. வட இந்திய, தென்னிந்திய உணவுகள் அனைத்துமே பெறலாம். டோர்ட்மெண்டில் அம்மா உணவகம், அதன் பக்கத்தில் தமிழ் லைப்ரரி, வீடியோ கடை மேலும் ஐடி என் என்ற தமிழ்த் தொலைக்காட்சி ஒளிப்பதிவுக் கூடமும் உண்டு.

ஒவ்வொரு வாரமும் தமிழர் தெருவிழா, இசைத்தென்றல், வெற்றிமணி விழா, ஒய் ஜி மகேந்திரன் நாடகம் ஆகியன டோர்ட்மெண்டில் அல்லது டுசில்டார்ஃபில் நடக்கின்றன. இங்கே தமிழர்கள் பல்வேறு இடங்களில் இருந்தாலும் டூயிஸ்பர்க், டுசில்டார்ஃப், டோர்ட்மெண்ட், கோலன், ஆஹன், ஓபர்ஹௌசன் ஆகிய இடங்களில் குறிப்பாக ஈழத்தமிழர்கள் அதிகம் வசிக்கின்றனர். ஏறத்தாழ 60,000 ஈழத்தமிழர்கள் இங்கே வசிப்பதாகப் படித்தேன்.

ரைன் நதியின் சரக்குக் கப்பல்கள்.

 ஜெர்மனியில் பாயும் முக்கியமான நதிகளில் ஒன்று ரைன். இது ஐரோப்பா முழுமைக்குமே பாய்கிறது. முன்பே ரைன் டவரில்  ( ரொட்டேட்டிங் சர்க்குலர் டவர் ) ஏறி ரைன் நதியின் அழகுக் காட்சிகளை நாம் கண்டு களித்திருக்கிறோம். 

இந்த முறை மகனாருடன் அவரின் டூயிஸ்பர்க் வீட்டிற்கு அருகில் இருக்கும் ரைன் நதி வரை ஒரு நாள் மாலை  நடைப் பயிற்சி செய்யச் சென்றோம். 

வால்நட் கேரமல்லும் ஃபெரேரோ ரோச்செரும்

 உலகப் புகழ்பெற்ற மியூசியங்களில் ஒன்று ஜெர்மனியில் இருக்கும் இம்ஹாஃப் சாக்லேட் மியூசியம். 1993  அக்டோபர் 31 இல் ரைன் நதியில் மேல் கட்டமைக்கப்பட்டது.  

1585 லேயே சாக்லேட்டை பானமாக அருந்தி வந்தாலும் மக்கள் அதைப் பதினேழாம் நூற்றாண்டில்தான் திடப் பொருளாக சாக்லேட்டாகப் பயன்படுத்தத் துவங்கினார்கள். அப்போது இது அரிதாகக் கிடைக்கும் விலையுயர்ந்த ஒரு அபூர்வப் பொருள். எனவே சீமான்களும் சீமாட்டிகளும் மட்டுமே சுவை பார்த்திருக்காங்க. பத்தொன்பதாம் நூற்றாண்டில் இது பொதுமக்களுக்கும் எட்டிய கனியாயிடுச்சு. 

கொலோனில் இருக்கும் வித்யாசமான சாக்லேட் ஃபவுண்டன் எனப்படும் சாக்லேட் செடி. இதில் வேஃபர்ஸைத் தொட்டுத் தருவார் இங்கே பணிபுரியும் பெண் ஒருவர். கியூவில் நின்று அனைவருமே வாங்கிச் சுவைத்தோம். 

முதலில் இம்ஹாஃப் ஸ்டார்வெர்க் மியூசியம் என அழைக்கப்பட்ட இது பின்னர் லிண்ட் இதன் பார்ட்னரானவுடன் இம்ஹாஃப் சாக்லெடன் மியூசியம் என அழைக்கப்படுது. 

சாக்லேட்களின் மகாத்மியம் - லிண்ட் - LINDT - ஜெர்மனி

ஜெர்மனியின் சாக்லேட் மியூசியத்தில் சாக்லேட்களின் வகைகள், தயாரிப்பு, தயாரிக்கும் மெஷின்கள், பாக்கிங், மோல்டுகள், விற்பனையகம், சாக்லேட்டின் பூர்வீகம், நூற்றாண்டுகளாக அதன் பயணம் பற்றி அறிய முடிந்தது. இவற்றை செக்‌ஷன் செக்‌ஷனாகப் பிரித்து விவரித்து எழுதியே வைத்திருக்கிறார்கள். எல்லாம் நமக்குத் தெரியாத ஜெர்மனில் இருக்கு ஹ்ம்ம்!. 

சாக்லேட், சொக்கலைட், சிக்லேட் என்று எல்லாம் என் பெரியம்மா 1950 களின் சாக்லேட்களை ஒரு முறை வகைப்படுத்தினார். டார்க் சாக்லேட், சாஃப்ட் சாக்லேட் என்றெல்லாமும் இருக்கிறது. வெள்ளை நிறம், அரக்கு நிறம், கருப்பு நிறம், வெளிர் மஞ்சள் நிறம் இன்னும் பல நிறக் கலவைகளில் சாக்லேட்டுகள் கிடைக்கின்றன. 

வாயில் போட்டால் கரையும் ஸ்விஸ் சாக்லேட்டுகள் உலகப் புகழ் பெற்றவை. சில சாக்லேட்டுகள் நம்மூரு உஷ்ணத்தில் சாக்லேட் ட்ரிங்க் ஆகிவிடும் அபாயம் உள்ளவை. எனவே ரெஃப்ரிஜிரேஷன் செய்துதான் சாப்பிடணும். 

நம்மூரு டெய்ரி மில்க்கும், ஃபைவ் ஸ்டாரும், காட்பரீஸும், காஃபி பைட்டும்தான் பல்லாண்டுகளாக என் விருப்பமாக இருந்திருக்கிறது.  வான் ஹௌடன் என்று சிங்கப்பூரில் இருந்து என் மாமா கொண்டு வரும் சின்ன சிவப்பு கவர் போட்ட டார்க் சாக்லேட் எங்களுக்கு எப்போதாவது கிடைக்கும் பேரதிசயம். 

பெர்னாட்ஷாவின் போரும் காதலும் என்ற நாடகத்தில் வரும் வீரனுக்கு அதன் நாயகி சாக்லேட் சாப்பிடக் கொடுப்பாள். சர்காஸ்டிக்காக அவனை க்ரீம் வீரன் என்றும் அழைப்பாள். 

SCHOKOLADEN MUSEUM, சாக்லேட் மியூசியமும் சாக்லேட் செடியும்.

 சாக்லேட் கப்பல் பார்த்திருக்கின்றீர்களா.

இல்லாவிட்டால் அதைப் பார்க்க நீங்கள் ஜெர்மனி கோலோன் நகரின் ரைன் நதிக்கரைக்குத்தான் ( RHEINAUHAFEN) வரவேண்டும் . ஆன்லைனில் டிக்கெட் புக் செய்தோம். இதைப் பார்க்கச் செல்ல பல்வேறு வாகனங்களுக்கு வழி கொடுத்துள்ளார்கள். போட் என வித்யாசப் பயணமும் உண்டு. ஆனால் அங்கே மினி ரிக்‌ஷாவில் சிலர் வந்திறங்கியது கவர்ச்சிகரமாய் இருந்தது :) நாங்கள் (எங்கள் மகன் வீடு இருக்கும் ) டூயிஸ்பர்க்கிலிருந்து  ட்ராம், மெட்ரோ ட்ரெயின் & பஸ்ஸில் போனோம்.  

உலோகத் தரை, கண்ணாடிச் சுவரால் அமைக்கப்பட்ட மிக அழகான இந்த சாக்லேட் கப்பலில் சாக்லேட் மியூசியம்,சாக்லேட் ஷாப், சாக்லேட் தயாரிக்கும் முறை, 5000 வருடப் புராதன சாக்லேட்டின் வரலாறு, சாக்லேட் தயாரிக்கப் பயன்படுத்தும் அச்சுகள், பிரபல ப்ராண்டுகளின் சாக்லேட், சாக்லேட் தயாரிப்பின் பூர்வீகம், சாக்லேட் தயாரிப்பவரின் குடும்ப விவரம்,கோகோ பீன்ஸில் இருந்து தயாரிப்பது முதல்  இன்றைய ப்ளாக் சாக்லேட் வரை விதம் விதமான சாக்லேட் வகைகளைக் காணலாம். கேட்கும்போதே நாவூறுகிறதல்லவா !

நெஸ்லே,லிண்ட் சாக்லேட்டுகள் என உலகத் தரம் மிகுந்த சாக்லேட்டுகள் தயாராகின்றன. 

இதோ ஒரு மினி மோட்டார்  ரிக்‌ஷா. 

ஸ்வாலோஸ் நெஸ்டும், ஜெரோ க்ராஸும்

ஜெர்மனி கோலோனில் இருக்கும் இந்த சர்ச்சின் கட்டிடக்கலை, முகப்புச் சிற்பங்கள், மார்பிள் & கிரானைட் சிற்பத் தொகுதிகள், (புனிதர்கள் மட்டுமல்ல வித்யாசமான உருவங்களும் பொறிக்கப்பட்டிருப்பது), ஜன்னல் கண்ணாடிகளில் வரலாறு சொல்லும் வண்ண ஓவியங்கள், ஸ்வாலோஸ் நெஸ்ட் எனப்படும் மிகப்பெரும் இசைக்கருவி அனைத்தையும் இன்னும் ஒரு இடுகையில் சொல்லி இருக்கிறேன். 

ஒன்பதாம் நூற்றாண்டைச் சேர்ந்த ஜெரோ க்ராஸையும் ஆர்ச்பிஷப்களின்/புனிதர்களின் கல்லறைச் சிற்பங்களையும், இயேசுவின் வாழ்வியல் சிற்பங்களையும் சிலுவைப்பாதையையும் நீங்கள் இங்கே காணலாம். 

எட்டு நூற்றாண்டுகளுக்கு மேல் கட்டப்பட்ட இந்த அற்புத கதீட்ரலை ஜெர்மனி சென்றால் காண மறவாதீர்கள்.முழுக்க முழுக்க ஜெர்மானியக் கட்டிடக் கலையில் ரைன் நதிக்கரையில் இரட்டைக் கூம்பு வடிவக் கோபுரங்கள் கொண்டு அமைக்கப்பட்டது. 

வெளியே இருக்கும் இச்சிற்பங்கள் அபோஸ்தலர்களைப் போலத் தோன்றுகிறது.  இரட்டைக் கோபுரங்கள் கொண்ட கதீட்ரல் இது. 12 ஆம் நூற்றாண்டில் இருந்து15 ஆம் நூற்றாண்டு வரை கட்டியும் கட்டி முடிக்க முடியல. அதுனால் கிட்டத்தட்ட 8 நூற்றாண்டுகளாக இதைக் கட்டி முடிச்சிருக்காங்க. அதுக்கு ஏத்த அளவு இதுல மார்பிள் வேலைப்பாடுகளும் உண்டு. 

கொலோன் கதீட்ரலுக்குள் கல்லறைச்சிற்பங்களும் ஜெரோ சிலுவையும்.

 பன்னிரெண்டாம் நூற்றாண்டில் கோதிக் கட்டிடக்கலை பாணியைப் பின்பற்றிக் கட்ட ஆரம்பிக்கப்பட்ட கொலோன் சர்ச் (ஜெர்மனி ) பத்தொன்பதாம் நூற்றாண்டில்தான் ( 1880 ) பூர்த்தி செய்யப்பட்டது. ரோமன் கத்தோலிக்க சபையினரால் நிர்வகிக்கப்படும் இந்தக் கதீட்ரலில் சில புனிதர்களின் உடல்கள் உள்ளேயே வைக்கப்பட்டு அதன்மேல் அவர்களின் சிற்பங்களும் வடிக்கப்பட்டுள்ளன. 

வடக்கு தெற்கு என்று இரண்டு கோபுரங்கள் கொண்ட இந்த சர்ச் பதினெட்டாம் நூற்றாண்டில் பூர்த்திசெய்யப்பட்டபோது உலகிலேயே உயரமான கோபுரமாக இருந்ததாம் !. 

வூபர் நதியின் மேல் தொங்கு ரயிலில் ஒரு த்ரில்லிங் சவாரி.

 அன்றைக்குத் தொங்கும் ரயிலில் பாதியில் விட்டுட்டுப் போயிட்டேனே. வாங்க வூபர் நதியின் மேல் ஒரு சவாரி போவோம். 

ஜெர்மனியின் நார்த் ரைன் வெஸ்ட்பேலியா மாகாணத்தில் ஓடும் ஒரு நதிதான் வூபர். இது ரைன் நதியின் கிளை நதிதான். 

வூபர்டால் வோஹ்விங்கல் சஸ்பென்ஷன் மோனோரயில்

 தொங்கு தோட்டம் கேள்விப்பட்டிருப்பீங்க. தொங்கும் ரயில் கேள்விப்பட்டிருக்கீங்களா. வாங்க பார்ப்போம். ஜெர்மனியின் வூபர்டால் வோஹ்விங்கல் சஸ்பென்ஷன் மோனோ ரயில்தான் அது. 

இரும்பு விளைச்சல் அதிகம் (!) என்பதால் ஜெர்மனியில் நூற்றைம்பது ஆண்டுகளுக்கு முன்பே மாங்ஸ்டன் ரயில்வே பாலம், வூபர்டால் சஸ்பென்ஷன் ரயில் என இரும்பைக் கொட்டி இருப்புப் பாதையை மேலே கீழேன்னு கட்டி ரயில் ஓட்டி இருக்காங்க.

பதினெட்டாம் நூற்றாண்டில் அவங்க தொங்கு ரயில் என்னும் புதிய முயற்சியில் இருந்தபோது இங்கே நாம் அப்போதான் போர்பந்தரில் இருந்து தானே வரை இருப்புப்பாதை அமைச்சு முதன் முதலா ரயில் ஓட்டி இருக்கோம். 

கௌசியும் அவர் கணவரும் அவர்கள் வீட்டில் விருந்தளித்தபின் மாங்க்ஸ்டன் ரயில்வே பாலம், ஷோலாஸ் கேஸில் எல்லாம் காண்பிச்ச பின்னாடி இங்கே கொண்டு வந்து இறக்கி விட்டாங்க. 

எதிஹாடில் பதிநான்கு மணிநேரம்

 ஜெர்மனிக்கு இந்தியாவில் இருந்து செல்லப் பல்வேறு விமானங்களும் பல்வேறு விமானத்தளங்களும் இருந்தும் நாங்கள் பெங்களூருவைத் தேர்ந்தெடுத்தோம். ஏனெனில் அங்கே எங்கள் பெரிய மகன் வேலை செய்து வருகிறார். 

அபுதாபி வழியாகச் செல்லும் எதிஹாட் ஏர்லைன்ஸில் டிக்கெட்டும் வாங்கியாச்சு. விசா, டிக்கெட், இன்சூரன்ஸ் எல்லாம் உட்பட ஒரு நபர் சென்று வர ஒன்றரை முதல் இரண்டு லட்சம் வரை செலவானது. சின்ன மகன் அழைத்துச் சென்றார் என்பதால் எனக்கு இதன் செலவு விபரங்கள் எல்லாம் சரியாகத் தெரியாது :) :) :)  

ஜெர்மனி சென்றாச்சு. இருமாதம் தங்கி ஐரோப்பா டூர் எல்லாம் முடித்து ஜெர்மனியில் இருந்து திரும்பும்போது எதிஹாடில்  ஏறியபோது எடுத்த படம் இது. 

ஓபர்ஹௌஸனில் ஒரு விருந்து

ஓபர்ஹௌஸனில் இருக்கும் திரு கந்தையா முருகதாசன் சார் அவர்கள் தங்கள் இல்லத்துக்கு விருந்துக்கு அழைத்திருந்தார். அவரும், அவர் மனைவி லைலாவும் மிகவும் தன்மையானவர்கள். முதல் முறை என்னைப் பார்க்க வரும்போதே அவர் எங்களுக்கு இனிப்புகளும் வடையும் கொண்டு வந்திருந்தார்கள். தங்கள் வீட்டுக்கும் அழைத்துச் சென்றார்கள். 

நான் இந்தியா திரும்பும் நாள் நெருங்க நெருங்க மகனிடம் அவர் இல்லத்துக்குச் சென்று வர வேண்டும் எனக் கேட்டேன். தினமும் இருவரும் நடைப்பயிற்சி செல்வோம். ஆரோக்கிய உணவுகள், திருப்புகழ் பாராயணம், சாய் வரலாறு படித்தல்,மகனுக்குப் பிடித்த உணவு வகைகளைச் செய்து கொடுத்தல், அளவளாவுதல், ஹம் காமாட்சி அம்மன் கோவில், மகனது நண்பர்களின் வீட்டில் விருந்து, சாய் பூஜைகள், பண்ணாகம் கிருஷ்ணமூர்த்தி சார், நிம்மி சிவா,  சந்திரகௌரி சிவபாலன் வீட்டிற்குச் சென்றது என நாளும் பொழுதும் ஓடி விட்டது. இவர்கள் எல்லாருமே தங்கள் அன்பினால் எங்களை மூழ்கடித்து விட்டார்கள். 

எனவே ஊருக்குச் செல்வதற்கு  முந்தைய வாரத்தில் செப்டம்பர் முதல் வாரத்தில்   ஓபர்ஹௌஸன் சென்று லைலா மேடத்தின் விருந்தில் களித்து அவர்கள் என் மகனுக்காகச் செய்து அனுப்பிய இனிப்பு பான்& இனிப்பு சிப்ஸ் ஆகியவற்றை வாங்கி வந்தோம். 

கீழிருந்து மேலாக ஃபோட்டோக்கள் அப்லோடியதால் உங்களுக்கும் லைலா மேம் கொடுத்த பான் & சிப்ஸ். எடுத்துக்கொள்ளுங்கள். 

மாங்க்ஸ்டன் ரயில்வே பாலம் - நூறாண்டுகால இரும்பின் சா(ஆ)ட்சி.

5000 டன் எஃகு இரும்பில் அமைக்கப்பட்டு கிட்டத்தட்ட 123 ஆண்டுகளுக்கும் மேலாக புழக்கத்தில் உள்ள ஒரு ரயில்வே பாலத்தை ஜெர்மனியில் தோழி கௌசி கூட்டிச் சென்று காட்டினார். நதியின் போக்கில் ஒரு பில்லர் கூட வராமல், நதியின் ஓட்டத்தைத் தடுக்காமல் மாசுபடாமல் நதியின் இரு கரையிலும் ட்ரஸ் ஆர்ச் ஃபார்மில் கட்டப்பட்ட வித்யாசமான  பாலம் இது.

ஜெர்மனியில் மிக உயரமான ரயில் பாலம் இந்த மங்கஸ்டன் பாலம். கிட்டத்தட்ட 351 அடி உயரத்தில் அமைந்துள்ள இது ஒன்றரை கிலோமீட்டர் தூரத்துக்கு நதியின் மேலே சென்று  பூமியின் இரு உயர்ந்தபகுதிகளை இணைக்குது .  வூப்பர்டால், ஓபர்பார்மேன், ஸோலிங்கன் ஆகிய ரயில்வேக்களின் ஒரு பகுதியாக இது அமைக்கப்பட்டுள்ளது.  ரெம்ஷெய்ட் நகரையும் ஸோலிங்கன் நகரையும் இணைக்கும் இது ஸோலிங்கனில் வூப்பர் நதியின் மேல் அமைக்கப்பட்டுள்ளது.

மங்ஸ்டன் ப்ரூக்கன் பார்க், மை க்ளிக்ஸ். MUNGSTEN, BRUCKENPARK, MY CLICKS.

கிட்டத்தட்ட 1897 இல் கட்டப்பட்ட இப்பாலத்திற்கு அருகில் அமைந்திருக்கும் இடங்களை இங்கே புகைப்படமாகப் பகிர்ந்துள்ளேன்.  இப்பாலத்திற்கு முதலில் முதலாம் வில்ஹம் சக்ரவர்த்தியை கௌரவிக்கும் வண்ணம் கைஸர் வில்ஹம் ப்ரூக் எனப் பெயரிடப்பட்டிருந்தது. பின்னர் முடியாட்சியின் முடிவில் இது மங்க்ஸ்டன் பாலம் எனப் பெயரிடப் பட்டது.

வூப்பர் என்னும் நதியின் மேல் ரெம்ஷெய்ட் மற்றும் ஸோலிங்கன் ஆகிய இரு நகரையும் இந்தப் பாலம் இணைக்கிறது.

மங்ஸ்டன் ப்ருக்கன் பார்க் சிற்பங்கள்.

இரும்பிலே ஒரு இதயம் முளைக்குதே என்ற எந்திரன் பாட்டைக் கேட்டிருப்பீங்க. இங்கோ ஜெர்மனியில் எல்லாமே இரும்புதான். இந்த நாட்டோட அபார வளர்ச்சிக்கு இங்கே அமோகமாகக் காணப்படும் இரும்புத் தாதுவும் முக்கியப் பங்கு வகிக்குது. அதுனால இவங்க இரும்புல சிற்பமெல்லாம் செய்து வைச்சிருக்காங்க மங்க்ஸ்டன் ரயில்வே பாலத்துக்குப் போற வழியில்.

ஜெர்மனியின் ஏன் யூரோப்பின் மிக உயர்ந்த மங்கஸ்டன் ரயில் பாலத்தை கௌசியும் அவர் கணவர் சிவபாலன் அவர்களும் தங்கள் காரில் அழைத்துச் சென்று காண்பித்தார்கள். மிக மிக அண்ணாந்து பார்க்கும் அளவில் உயரமானதுதான். 1897 இல் இரண்டாம் வில்லியம்  மன்னர் காலத்தில் கட்டப்பட்டது. 

இது மங்ஸ்டனில் வூப்பர்டால் என்னுமிடத்தில் அமைந்துள்ளது. ஸோலிங்கனுக்கும் ரெம்ஷய்ட் என்னுமிடத்துக்கும் நடுவில் உள்ளது. அங்கேதான் இந்த விதம் விதமான வார்ப்பிரும்புச்  சிற்பங்களையும் கண்டு களித்தோம். 

பாலத்தைத் தரிசிக்குமுன் இந்த சிற்பங்களையும் கொஞ்சம் கண்டு களியுங்கள். ஏனெனில் இரும்பு உற்பத்திக்குப் பெயர் பெற்ற ஜெர்மனி  இரும்பு மனிதர்கள் நிறைந்த ஊரும் கூட. 

கட்டிடங்கள், பாலங்கள் இன்னும் பல்வேறு அலங்கார அமைப்புகளிலும் இங்கே இரும்பின் பயன்பாடு அதிகம். ஜெர்மானியர்கள் இரும்பைக் கொண்டு உலகைத் திரும்பிப் பார்க்க வைத்தவர்கள் என்று கௌசி தனது நூலில் குறிப்பிட்டுள்ளார்.

கருங்கானகமும் குக்கூ கடிகாரமும்.

ஜெர்மனிக்குச் சென்றுவந்தால் குக்கூ க்ளாக் வாங்காமல் வருவாங்களா.அதுவும் யூரோப் டூரில் முதல்நாள் ப்ரஸ்ஸில்ஸ், இரண்டாம் நாள் ப்ளாக் ஃபாரஸ்ட். இதுதான் குக்கூ கடிகாரத்தின் தோன்றிடம். விதம் விதமான குக்கூ கடிகாரங்கள் 150 யூரோவிலிருந்து 3000 யூரோ & அதற்கு மேலும் உள்ள கடிகாரங்கள் காட்சிக்கு உள்ளன.  தென்மேற்கு ஜெர்மனியில் ப்ளாக் ஃபாரஸ்ட் என்னுமிடத்தில் கிடைக்கும் மரத்தின் மென்மையான துண்டுகளைக் கொண்டு 1600 ஆம் ஆண்டுகளில் இருந்து தயாரிக்கப்பட்டு வருகிறது குக்கூ கடிகாரங்கள். வருடத்தின் எட்டு மாதங்கள் குளிரும் பனியும் உறையும் பகுதி இது. உறைபனியில் வெளியே அதிகம் சென்று பணியாற்ற இயலாது. எனவே வீட்டில் அமர்ந்து செய்யும் தொழிலான குக்கு கடிகாரங்கள் தயாரிக்கும் பணி இங்கே உள்ள மக்களுக்கு அமோக வருமானத்தைத் தருகிறது.

வாங்க ஒரு சுற்று பாடன் உ(ர்)ட்டம்பர்க் நகருக்கும் டிடிஸி ஏரிக்கும் அதைச் சுற்றியிருக்கும் கடைகளில் உள்ள குக்கூ கடிகாரங்களையும் , பீர், பிராண்டி, ரம், ஒயின்,ஸ்காட்ச் இன்னபிற குடி வகைகளையும், பதப்படுத்தப்பட்ட அசைவ உணவு வகைகளையும் பழங்களையும் கண்டு களிக்கலாம்.

டூயிஸ்பர்க்கில் ரோடு துடைக்கும் ட்ரக்ஸ்.

ஃப்ளைட் ஏறிப் போயாச்சு , போய் சுத்தமான ரோடப் பார்த்தாச்சு  என்று பாடத்தான் ஆசை.

விடிகாலையில் அதாவது ஆறு மணிக்கே ரோட்டில் மெல்லிசாக தினமும் கடகடவென சத்தம் கேட்கும். கார்பேஜ் கலெக்‌ஷன் மற்றும் ரோடு துடைக்கத்தான் இந்த மினி சத்தம் எனக் கண்டு கொள்ள நாளாயிற்று.

ஒருநாள் கிச்சன் கதவைத் திறந்து பார்த்தால் தூரத்தில் குட்டியானை போன ஒன்று தும்பிக்கையைத் தரையில் தடவிக் கொண்டு தட தடவெனத் தாறுமாறாக ஓடி வந்தது.

சுவாரசியம் அதிகப்பட அது என்ன என்று நின்று நிதானித்துக் கவனித்தேன். சீராக இல்லாமல் அதகளம் செய்யும் யானை போல் ரோடு முழுவதும் குறுக்கும் நெடுக்கும் எட்டுப் போட்டுக் கொண்டிருந்தது அது. நீங்களே புகைப்படங்களில் அதன் அதகளத்தைப் பாருங்களேன்.

குப்பை மட்டுமில்லாமல் சாலையில் ஒட்டும் பிசுக்குகளையும் நீக்குகிறது இது. ஆர்கானிக் வேஸ்ட், இன்னார்கானிக் வேஸ்ட் ப்ளாஸ்டிக் என இது தரம் பிரித்துச் சேர்த்தும் விடுமாம். ரோட்டில் குண்டூசி கூடக் கிடக்க முடியாது . அப்படி சுத்தம் செய்கிறது.

குளிர்காலத்தில் பயன்படுவது மேன் ட்ரக் மெஷின்ஸ். அது கொட்டிக் கிடக்கும் பனியை எல்லாம் வாரி வழித்து எறிந்து விடுமாம். வீடுகளின் அமைப்பையே பாருங்களேன். கூம்பு வடிவக் கூரைகள். அதிலும் ஓடுகள் பதித்தது. இந்த அமைப்பினால்தான் கூரைகளில் படியும் பனி அனைத்தும் கீழே வழியும். சூரியனைக் கண்டதும் உருகி இறங்கவும் வசதி. ஆனால் ரோட்டில் விழும் பனியை இந்த மாதிரி ட்ரக்ஸ் மூலம்தான் சுத்தம் செய்ய முடியும். அதன் பெயர்தான் மேன் ட்ரக் மெஷின்ஸ்.

பாரம்பரிய ஓடுகள் பதிக்கும் முறை அனைத்துக் கட்டிடங்களிலும் உண்டு. இப்படி வைத்தால்தான் அரசாங்கம் வீடு கட்டும் ப்ளானையே அப்ரூவ் செய்யும். இல்லாட்டி பனித்தங்கி தண்ணியா உருகித் தேங்கி வீடே நாஸ்தியாகிரும்ல.

தூரத்தில் கடகடவென ஓடிவந்து எங்கோ கடைப்பக்கம் திரும்புகிறது இந்த ட்ரக்.

பஸ், ட்ராம், சிட்டி ட்ரெயின் , மெட்ரோ, மோனோ ரயில்.

ஜெர்மனி சென்றதும் அங்கே உலாவந்த பஸ், ட்ராம், மெட்ரோ மற்றும் சிட்டி, ஸ்டேட் ட்ரெயின்களில் பயணித்தோம் . சாலையின் நடுவில் ட்ராம் ட்ராக் அமைக்கப்பட்டிருக்கிறது.  இருபுறமும் பேருந்துத் தடம். வித்யாசமான அமைப்பு !. புல்லட் ட்ரெயின்கள் கூட ஓடுவதாகச் சொல்கிறார்கள். பொதுவாகவே மணிக்கு 200 மைல் வேகத்தில் பறக்கும் ட்ரெயின்கள் இவை. 

ரயில் டிக்கட்டை பேரம் பேசி வாங்கமுடியாது என்று ஜோக்கெல்லாம் இங்கேதான் செல்லுபடியாகும். ஆனால் ஜெர்மனியிலும் யூரோப் முழுமையும் டிக்கெட் பாஸ் வாங்கலாம். மேலும் முன்பே பாஸ் வாங்கிவிட்டு மூன்று மாதங்களுக்கு ஸ்டேட் விட்டு ஸ்டேட் குறைந்த விலையில் முன்பே டிக்கெட் புக் செய்து சென்று வரும் வசதியும் உண்டு. 

லீவு நாளில் கார்டுக்கு ரெண்டு பேர் ஏழு மணிக்கு மேல் சிட்டிக்குள் எங்கு வேண்டுமானாலும் சென்று வரலாம். ஃப்ளைட் போல் முன்பே புக் செய்தால் ரயில் டிக்கெட் ஃபேர் குறைவு.

நம்மூரு போல இங்கேயும் பஸ் ட்ரெயின் பாஸ் உண்டு. பஸ்ஸிலும் ட்ரெயினிலும் எல்லாரும் டிக்கெட்டை ஸ்வைப் செய்தபின்தான் போய் அமரவேண்டும். இல்லாவிட்டால் டிக்கெட் செக்கிங் வரும்போது பிரச்சனையாகிவிடும்.

தனித்தனி ட்ராம் ஸ்டாப் , பஸ் ஸ்டேஷன்களில் பரவாயில்லை.  ஆனால் சிட்டி, ஸ்டேட் ஸ்டேஷன்களில் ட்ரயின் எங்கே சென்று எங்கிருந்து வருகிறது என்பதைக் கண்டு கொள்ள கொஞ்சம் மொழிப்பயிற்சியும் ஞானதிருஷ்டியும் அதீத புத்திசாலித்தனமும் வேண்டும். இல்லாவிட்டால் எதிர்திசையில் எங்கேயோ போய் விடுவோம் அர்த்த ராத்திரியில்.

இங்கே பயில வரும் மாணவர்களுக்கு ஃப்ரீ பாஸ் உண்டு. தினமும் மாலை ஏழுமணியிலிருந்தும் வார இறுதியில் இரண்டு நாட்களும் சிட்டிக்குள் ட்ராம், பஸ், ட்ரயினில் சென்று வர நூறு யூரோ டிக்கெட் பாஸ் யதேஷ்டம். இதிலேயே இன்னும் ஒருவரையும் இதே நேரத்தில் மட்டுமே கூட்டிச் செல்லலாம்.

காலை பத்துமணிக்கு மேல் செல்லவேண்டும் என்றால் பணம் கூடுதலாகக் கட்ட வேண்டும்.

இது டூயிஸ்பர்க்கில் வரும் ட்ராம்.

வாசிப்பை வளர்க்கும் ஷாப்பிங் மால்கள் - இன்ஃபர்மேஷன் லைப்ரரி.

ஜெர்மனியிலும் சரி, யூரோப் முழுவதும் சரி. ரயில் நிலையங்களில் ப்ரஸ் & புக்ஸ் என்னும் புத்தகக் கடைகளும், ரெவே, கொடி, அல்டி, லிடில், ரியல், நெட்டோ, போகோ போன்ற ஷாப்பிங் மால்களிலும் பயணப் பாதையில் மோட்டல்களிலுமே  புத்தகக் கடைகளைப் பார்க்கலாம். பாதிக்குப் பாதி ஆஃபரிலும் கூட புத்தகங்கள் கிடைக்கின்றன ! முக்காலே மூணு சதம் அந்தந்த தேசத்தின் மொழிகளில்தான் கிடைக்கின்றன. ஆங்கிலப் புத்தகங்கள் ரொம்பக் கம்மி. ( ஆங்கிலம் மாதிரியே இருக்கும். ஆனால் அது ஜெர்மன், ஃப்ரெஞ்ச், இத்தாலி :) . கட்டுரைகள், த்ரில்லர்கள், ரொமாண்டிக் நாவல்களோடு இங்கே சமையல் புத்தகங்களும் , குழந்தைகளுக்கான நூல்களும் கூட கொட்டிக் கிடக்கின்றன.

ரயிலில் நின்று கொண்டோ உட்காந்து கொண்டோ வாசிப்பவர்களை இந்நாடுகளில் அதிகமும் பார்க்கலாம். இவர்கள் என்னைக் கவர்ந்ததால் அங்கே எடுத்த புத்தகசாலைப் புகைப்படங்களைப் பகிர்ந்திருக்கிறேன். வாசிப்பவர்களை எடுக்க என் கூட வரும் என் மகன் தடா போட்டுவிடுவார்.

இவை அனைத்தும் ஸ்விஸ், இத்தாலி, வெனிஸ், ரோம், போன்ற நகரங்களைக் கடந்து செல்லும்போது இருக்கும் மோட்டல்களில் எடுத்தவை.

இது டிட்லிஸ்ஸிலிருந்து வெனிஸ் செல்லும் வழியில் எடுத்தது.

50 முதல் 70 சதம் வரை ஆஃபர் ! ஆண்ட்ரியா கேமில்லரி  கலெக்‌ஷன்ஸ் அதிகம்.