எனது 24 நூல்கள்

எனது 24 நூல்கள்
எனது இருபத்து நான்கு நூல்கள்

சனி, 19 டிசம்பர், 2020

வீழ்தலின் நிழல் - நூல் திறனாய்வு.

 தமிழர் வாழ்வியல் ஆய்வு அறக்கட்டளையும் சிட்னி தமிழ் வளர்ச்சி மன்றமும் இணைந்து பல்வேறு நூல்களை ஆய்வு செய்கிறார்கள். நம் தோழி திருமதி. பவளசங்கரி தமிழர் வாழிவியல் ஆய்வு அறக்கட்டளையின் நிறுவனர். ஈழத்துக் கவிஞர் திரு. ரிஷான் ஷெரீஃப் அவர்களின் நூலை  (முன்பே வலைத்தளத்தில் விமர்சனம் வெளியிட்டுள்ளேன் ) நூல்களின் நண்பர்களின் குழுமத்துக்காக ஆய்வு செய்யும் வாய்ப்புக் கிடைத்தது. 

ஞாயிறு, 6 டிசம்பர், 2020

நமது மண்வாசமும் பெண்மொழியும்

 நமது மண்வாசம் மதுரையில் இருந்து வெளிவரும் மாத இதழ். தானம் அறக்கட்டளையின் ரிஃப்ளெக்‌ஷன் பதிப்பகத்தின் மூலம் இன்று வரை இடையறாது ஆறாண்டுகளுக்கும் மேலாகப்  பயணம் செய்து சமூக மாற்றத்தை உண்டாக்கி  வரும் இதழ். இதில் கிட்டத்தட்ட 50 இதழ்களுக்கும் மேலாகக் கதை, கவிதை, கட்டுரை எனப் பங்களிப்புச் செய்யும் வாய்ப்புக் கிட்டியது. 





சனி, 28 நவம்பர், 2020

மனத்தின் பேராற்றல் - ஒரு பார்வை.

 மனத்தின் பேராற்றல் - ஒரு பார்வை.

மனத்தின் பேராற்றல்


தனது யோக வாழ்க்கையை அடிப்படையாக வைத்து யோகாசார்யா எஸ் ஜனார்த்தனன் என்பவர் எழுதிய நூல்தான் மனத்தின் பேராற்றல். உடல் நலத்தோடு உள்ள நலனையும் கைக்கொண்டால் மனதின் பேராற்றலை உணரலாம் அதனை செயல்படுத்தலாம் என்கிறார் இவர். மூன்றில் ஒருபங்கு மூளையையே நாம் இதுவரை உபயோகித்து வருகிறோம் என்கிறார். மூளையின் முழுமையான செயல்பாட்டுக்கு இவர் தரும் வழிமுறைகளைப் பார்ப்போம். 

உள்மனம், வெளிமனம், பிரணாயாமம், தியானம், செயல்பாடு என இவர் வடிவமைத்துத் தருகிறார். எல்லாவற்றுக்கு மூல காரணம் உள்மனமே என்பது இவர் கருத்து. அந்த உள்மனத்தின் பேராற்றலை யோகத்தின் மூலம் எப்படி அடையலாம் என்ற கையேடே இந்நூல். 

புதன், 25 நவம்பர், 2020

ஜெகஜ்ஜாலப் புரட்டனும் இரிசி மட்டையும்.

 161. 1731. கமறுதல், காந்துதல், காய்வான்/ள்.. - தாளிக்கும் கார வாசனை பட்டுத்தொண்டையைச் செறுமுதல் கமறுதல் எனப்படும். தீயைக் கொறைச்சு வையி. கமறுது என்பார்கள். மிளகாய்த்துவையல் போன்றவற்றை அம்மியில் அரைத்தால் கை சுடுவதுபோல் காந்தல் = எரிச்சல் எடுக்கும். காய்ச்சல் அடிச்சாலும் தொட்டுப் பார்த்தால் உடம்பு சுடுவதைக் காந்துது என்பார்கள். சட்டியில் அடிப்பிடித்ததையும் காந்தல் என்பார்கள். அடுத்தவர் வாழப் பொறுக்காதவரை அவன்/ள் அடுத்தவுகளைப் பார்த்துக் காய்வான்/ள்( கடுப்பாவான்/ள், எரிச்சலாவான்/ள் , கோபப்படுவான்/ள்)  என்பார்கள். 

1732*நறுங்கிப் போய் - வயசுக்கேத்த வளர்ச்சி இல்லாமல் இருப்பவரை அது நறுங்கிப் போய்க் கிடக்கும் என்பார்கள். 

1733*பாய்ச்சுருட்டு - மெத்தைச் சுருட்டு பாய்ச்சுருட்டு . நான்கைந்து பாய்களை ஒன்றாக அடுக்கிச் சுருட்டிக்கட்டி வைப்பதுதான் பாய்ச்சுருட்டு. 

1734*சிலாகை - மரச்சாமான் பெயர்ந்து வந்தால் சிலாகை வந்திருச்சு என்பார்கள். முள்போல் குத்திவிடும் என்பதாலும் சாப்பாட்டில் விழுந்து விடலாம் என்பதாலும் அது பயன்பாட்டுக்கு ஆகாது என்று அர்த்தம். 

1735*வரட்டுவரட்டுன்னு - வரளித்தனமாக இருப்பது. வரட்டு என்று வெறிச்சோடி இருப்பது. இருப்பதை எல்லாம் சுரண்டி வரட்டி எடுப்பது. 

திங்கள், 23 நவம்பர், 2020

நண்டு

 நண்டு


கடற்கரையோர நகரம் ஒன்றில் வேலை பார்த்து வந்தார்கள் மாலதியின் தம்பிகள். இன்னும் திருமணமாகவில்லை. அவர்களுக்கு சமைத்துப் போட அவர்கள் பாட்டி வீட்டில் இருந்து சிகப்பி அக்காவை அனுப்பி இருந்தார்கள். தன் பிள்ளைகளோடு கோடை விடுமுறைக்குத் தம்பிகள் வீட்டுக்கு வந்திருந்தாள் மாலதி. 

நண்டைச் சுத்தம் செய்து கொண்டிருந்தார் சிகப்பி அக்கா. ”வெள்ளையாத்தானேக்கா இருக்கு இந்த நண்டு. இது எப்பிடி சமைச்சோடனே சிவப்பா ஆகுது ” என்று கேட்டாள் பக்கத்தில் அமர்ந்து நண்டு சுத்தம் செய்வதை வேடிக்கை பார்த்துக் கொண்டிருந்த மாலதி.

“இது கடல் நண்டு. சட்டில போட்டு வதக்குனவோடனே சூட்டுக்கு செவப்பாயிரும். அம்மாப்பொண்ணு இங்க உக்காராதே. சுத்தம் செய்யும்போது பார்த்தாச் சாப்பிட மாட்டே “ என்று சொல்லிக் கொண்டே நண்டின் கால்களைப் பிரித்து ஓட்டை உடைத்து மஞ்சள் பகுதியைக் கையால் தேய்த்துக் கழுவினார் சிகப்பியக்கா.

தண்டட்டிக் காது அசைய அமர்ந்திருந்த சிகப்பியக்கா பேருக்கேற்றாற்போல வெள்ளைச் சிகப்பு. மாலதியின் பாட்டி வீட்டில் கிட்டத்தட்ட 30 வருடமாக சமையல் வேலை செய்தவர். பாட்டி வீட்டுக்கு விடுமுறைக்கு வரும்போதெல்லாம் சிகப்பி அக்காளின் கைவண்ணத்தில் விதம் விதமான உணவுகளை ருசித்திருக்கிறார்கள் மாலதியும் அவள் தம்பிகளும். திடீரென எவ்வளவு பேர் வந்தாலும் அவ்வளவு பேருக்கும் உணவு தயாரிப்பதில் அசந்ததேயில்லை சிகப்பியக்கா.

வேலை ஓய்ந்த பகல்பொழுதுகளிலும் திருகையில் உப்புமாவுக்கு உடைப்பது, குந்தாணியில் சிவப்பரிசி போட்டு உரலால் புட்டு இடிப்பது , சாயங்காலமானால் பச்சரிசி மாவில் தேங்காய் திருகிப் போட்டு சீடை உருட்டுவது, கயிறில் கோர்த்து உப்புக்கண்டம் காயப்போடுவது, வற்றல் போடுவது  என ஏதாவது செய்து கொண்டே இருப்பார். ஒருநாள் கூட மதியத்தில் அந்த அக்கா ஓய்ந்து உறங்கிப் பார்த்ததேயில்லை மாலதி.