செவ்வாய், 23 டிசம்பர், 2014

ரோல் மாடல் என்னுடைய பார்வையில்:-



ரோல் மாடல் என்னுடைய பார்வையில்.:-

வாழ்க்கையில் சாதிக்கத்துடிக்கும் அனைவருக்கும் ஏதோ ஒரு கட்டத்தில்  யாராவது ஒருத்தர் ரோல் மாடலாக இருந்திருப்பார்கள். சிலருக்கு அவர்கள் குடும்பங்களில் இருப்பவர்களே ரோல்மாடல்களாக இருப்பார்கள். சிலருக்கு சாதனை புரிந்தவர்கள். வெற்றிபெற்ற ஒவ்வொருவரின் பின்னும் ரோல்மாடல்களின் பங்கு கட்டாயம் இருக்கும்.

இந்நூலில் தம் உழைப்பால் உயர்ந்து முன்னுக்கு வந்த 21 பேரின் சாதனைக் கதைகள் ரோல்மாடல்களாக விரிகின்றன நம் கண்முன்னே. முன்மாதிரிகள் என்பவர்கள் எப்படியும் இருக்கலாம்தானே. அது போல் இந்நூல் பலதரப்பட்ட மனிதர்களையும் அவர்களின் வெற்றிக்கதைகளையும் கூறுகிறது.

சூழ்நிலையைக் கடந்து முன்னேற நினைத்தவர்கள், உடற்கூறின் இயலாமையைக் கடந்து முன்னேற நினைத்தவர்கள், சுற்றுச்சூழலின் மேல் அக்கறை கொண்டவர்களைப் பற்றி அவர்கள் மொழியிலேயே பேசிச் செல்கிறது .

இயற்கை வேளாண் பொருட்களை உற்பத்தி செய்யும் மரைன் இஞ்சினியர் ரூசோ, சாஃப்ட்வேர் வேலையை விட்டுவிட்டு குப்பைத்தொட்டி.காம் ஆரம்பிச்ச சுஜாதா, குடிசைவாழ் குழந்தைகளின் வாசிப்புத்திறனை மேம்படுத்திய தாமோதரன், சகோதரி அமைப்பின் மூலம் வழிகாட்டும் திருநங்கை கல்கி, அமெரிக்கா செல்லும் வாய்ப்பையும் விட்டுவிட்டு தந்தையின் எண்ணெய் வியாரத்தை ஏற்றத்துக்குக் கொண்டுவந்த சாந்தி, மாற்றுத் திறனாளியாக இருந்தும் கால்பந்தில் சாதித்த முருகசாமி, டிஸ்லெக்சியா குறைபாடையும் மீறி வருமானவரித்துறையின் துணை இயக்குநராக மின்னும் நந்தகுமார், பைக் ரேஸர் சாம்பியன் சித்ரப்ரியா,பார்வையற்றும் ஆன்லைனில் ஆங்கிலப்பயிற்சி, தொடர்புத்திறன் பயிற்சியளிக்கும் பேராசிரியர் இளங்கோ, தடகள வீராங்கனை காயத்ரி, மாற்றுத்திறனாளியாக இருந்தும் மாற்றுத் திறனாளிப் பெண்களுக்காக சுய உதவிக்குழு ஆரம்பித்துப் பயிற்சி அளித்து வரும் அமுத சாந்தி, பிஸியோதரஃபி படித்துவிட்டு ஆட்டுப் பண்ணையும் இயற்கை விவசாயமும் செய்யும் வெங்கடேஷ், பார்வையிழந்தும் தன்னம்பிக்கை இழக்காமல் ஐபிஎம்மில் சர்வீஸ் லீடராகப் பணிபுரியும் காமராஜ், நரிக்குறவர் இனத்தில் பிறந்து முதல் பொறியியல் பட்டதாரியான ரஜினி, பழைய பேப்பரைத் தரம்பிரித்து சப்ளை செய்யும் யூனிட் நடத்தும் சந்தானகிருஷ்ணன், கால்பந்தாட்ட வீராங்கனை வித்யாவதி, பக்தி வழிப் பசுமையைக் கொண்டுவந்த இயற்கை செயற்பாட்டாளர் ரமேஷ் கருப்பையா, பாரம்பரிய நெல் ரகங்களை மீட்டுப் புத்துயிர் கொடுத்துவரும் ஜெயராமன், சாஃப்ட்வேர் தொழிலை விட்டுவிட்டு நாட்டு மாடுகளை மீட்கும் முயற்சியில் வெற்றி பெற்றிருக்கும் சண்முகம், அதேபோல வருட வருமானம் 70 லட்சம் வரக்கூடிய சாஃப்ட்வேர் வேலையை விட்டுவிட்டுத் தன்னுடைய தேனூரை மாதிரி கிராமமாக மாற்றிய செந்தில், ஏரிகளைப் புனரமைக்கும் அருண் கிருஷ்ணமூர்த்தி, ஆகிய எல்லாரும் உழைப்பின் உயர்வையும் வெற்றியின் ரகசியத்தையும் சொல்றாங்க. தொடர்ந்த உழைப்பும் திட்டமிட்ட உழைப்பும் ஜெயிக்கும்னு.

இவர்கள் அனைவரும் 30 வயதுகளில் இருந்து அதற்கு மேலும் உள்ள வயதுகளில் இருப்பவர்கள். லட்சக்கணக்கில் வருமானம் வரக்கூடிய மென்பொறியியல் துறையைக்கூட விட்டுவிட்டு, அது தரும் சலுகைகளையும் அயல்நாட்டுப் பயணங்களையும் , சொகுசான வாழ்க்கையையும் விட்டுவிட்டு நம் மண்ணில் உள்ள தொழில்களைச் செய்வதில் ஆத்மதிருப்தியும் அதன் மூலம் பெரும் வருமானத்தையும் பெற்று வெற்றி பெற்றவர்கள்.

இவர்கள் ஒவ்வொருவரின் உழைப்பின் பின்னும் சமூக நலனும் அக்கறையும் மிளிர்கிறது. தம் மனோதிருப்திக்காக உழைக்கும் அதே நேரம் சமூகததையும் உயர்த்தும் இவர்கள் சேவை போற்றுதலுக்குரியது.

எந்தத் துறையானாலும் ஈடுபாடும் உழைப்பும் அர்ப்பணிப்பும் இருந்தா ஜெயிக்க முடியும்னு சொல்றாங்க இந்த ரோல் மாடல்ஸ். காரைக்குடி புத்தகத் திருவிழாவில் 2013 பிப்ரவரியில்  வாங்கின இந்த நூலை இப்பத்தான் படிக்க சந்தர்ப்பம் வாய்த்தது. இப்பவாவது சந்தர்ப்பம் கிடைத்ததே என்று இந்த நல்ல விவரங்களை எல்லோருடனும் பகிர்வதில் மகிழ்கிறேன்.

படிச்சுப் பாருங்க. எது செய்தாலும் ஜெயிப்போம்னு தன்னம்பிக்கை ஊற்றெடுக்கும்.

நூல் :- ரோல் மாடல்
ஆசிரியர் :- வெ. நீலகண்டன்..
பதிப்பகம். :- சூரியன்
விலை :- 75.

டிஸ்கி :- இந்த விமர்சனம் ஜூன் 15 , 2014 திண்ணையில் வெளியானது.

7 கருத்துகள் :

வல்லிசிம்ஹன் சொன்னது…

அருமையான தொகுப்பு தேனம்மா.படிக்கவே தெம்பாக இருக்கிறது.

yathavan nambi சொன்னது…

"இவர்கள் ஒவ்வொருவரின் உழைப்பின் பின்னும் சமூக நலனும் அக்கறையும் மிளிர்கிறது. தம் மனோதிருப்திக்காக உழைக்கும் அதே நேரம் சமூகததையும் உயர்த்தும் இவர்கள் சேவை போற்றுதலுக்குரியது".

இந்த ஒரு உண்மையான விமர்சனக் கருத்துஒன்றே போதும்
நூலின் சிறப்பை அனைவரும் உணர்ந்து கொள்வதற்கு,

நூலினை படிக்க விருப்பம்!
நூலினை பெறுவதற்கு ஏற்பாடு செய்து விட்டேன்.

எப்படி நல்லதை விமர்சன்ம் செய்ய வேண்டும் என்பதுக்கு "இந்த பதிவு ஒரு "ரோல் மாடல்"
நன்றி!
புதுவை வேலு
www.kuzhalinnisai.blogspot.fr

yathavan nambi சொன்னது…


வணக்கம்!

"உப்பிட்டவரை உயிர் உள்ள வரை நினை" - இது பழமொழி
"உணவிட்ட விவசாயிகளுக்கு, வாழ்த்தும், நன்றியும் சொல்வதற்கு
"குழலின்னிசை"- வலைப் பூ பக்காமாய் வாருங்களேன்!

"இன்று விவசாயிகள் தினம்" (23/12/2014)

நன்றி!

புதுவை வேலு
www.kuzhalinnisai.blogspot.fr

திண்டுக்கல் தனபாலன் சொன்னது…

முன்னேற்றம் தரும் நூல் அறிமுகத்திற்கு நன்றி சகோதரி....

Jaleela Kamal சொன்னது…

அருமையான அறிமுகம் வாழ்த்துக்கள்

Thenammai Lakshmanan சொன்னது…

நன்றி வல்லிம்மா :)

நன்றி புதுவை வேலு சகோ. உங்கள் குழலின்னிசை வலைத்தளம் வந்தேன் அருமை.

நன்றி தனபாலன் சகோ.

நன்றிடா ஜலீலா :)

Thenammai Lakshmanan சொன்னது…

வலைப்பதிவர் ஒற்றுமை ஓங்கட்டும். !
என்றும் நம்முள் வலிமை பெருகட்டும். !

கருத்துரையிடுக

சும்மா ( பத்தி ) உங்க கருத்தையும் பதிவு செய்ங்க :)

Related Posts Plugin for WordPress, Blogger...