**கோட்டை கொத்தளங்கள்
சிதறிக் கிடக்கின்றன.
இடுவல்களின் உள்ளே
பத்திரமாயிருக்கிறது
சிறுகுருவிகளின் கூடு.
** அளவுகதிகமாகவே வழங்கிவிட்டாய்
உப்புக்கண்ணீர் வடிக்கின்றன
நன்றிமிகு கண்கள்.
** தொலைத்துத் தொலைத்துத்
தேடுகிறாய்
தொலைந்து தொலைந்து
கிட்டித் தொலைக்கிறேன்.
** கவலைத் துளிகளைத் திருடிக்
கண்ணீர் வடிக்கிறாய் மேகமாய்
பரிதவித்து நனைகிறேன் பசும்புல்லாய்.
** மறைந்தும் குறைந்தும்
காணாமல் போய்விடுகிறாய்
நிலவே
உன்னைத் தேடித் தேடிக்
கண்டுபிடிக்கும்போது
அமாவாசை வந்துவிடுகிறது
அசந்தர்ப்பமாய்.
**மழை முழுக்காட்டில்
முழுக்க நனைந்துவிடுகின்றன
இலையின்கீழ் ஒளிந்துள்ள பூக்களும்.
**இருக்கும் இடத்தை வெட்டி
இல்லாத இடத்தில் பதியமிடுவது
அரேஞ்ச்ட் மேரேஜ்
இருக்கும் இடத்திலிருந்து
இல்லாத இடத்திற்கு
மகரந்தம் பறப்பது
லவ் மேரேஜ்
**கரங்கள் கூப்பினாலும்
கள்ளத்தனத்தையும்
குள்ளநரித்தனத்தையும்
காட்டிக்கொடுத்துவிடுகின்றன கண்கள்.
**திசையறியாது பறந்து
முகத்தில் மோதிய
வண்ணத்துப்பூச்சியால்
வண்ணமயமாகிவிட்டதாக
நினைத்துக் கொள்கிறது
கோவேறு கழுதை
**ஒன்றைத் தொட்டு ஒன்றெனப்
பலவற்றின் பின் திரிந்த வண்டு
அடிபட்டுவிடுகிறது
கதவடைத்த வீட்டின் ஒளி ஈர்க்க
ஜன்னல்வழி நுழையும்போது.
கருத்துகள் இல்லை:
கருத்துரையிடுக
சும்மா ( பத்தி ) உங்க கருத்தையும் பதிவு செய்ங்க :)