ஈஃபில் டவரிலிருந்து ஒரு பருந்துப் பார்வை

 கோடிக்கணக்கான உல்லாசப் பயணிகளை ஈர்த்த ஈஃபில் டவரில் ஏறி பாரீஸ் மாநாகரத்தைப் பருந்துப் பார்வையில் பார்க்கும் வாய்ப்புக் கிடைத்தது யூரோப் டூரின் போது. நான் பார்த்த இடங்களை என் காமிராக் கண்ணின் மூலம் நீங்களும் பார்க்கலாம் வாங்க. 

வருடா வருடம் கோடிக்கணக்கான பயணிகளை ஈர்க்கும் ஈஃபில் 2019 இல் எங்களையும் வரவேற்றது. இதுதான் ஈஃபிலின் முதல் தளம். நல்ல உறுதியான எஃகிரும்பினால் வார்க்கப்பட்ட இரும்புத்தளவாடங்கள், இரும்பு ஆணிகள் கொண்டு பகுதி பகுதியாக செய்யப்பட்டு இங்கே கொண்டு வந்து பொருத்தப்பட்டிருக்கு. 

இரவில் மின்னும் ஈஃபில் டவர்

ILLUMINATION OF EIFFEL TOWER. இதைத்தான் நாங்க அந்த இரவில் பார்த்தோம்.

பாரீஸ் பை நைட் நிகழ்ச்சியில் இதைப் பார்த்தோம். 

நள்ளிரவில் முழு ஈஃபில் டவரும் ஜொலி ஜொலித்தது ஐந்து நிமிடம். ஸீன் நதியில் அதன் அழகுக் காட்சி ஜாஜ்வல்யமாக மிக மிக அருமை. கோடி மின்னலைக் கொட்டியது போல், மில்லியன்கணக்கில் மின்மினிகள் மொய்த்தது போல் இருந்தது அக்காட்சி. 

தூரத்தே புனித பேதுரு பேராலயத்தின் குவிமாடம் தெரிகிறது. 

ஈஃபில் டவர்

ஒரு சாதாரண வானொலி ஒலிபரப்பி உலகப் புகழ் பெற முடியுமா ? பெற்றிருக்கிறதே. பிரான்ஸின் பாரிஸில் உள்ள இந்த ஈஃபில் டவர்தான் அந்தப் புகழுக்கு உரியது. 1930 வரை உலகின் மிகப்பெரிய கோபுரம் என்ற பெருமையையும் பெற்றிருந்தது இது. 

யூ ரோப் டூரின் எட்டாம் நாள் மாலை நாங்கள் பாரீஸ் வந்தடைந்தோம். பொன்னிற வெய்யிலில் வெள்ளி நிறத்தில் தகதகத்து நின்றிருந்தது ஈஃபில் டவர். அதில் ஏறிப் பார்க்க 18 யூரோ கட்டணம் ஒரு நபருக்கு. 

ஸ்டார் ட்ராவல்ஸின் டூரில் முன்பே பணம் செலுத்தி விட்டதால் அங்கே போய் கிட்டத்தட்ட ஒரு மணி நேரம் க்யூவில் நின்று மேலே மின் தூக்கி மூலம் சென்று வந்தோம். முதல் தளம் வரையே போக முடிந்தது. இரண்டாம் தளத்திற்குச் செல்ல அன்று அனுமதி கிடைக்கவில்லை. எனவே அதற்கான பணத்தை ஸ்டார் ட்ராவல்ஸார் திருப்பி அளித்தார்கள். 

கொஞ்சம் வித்யாசமான அனுபவம்தான். ஏறும்வரை லிஃப்டில் - ஓடிஸ் கம்பெனியின் எலிவேட்டரில்  - விஞ்ச் போல் உள்ளது . இதில் அமர்ந்து  பின்புறமாக மேலேறிச் சென்றோம். 

பாட்டிக்ஸ் மௌச்சஸ் - 4

 கெனால்ஸ் செயிண்ட் மார்ட்டின் என்ற கால்வாயின் ஸீன் நதியுடன் இணைகிறது. இந்தப் படகுசெல்லும் பாதை நகரைப் பிளக்கும் ஸீன் நதியின் ஏதோ ஒரு கால்வாய் என்றுதான் தோன்றுகிறது. 

ஜீன் ப்ரூயல் என்பவரால் 1917 இல் இந்தப் படகுப் போக்குவரத்து ஆரம்பிக்கப்பட்டதா சொல்றாங்க. இந்தப் படகுகளை ஃப்ரான்ஸின் மூன்றாவது பெரிய நகரமான லையன் என்கிற படகுத் துறைமுகத்துல தயாரிக்கிறாங்களாம். 

இதன் அப்பர் டெக்கில்தான் பயணிகளை அமரவைத்துக் கூட்டிட்டுப் போறாங்க. மழை போன்றவை வந்தால்தான் லோயர் டெக்கில். இது பக்கவாட்டுகளில் மூடி இருக்கும். இந்தப் படகுப் போக்குவரத்துல நகரின் முக்கிய அம்சங்கள், கட்டிடங்கள், நிகழ்வுகள் , பற்றிப் பதிவு செய்யப்பட்ட ரன்னிங் கமெண்டரி போடுறாங்க.  

எங்க கூட யூரோப் டூர் வந்தவுங்க. ஓரத்தில் இருப்பவர்கள் நார்த் இந்தியா & கன்னடா. அடுத்து நிற்கும் பர்தா அணிந்த தோழி சென்னைதான் ஆனால் மூவரும் வசிப்பது அமெரிக்கா. ரோஸ் சூடி மற்றும் அவர் பக்கம் இருக்கும் இளம் பெண்கள் அவர்களது மகள்கள் வசிப்பது ஆந்திரா. என் பக்கம் நிற்பவர் இந்தூர் டாக்டர். 

பாட்டிக்ஸ் மௌச்சஸ் - 3

 ஏற்கனவே இரண்டு சுற்று ஸீன் நதியின் மேல் வந்திருக்கிறோம். வாங்க மூணாவது சுற்றும் போய் வருவோம். 

வான்கூவர், லூவர், மியூசியங்கள் , பிர்லா ஹவுஸ், ஈஃபில் டவர், சுதந்திர தேவி சிலை , அலக்ஸாண்டர் 3 ப்ரிட்ஜ் ம் பாண்ட் நியூஃப்,  ஓர்ஸே மியூசியம், நெப்போலியனைப் புதைத்த இடம், லே இன்வாலிட்ஸ் என்ற இடம்  இதெல்லாம் இந்த பாட்டிக்ஸ் மௌச்சஸ் என்னும் பறக்கும்படகில் போகும்போது பார்க்கலாம். 

அதோ தெரியுதுல்ல . மண்டபம் போல ஒண்ணு. அதுதான் பாட்டிக்ஸ் மௌச்சஸ் எனப்படும் பறக்கும் படகுகளின் துறைமுகம். பின் பக்கம் தெரிவது வெயிட்டிங் ஹால். 

பாட்டிக்ஸ் மௌச்சஸ் - 2.

 ஃப்ரான்ஸ் சென்றிருந்த போது பாரீஸில் “பாட்டிக்ஸ் மௌச்சஸ்” என்னும் பறக்கும் படகில் சென்றது குறித்து முன்பே எழுதி இருக்கிறேன். மிக வித்யாசமான அனுபவம் அது. ஒர்ஸே மியூசியம், லூவர் மியூசியம், நாட்டர்டேம் கதிட்ரல் , ஈஃபில் , சுதந்திர தேவி சிலை, பல்வேறு கட்டடங்கள்,  பாலங்களைக் கண்டு களிக்கலாம். 

1870 இல் ஃப்ரான்கோ- ப்ருஷ்யன் போரில் காயம் பட்ட வீரர்களை ஆம்புலன்ஸின் வேகத்துடன் பறந்து சிகிச்சைக்குக் கொண்டு சென்றதால் இப்படகுகளுக்குப் பறக்கும் படகுகள் என்று பெயர். இதற்கு ரெட் கிராஸின் மெடல்களும் வழங்கப்பட்டிருக்கு ! 

ஃப்ரான்ஸில் ஓடும் நதியின் பெயர் ஸீன். 

பாட்டிக்ஸ் மௌச்சஸ் - 1

 பாட்டிக்ஸ் மௌச்சஸ் என்னும் பறக்கும் படகுகளில் ஃபிரான்ஸ் சென்றிருந்தபோது பயணம் செய்தோம். சுமார் 200 பேர் டெக்கில் அமர்ந்து ஸீன் நதியின் மேல்  பயணித்த அனுபவம் மறக்க முடியாதது. லே மிஸரபிள்ஸ் என்ற விக்டர் ஹியூகோவின் நாவல் எல்லாம் ஞாபகம் வந்தது. 

அங்கே இருக்கும் சுதந்திர தேவி சிலைதான் முதலும் மூலமுமான சிலை. அமெரிக்காவில் இருப்பது அதன் பிந்தான் நிர்மாணிக்கப்பட்டது என்றார்கள். 

நோவோட்டல் மாஸ்ஸி பாலஸ்ஸோ. NOVOTEL MASSY PALAISEAU.

யூரோப் டூரின் எட்டாம் நாள் தங்கிய ஏழாவது ஹோட்டல் இது. பாரீஸில் இருக்கும் இந்த ஹோட்டல் நோவோட்டல் ஹோட்டல்களின் குரூப் ஹோட்டல்.

அன்று இரவு பாரீஸ் பை நைட் பார்க்கச் சென்றதால் முதலில் உணவருந்திவிட்டு ஊரைச்சுற்றிப் பார்த்துவிட்டு அதன் பின் ஹோட்டலுக்கு உறங்கச் சென்றோம்.

7 ஹோட்டல்ஸ் & ஃபிட்னெஸ். 7 HOTELS & FITNESS.

யூரோப் டூர் செல்வதென முடிவான பின் பல்வேறு டூர்ஸ் & ட்ராவல்ஸை செக் செய்து ஸ்டார் டூர்ஸில் போவதென முடிவாயிற்று. ஆனால் அது லண்டனில் இருந்து புறப்பட்டு ஃபெரி வழியாக கடலைக் கடந்து பெல்ஜியம் வந்து அதன் பின் எல்லா தேசமும் சுற்றி வரும். ஆனால் பெல்ஜியத்தில் ஏறிக் கொண்டாலும் லண்டனில் இருந்து புறப்பட்டு லண்டனுக்குத் திரும்பச் செல்லும் பயணப்படியைச் செலுத்தியே ஆக வேண்டும்.

நாம் ஜெர்மனியில் இருந்து புறப்படுவதால் ப்ரெஸில்ஸில் இருந்து பிக் அப் பாயிண்ட் குறித்து அனுப்பிப் புறப்பட்டோம். டூர் அனுபவங்கள் தனியாக எழுதுவேன் இந்தத் தொடரில் ஸ்டார் டூர்ஸ் & ட்ராவல்ஸ் எங்களைத் தங்க வைத்த ஹோட்டல் பற்றிய அனுபவங்களைத் தொடர்கிறேன்.

நாங்கள் சென்ற மெர்ஸிடிஸ் பென்ஸை கோச் என்று குறிப்பிடுகிறார்கள். ( டூர் முழுக்க அழைத்துச் செல்பவர் டூர் மேனேஜர் - இவர் பெயர் சந்தோஷ் ராகவன், கோச்சை ஓட்டிச் செல்லும் ட்ரைவரை கேப்டன் என்று அழைக்கிறார்கள். இவர் பெயர் கிறிஸ்டியன். )

இந்த கோச்சுகளில் முழுக்க முழுக்க ஏசி வசதியும் பாத்ரூம் டாய்லெட்டும் கூட உண்டு. டிவிடி பார்க்கலாம். விசிறி மடிப்பு திரைச்சீலைகள், செமி ஸ்லீப்பர் ஸீட்டுகள், ஸீட் பெல்ட் கட்டாயம் போடணும். ( 100 கிமீ வேகத்துக்கு மேல இஞ்ச் கூட அதிகமா போக மாட்டாங்க இருந்தும் :)

ஃப்ளைட் போல லக்கேஜுகளை ( ஒரு ஆளுக்கு 20 கிலோ அலவ்ட் ) பேக் பேக் 5 கிலோ இருக்கலாம்.  நெக் பில்லோ, கையுறை, காலுறை, இரண்டு ஸ்வெட்டர்கள், கோட் இதெல்லாமே மூன்று நான்கு கிலோ வந்துவிடும். டாப்லெட் ( சாம்சங் ) ஒரு கால் கிலோ இருக்கலாம். நொறுக்குத்தீனிகள், வாட்டர் பாட்டில், ஒவ்வொரு சீட்டுக்கும் குப்பை போட பைகள்.இத்யாதி.

சரி வாங்க நாம ப்ரெஸில்ஸில் அட்டாமியம், மினி யூரோப் பார்த்துட்டு இரவு தங்க 7 ஹோட்டல்ஸுக்கு போவோம். இது இல்க்ரிச், ஸ்ட்ராஸ்பர்க், ஃப்ரான்சில் இருக்கு.

பத்து மணிக்கு உள்ளே நுழைந்தோம். மர்லின் மன்றோ வரவேற்குறாங்க நம்மை. ( எப்பவுமே ஹோட்டல்களுக்கு இரவு விசிட்தான் பகல் பூரா நகர்வலம் ). இந்தியன் வகை உணவு சுடச் சுடத் தயாரா இருந்தது. போய் வெட்டுமுன்னாடி ரூமை ஒரு க்ளிக்.

இதுக்கு கிங் பெட்னு பேரு. இதுக்கு எதிர்த்தாற்போல் ஒரு பெட் . மூன்று பேர் தங்கினால் இதில் படுத்துக் கொள்ளலாம். இது இரவில் பெட் பகலில் இதை மடித்தால்  சோஃபா.