நற்கதி அடைந்த நாககுமாரன்
விரதம் நோற்பதால் ஒருவன் மறுஜென்மத்தில் அளவிடற்கரிய
ஆற்றலையும் பெறற்கரிய பேறையும் அடைய முடியுமா. நாகபஞ்சமி என்றொரு விரத்தத்தை
முற்பிறவியில் மேற்கொண்ட நாகதத்தன், நாகவசு இருவரும் தம் மறுபிறப்பிலும்
இணைந்தனர். அதிலும் நாகதத்தன் எண்ணியது எல்லாம் அவனுக்கு வாய்த்தது. அப்படிப்பட்ட
நாகதத்தன் நாககுமாரன் ஆன வரலாற்றைப் பார்ப்போம் வாருங்கள் குழந்தைகளே.
நாவலந்தீவில் பரதக்கண்டம் உள்ளது. அதில் மிகச் சிறப்பு வாய்ந்தது மகத தேசம். அங்கே கனகபுரம் என்றொரு நகரம் இருக்கிறது. அதில் குயில்கள் கூவும் சோலைகளில் தேன் சிந்தும் மலர்கள் பூத்துச் சிரிக்கும். இவ்வளவு அழகுபொலிந்த கனகபுரத்தைச் சயந்திரன் என்ற அரசன் ஆண்டு வந்தான். இவனுடைய மனைவியின் பெயர் விசால நேத்திரை. இவர்கள் இருவருக்கும் பிறந்த இளவரசன் பெயர் சீதரன். தன் ஆட்சியை நல்லபடி நடத்திச் செல்லச் சயந்தரனுக்கு வாய்த்த நல் அமைச்சனின் பெயர் நயந்திரன்.
