அழகர்களும் அழகிகளும் அறுவை சிகிச்சைகளும்:-

அழகர்களும் அழகிகளும் அறுவை சிகிச்சைகளும். :-

அழகர்களும் அழகிகளும் அறுவை சிகிச்சைகளும்

 MISSION IMPOSSIBLE ,FACE OFF போன்ற படங்களில் அதன் நாயகர்கள்  ஜான்  ட்ரவால்டோ & நிக்கலஸ் கேஜ், டாம் க்ரூஸ் ஆகியோர் முகமூடி போல முகத்தை மாற்றிக்கொள்வதைப் பார்த்து அசந்திருக்கிறேன். மூக்குச் சீரமைப்புச் செய்துகொண்ட பிறகு நடிகை ஸ்ரீதேவி ஹிந்திப்பட உலகையே ஒரு கலக்கு கலக்கினார். ஆனால் யதார்த்தத்தில் அவ்வளவு சுளுவானதல்ல முகச்சீரமைப்பு அறுவை சிகிச்சை என்பது.  மைக்கேல் ஜாக்சனுக்கு ஒரு நடனப் பயிற்சியில் மூக்கு உடைந்துவிட அதனால் அவர் ஒரு முகச்சீரமைப்பு சிகிச்சை செய்துகொண்டார். அதில் சுவாசிப்பதில் தொந்தரவு ஏற்பட மீண்டும் ஒரு  மறுசீரமைப்பு சிகிச்சை என அடுத்தடுத்த சிகிச்சைகள் செய்து கொண்டார். ஆனால் இயல்பாய் அவர் ஆடிய பழைய பாடல்களில் இருக்கும் ஒரு வெகுளித்தனமான அழகு புதுமுகத்தில் காணாமல் போய் இருந்தது. அதே நடனத்திறமைதான் என்றாலும் ப்ளாஸ்டிக் சர்ஜரியின் மூலம் அழகான பூரணமான முகத்தைப் பெறலாம். ஆனால் அதே போன்ற எளிமையான கொள்ளை கொள்ளும் அழகும் தோல் மென்மையும் மாறக்கூடும். 

தீபிகா படுகோனே போல மூக்கு வேண்டித் தன்னுடைய பெரிய மூக்கை சீர்திருத்திக் கொள்ள 24 வயது  கிருத்திகா செலவழித்தது  நான்கு மாதங்கள் மற்றும் ஒரு லட்ச ரூபாய்.  தன் வருங்காலக் கணவரின் ஆசைப்படி மணப்பெண் ப்ரியா திருமண நாளன்று சிரிக்கும்போது தன் கன்னத்தில் அழகாகக் குழி விழ டிம்பிள் கிரியேஷன் சர்ஜரி செய்து கொண்டிருக்கிறார். இதற்காக அவர் செலவழித்தது 75,000 ரூபாய். பெங்களூரில் இரண்டு வருடங்களாக மென்பொறியாளராகப் பணியாற்றும் பிரிஜோஷ் தன் திருமண நாளன்று சிறப்பாகத் தெரியவேண்டும் என்று முடி மாற்றுச் சீரமைப்புச் சிகிச்சை  செய்து கொண்டிருக்கிறார்.  இவைகளை ஏன் செய்துகொள்கிறார்கள் என்று பார்த்தோமானால் தற்காலிகமாக அழகாகத் தோன்ற மட்டுமல்லாது அந்த அழகை நிரந்தரமாக உடலின் அங்கமாக மாற்றவும்தான்.

ப்ளாஸ்டிக் சர்ஜரி என்றால் சிற்பம் செதுக்குவது போல வடிவமைத்தல்/ சீரமைத்தல்.  பலரும் நினைப்பது போல இது ப்ளாஸ்டிக்கை வைத்துச் செய்யப்படுவதல்ல. இது ப்ளாஸ்டிக்கோஸ் என்ற க்ரேக்கச் சொல்லில் இருந்து உருவானது. இதன் அர்த்தம் சிதைந்த திசுக்களை செப்பனிடுவது. தோல், கொழுப்பு, தசை, குருத்தெலும்பு, எலும்பு போன்ற பாகங்கள் அவரது உடம்பிலிருந்தே எடுக்கப்பட்டு பாதிக்கப்பட்ட பாகத்தை சீரமைக்கப் பொருத்தப்படுகிறது.  அவ்வாறு அவரிடமே எடுக்க இயலாத நிலையில் நன்கொடையாளரிடம்  தானம் பெற்று சீரமைக்கப்படுகிறது. தற்காலத்தில் சிலிக்கான் போன்ற செயற்கைப் பொருட்களும் ப்ரெஸ் சிலிக்கான் ஜெல்லும் உபயோகப்படுத்தப்படுகின்றன.

ப்ளாஸ்டிக் சர்ஜரி என்பது சீரமைப்பு அறுவை சிகிச்சை. விபத்து  தீயினால் ஏற்பட்ட காயம் அல்லது பிறப்பில் ஏற்பட்ட ஊனம், காயம், அல்லது தழும்பை சீர் செய்யப் பயன்படுகிறது. புற்று நோய், தொற்று நோய், கட்டிகள் சீரமைப்பு. கட்டி நீக்கம், குதறியகாயம் சரிசெய்தல், வடு சரிசெய்தல், கையில் அறுவை சிகிச்சை, மற்றும்  மார்பகச் சீரமைப்பு ஆகியன. காஸ்மெடிக் சர்ஜரி உடம்பின் குறைபாடு உள்ள பகுதியை அதிகமாக்கியோ, குறைத்தோ மறுபதிப்பு செய்ய உதவுகிறது. நிறைய புதுமைகள் கண்டுபிடிக்கப்பட்ட இரண்டாம் உலக யுத்தத்துக்குப் பின்னான காலகட்டம்தான் இதன் பொற்காலம் எனலாம். ஹெரால்டு கில்லீஸ் தான் ’புதுயுக அறுவை சிகிச்சையின் தந்தை’ என்று அழைக்கப்படுகிறார்.

அவுலஸ் கோர்நேளியஸ் செல்சஸ் என்ற ரோமன் அறிஞர்தான் முதன்முதலில் இதன் உத்திகள் மற்றும் சிகிச்சைகளைப் பதிவு செய்தவர். இந்தியாவில் முக/உடல்சீரமைப்பு சிகிச்சையும் கண்புரை அறுவை சிகிச்சையும்  கி.மு, ஆறாம் நூற்றாண்டுக்கு முன்பே ( 600 B.C. )"சுஸ்ருதர்" என்பவரால் செய்யப்பட்டு வந்தது. எனவே" சுஸ்ருதர்"தான் "இந்தியாவின் உறுப்பு மாற்று அறுவை சிகிச்சையின் தந்தை" எனலாம். இவருடைய மருத்துவ முறை “சுஸ்ருதர் சம்ஹிதை” என்ற பெயரில் தொகுக்கப்பட்டுள்ளது. முன்நெற்றியில் உள்ள தோலை எடுத்து மூக்கை சீரமைக்க அவர் பயன்படுத்திய முறை சிறப்பானது. அது இன்றும் “INDIAN FOREHEAD FLAP RECONSTRUCTION OF THE NOSE." என்று அழைக்கப்படுகிறது. ஏனெனில் யுத்தத்தின்போது நிறைய வீரர்கள் மூக்கு அறுக்கப்பட்டுத் தண்டிக்கப்பட்டார்கள். அவர்களுக்கு சுஸ்ருதரின் இந்த முறை வைத்தியம் மிக வரப்ரசாதமாக அமைந்தத 

சிறுவயதில் தீக்காயத்தால் பாதிக்கப்பட்ட ரம்யாதேவி  இதுவரை தன் முகச் சீரமைப்புக்காகப் பல லட்சரூபாய் செலவோடு கிட்டத்தட்ட 45 அறுவை சிகிச்சைகளை மேற்கொண்டுள்ளார். இது பல அடுக்கு சிகிச்சைகளைக் கொண்டது. முதலில் பாதிக்கப்பட்ட இடத்தில் உள்ள புண்ணைக் குணப்படுத்துதல், அதன் பின் தசைகளையும் உயிரணுக்களையும் உருவாக்குதல். அதன் பின் புதுத் தோலை வளரச்செய்தல் என . இது சில மாதங்களில் இருந்து பல வருடங்கள் பிடிக்கும் ஒரு சிகிச்சையாகும்.

பொதுவாக ஆளுமையை மேம்படுத்த, தன்னம்பிக்கையைப் பெற, அழகை அதிகரிக்க, சுய மதிப்பீட்டை அதிகரிக்க, தாழ்வு மனப்பான்மையை நீக்க , தோற்றத்தை மேம்பாடு செய்ய, வயதான அறிகுறிகள் நீங்க செய்யப்படும் இச்சிகிச்சைகள் உடல் குறைபாடுகள், பிறப்புக் குறைபாடுகள், உதட்டுப் பிளவு, அன்னப் பிளவு, கை குறைபாடு ஆகியவற்றை நீக்குவதோடு முகப்பரு, மங்கு மச்சம் நீக்குதல், உச்சந்தலை புனரமைப்பு ஆகியவற்றுக்காகவும் செய்யப்படுகின்றன.  அதிர்ச்சி, காயம், நோய் மூலம் வரும் குறைபாடுகள் நீக்கவும்., தொற்றுக் கட்டிகள், புற்று, கழலைகள்,ஆகியவற்றையும் நீக்கவும் அறுவைசிகிச்சை செய்த தழும்புகள் நீங்கவும், விபத்தில் காயமுற்ற உடல் பாகங்களைச் சீரமைக்க, தீக்காயங்கள் நீக்கவும், போரில் காயமுற்ற வீரர்களுக்கும் பயன்படுகின்றன.

பல்வேறுபட்ட முகசீரமைப்பு சிகிச்சைகள் பற்றிய விவரங்கள் கோரி திருமண சமயங்களில் நாளொன்றுக்கு சராசரியாக 400 விசாரணைகள் வருவதாகக் கூறுகிறார்கள். தொப்பையைக் குறைத்தல், சிக்ஸ் பேக் , முடிமாற்று சிகிச்சை  பற்றி அதிகமான கேள்விகள் ஆண்களிடமிருந்தும் மார்பக அறுவை சிகிச்சை ( பெரிதாக்குதல், சிறிதாக்குதல் ), உடலை மெலியச் செய்தல், கொழுப்பை உறிஞ்சும் சிகிச்சை  ஆகியன பெண்களிடமிருந்தும் வரும் கேள்விகள் என்று ஹேர்லைன்ஸ் இண்டர்நேஷனல் ட்ரீட்மெண்ட் & ரிசர்ச் செண்டரின் இயக்குநர் பானி ஆனந்த கூறுகிறார்.

இதில் பெரும்பான்மையானவை ஆபத்தில்லாதவை என்றாலும் சரியான மருத்துவரிடம் சரியான சிகிச்சை பெறுவதே சாலச்சிறந்தது. சில சிகிச்சைகள் மூன்று வாரத்திலும் சில அதற்கு மேலும் பல மாதங்களும் எடுக்கக்கூடியனவாம். உடல் சீரமைப்பு, கொழுப்பைக் குறைப்பது போன்ற சிகிச்சைகள் திருமணத்துக்கு மூன்று மாதத்துக்கு முன்பே எடுக்கப்படவேண்டும். கொஞ்சம் சிக்கலான சிகிச்சைகளைன்அனுபவமிக்க மருத்துவரிடமும் அனைத்து வசதிகளும் கொண்ட மருத்துவமனையிலும் செய்துகொண்டால் பாதுகாப்பானது என்று மணிப்பால் ஆஸ்பத்திரியைச் சேர்ந்த முகச்சீரமைப்பு நிபுணர்  அஷோக்  சொல்கிறார்.

இந்தத் தொகுப்பு சிகிச்சைகளில்  டாட்டூ போட்டுக் கொள்வதுகூட  நடப்பு வழக்காகி வருகிறது. முன்னொரு காலத்தில் விரும்பிப் போட்டுக்கொண்ட டாட்டூக்களை/ பெயர்களை நீக்கக்கோரி  அடுத்துப் புதிதாக திருமணம் நிச்சயமாயிருக்கும் சமயத்தில் நிறையப் பேர் வருவதாக அப்போலோ ஆஸ்பத்திரி மற்றும் கொலம்பியா ஏசியாவில் பணிபுரியும் முகச்சீரமைப்பு மருத்துவர் யோகேஸ்வரப்பா கூறுகிறார்.

 குடும்பத்தில் இருக்கும் சிறியவர்களும் ஏன் பெரியவர்களுமே கூட வீட்டில் திருமணம் நிச்சயமாயிருக்கும் சமயம் தாங்களும் சிறப்பாகத் தெரியவேண்டி சில சிகிச்சைகளுக்காக வருகின்றார்களாம். இளையவர்கள் கருவளையம் நீக்குதல், நிறமாற்றத்துக்காக ( ஒப்பனை சிகிச்சை ) வந்தால் பெரியவர்கள் சுருக்கம் நீக்கும் சிகிச்சை மற்றும் ப்ளெபரோப்ளாஸ்டி சிகிச்சைக்காக ( மேல் இமைச்சீரமைப்பு ) ஆகியவற்றைச் செய்து கொள்ள வருவதாக மணிப்பால் ஆஸ்பத்திரியின் மருத்துவர் அஷோக் கூறுகிறார். கைனகொமஸ்டியாவுக்கு ரூபாய் – 25,000 – 50,000.( ஆண்கள் )   ரைனோப்ளாஸ்டிக்கு ரூபாய் – 60,000 – 1.50,000. (பெண்கள் )  ப்ளிப்பரோப்ளாஸ்டிக்கு – 60,000 ( முதியவர்கள் ) ரூபாய் செலவழித்தும் செய்து கொள்கிறார்கள்.

முன்பெல்லாம் முகச்சீரமைப்புச் சிகிச்சை  என்பது திருமணத்தின் ஒரு அங்கமாக இருக்கவில்லை. ஆனால் மக்களுக்கு இப்போது தன்னைப் பற்றிய சுயகௌரவம் மிளரவும், உடல்நல விழிப்புணர்வு  அதிகரித்து மற்றவர் பார்வைக்குத் தான் இப்படித் தெரியவேண்டும் என்ற ஆவல் மேலிடுவதாலும் சீரமைப்புச் சிகிச்சை செய்துகொள்கிறார்கள். கையருகே ஒரு பொத்தானைத் தட்டினால் தேவையான தகவல்கள் குவிந்து கிடப்பதால் தங்கள் தேவையின்படித் தேர்ந்தெடுத்து மக்கள் இதை நாடுகின்றனர்.  நடிக நடிகையர் மட்டுமல்ல சர்வதேச அளவில் விளையாடும் விளையாட்டு வீரர்களும் இதை நாடுகின்றனர். யுத்தத்தில் காயமடைந்த போர்வீரர்களுக்கும் இது வரப்ரசாதமாக அமைந்துள்ளது. 1917 இல் வால்டர் ஜூட்லாண்ட் என்ற வீரருக்கு வலது காது மடலில் செய்யப்பட்ட அறுவை சிகிச்சைதான் முதல் முகச்சீரமைப்பு அறுவை சிகிச்சை. 

குழந்தைகள், முதியோர், மணமக்கள் ஆகியோருக்கும் தனித்தனியாக உறுப்பு வாரியாக சிகிச்சை முறைகள் உள்ளன. டம்மி டக் ( தொப்பை குறைப்பு ), பிளிப்பரோ ப்ளாஸ்டி ( கண் இமைச்சீரமைப்பு ), மாமோப்ளாஸ்டி ( மார்பக அளவைக் கூட்ட/குறைக்க/மறு சீரமைக்க) , பட்டக் ஆக்யுமெண்டேஷன்/ பட்டக் லிஃப்ட் ( உட்காருமிடத்தை சீரமைக்க ) , கெமிக்கல் பீல் ( அக்கி , பெரியம்மை ஆகியவற்றால் வந்த தழும்புகளையும் சுருக்கங்களையும் சீர் செய்ய ), சோலார் லெண்டிஜைன்ஸ் ( முதுமையினால் வரும் சுருக்கங்களை நீக்க ) க்ரையோலிபாலிசிஸ் ( கொழுப்பு நீக்க ) , க்ரையோ ந்யூரோ மாடுலேஷன், (தோல் நோய்க்கான சிகிச்சை, வலி நீக்கும் சிகிச்சை . தற்காலிகமாக ஏற்படும் சுருக்கம் நீக்க ), லாபியாப்ளாஸ்டி & லிப்ஸ் என்ஹேன்ஸ்மெண்ட் ( உதடு சீரமைப்பு, பிளவுபட்ட அன்னம் சீரமைப்பு  ), ரைனோப்ளாஸ்டி ( மூக்கு சீரமைப்பு), ஓட்டோப்ளாஸ்டி ( காது சீரமைப்பு , தலையோடு ஒட்டி இருக்கும் காதைப் பிரித்தல் ), ரைடிடெக்டமி ( முகச்சுருக்கம் நீக்கி சீரமைத்தல் ) , நெக் லிஃப்ட் ( கழுத்து சீரமைப்பு ), ப்ரோப்ளாஸ்டி ( புருவ சீரமைப்பு ), மிட்ஃபேஸ் லிஃப்ட் . சீக் ஆக்யுமென்டேஷன் ( கன்னச்சீரமைப்பு ), ஜினோப்ளாஸ்டி ( முகவாய் சீரமைப்பு) , ஆர்த்தோக்நாதிக் சர்ஜரி ( முக எலும்புகளில் லேசாக ஃப்ராக்சர் உருவாக்கி அதன் பின் சீரமைத்தல் ) ,ப்ராக்கியோப்ளாஸ்டி ( அக்குள் மற்றும் முழங்கையில் இருக்கும் அதிகப்படியான சதையைக் கரைத்தல் ), லேசர் ஸ்கின் ரிஜெனுவேஷன் ( முகத்தில் லேசர் சிகிச்சை மூலம் புத்துணர்வு ஊட்டுதல் ), லிப்போ சக்‌ஷன் ( அதிகப்படியான கொழுப்பு நீக்கு சிகிச்சை ), கெலாய்ட் ரிமூவல் ( வடு நீக்கம் ), ஆகியன இதன் வகைகளாகும்.

ஸ்கின் க்ராஃப்டிங் ( தோல் ஒட்டுவது ), அவர்களின் தோல் அல்லது தானமளிப்பவர்களிடமிருந்து பெற்றப்பட்ட தோல் கொண்டு செப்பனிடப்படுகிறது. இரசாயன தோல் உரிக்கும் சிகிச்சை கார்பாலிக் ஆசிட் ( பினால்), ட்ரைக்ளோரோ அசிட்டிக் ஆசிட், க்ளைக்காலிக் ஆசிட், சாலிசிலிக் ஆசிட் ஆகியவற்றைக் கொண்டு செய்யப்படுகின்றது.

பிரான்ஸ் நாட்டில் தான், இந்த முகமாற்று அறுவை சிகிச்சைக்குப் பிள்ளையார் சுழி போடப்பட்டது. கேட்டிலா டாஷ் ( 38 வயது ஆண் ) அழகுப்பெண்மை பெற 7 அறுவை சிகிச்சை மேற்கொண்டுள்ளார். மேலும் பல விதமான அறுவை சிகிச்சைகள் மேற்கொண்டுள்ளார். இனி செய்து கொண்டால் இவர் உயிருக்கு ஆபத்து ஏற்படும் என்று டாக்டர்கள் எச்சரித்தும் கூட.  2005 இல் ஃப்ரான்சைச் சேர்ந்த இசபெல்லா என்ற பெண்ணை அவரது வளர்ப்பு நாய் கடித்துக் குதறிவிட சிதைந்த பகுதிகள் முகமாற்று அறுவை சிகிச்சை மூலம் சீரமைக்கப்பட்டுள்ளது. தற்போது, 2010 இல் ஸ்பெயின் நாட்டைச் சேர்ந்த ஒருவருக்கு, முழு முகத்தையும் மாற்றி அமைக்கும் அறுவை சிகிச்சை மேற்கொள்ளப்பட்டது

அமெரிக்கா  லண்டன் போன்ற நாடுகளிலும் இந்த அறுவை சிகிச்சைகள் மிக அதிக அளவில் நடைபெற்று வருகின்றன. ஆசிய நாடுகளான சீனாவிலும் இந்தியாவிலும் இது கொஞ்சம் கொஞ்சமாகப் பெருகி வருகிறது. தாய்லாந்து போன்ற நாடுகளில் மார்பகப் பெருக்கம், பாலியல் அறுவை சிகிச்சை, ஆகியன் செய்யப்படுகின்றன. ஆஸ்த்ரேலியா ஐரோப்பா மற்றும் அண்டை ஆசிய நாடுகளில் இருந்தும் இந்த சிகிச்சைகளுக்காக இந்தியா வருவோரின் எண்ணிக்கை அதிகரித்துள்ளது. பெண்கள் ஆண்கள் இருவரைப் பொறுத்தவரையிலும் மார்பக சீரமைப்பு அறுவை சிகிச்சைகள்தான் அதிக அளவில் செய்யப்பட்டுள்ளன.

முகசீரமைப்புச் சிகிச்சை ஒரு உளவியல் குறைபாடு காரணமாக செய்துகொள்ளப்படுகிறது.  பாடி டிஸ்மார்ஃபிக்  டிஸ்ஸார்டர் என்பது  தனது புறத்தோற்றம் சரியில்லையோ என நினைத்துக் கவலைப்படுவது. சில சமயம் இது சிகிச்சைக்குப்பின் அனரெக்சியா அல்லது தசை மாறுபாடு ஆகிய கோளாறுகளைக் கொண்டு வரும். சீரமைப்புச் சிகிச்சைக்குப் பின் சிலசமயம் விளைவுகள் மோசமாகலாம்.

ஹைதராபாத்தில் தற்போது அதிக அளவில் காஸ்மெடிக் சர்ஜரி நிலையங்கள் பெருகி உள்ளன்.  உடல் பருமன் நீக்கும் சிகிச்சைக்கு உட்பட்ட 32 வயது நரேந்திர குமார்  தவறான சிகிச்சை முறையால் உயிரிழந்துள்ளார். எனவே லிப்போ சக்‌ஷன் என்பது அழகுக்கான சிகிச்சை . அது  முழங்கை, தொடை, பிட்டம், கை உள்பக்கம் உள்ள கொழுப்பு  நீக்க செய்யப்படுவது. உடல் பருமன் நீக்கும் சிகிச்சை முறையல்ல என்று லிப்போசக்‌ஷன் நிபுணர் டாக்டர் சுரேஷ் ஹரி கூறுகிறார்.  தகுதியற்ற மருத்துவரிடம் எடை குறைப்புக்கான சரியான சிகிச்சை செய்யப்படவில்லை என்றால் உயிரிழப்பு ஏற்படும் என்பதையும் அவர் வலியுறுத்துகிறார்.

தோல்நோய் நிபுணர், முகச்சீரமைப்பு நிபுணர், பொது மருத்துவர்,குழந்தைப்பேறு மருத்துவர் , கண் மருத்துவர், எலும்பு மருத்துவர், முகம் வாய் எலும்பு சம்பந்தப்பட்ட மருத்துவர், முகச்சீரமைப்பு நிபுணர் ஆகியோரின் முறையான ஆலோசனை பெற்றுச் செய்யப்படவேண்டும். மிக அதிக செலவு பிடிக்கும் இந்த அறுவை சிகிச்சைகளில் சில மறுசீரமைப்புச் சிகிச்சைகளுக்கு  மருத்துவக் காப்பீடு செய்து கொள்ள முடியும். ஆனால் ஒப்பனை/அழகு அறுவை சிகிச்சைகளுக்கு மருத்துவக் காப்பீடு  கிடையாது. சிகிச்சைகள் முடிந்த பின்பும் சொல்லப்பட்ட மருத்துவம் மற்றும் வழிமுறைகளைப் பின்பற்றியே ஆகவேண்டும்.

 அமெரிக்கன் அகாடமி ஆஃப் காஸ்மெடிக் சர்ஜரி (AACS) சிறந்த ஒப்பனை/அழகு அறுவைசிகிச்சை நிபுணர்களைப் பரிந்துரைக்கிறது. காலம் மாறிவருகிறது. முன்பு போலெல்லாம் மக்கள் இப்போது தமக்கு இருப்பது போதும் .இதுவே கம்பீரம், இதுவே அழகு என நினைப்பது இல்லை. போட்டிகள் நிறைந்த உலகில் தங்களைச் செதுக்கிச் சீர்செய்து கொள்ள விரும்புகிறார்கள் இது ஒவ்வொருவரின் சுய விருப்பம் சார்ந்தது. எனவே தகுதியும் அனுபவமும் வாய்ந்த பயிற்சிபெற்ற சிறந்த மருத்துவரிடம் அறுவை சிகிச்சைகள் மேற்கொள்ள வேண்டும். எனவே எவ்வளவு துன்பம் கொடுத்தாலும் உலகை உவகையுடன் எதிர்கொள்ள  அழகர்களையும் அழகிகளையும் அவர்களின் தன்னம்பிக்கையையும் உருவாக்கும் அழகு அறுவை சிகிச்சைகள் காலத்தின் வரப்ப்ரசாதம்தான்.

டிஸ்கி:- இந்தக் கட்டுரை 2014 ஆவணி மாத மெல்லினத்தில் வெளிவந்தது.