புதன், 31 அக்டோபர், 2018

காரைக்குடிச் சொல்வழக்கு :- மாப்பிள்ளை அறிதலும் பொண்ணெடுக்கிக் காட்டுதலும்.

1101.  அதமப்பொருத்தம் - ஜாதகம் பார்க்கும்போது மாப்பிள்ளைக்கும் பெண்ணுக்கும் 3 பொருத்தங்களுக்கு மேல் இல்லாவிட்டால் அது அதமப் பொருத்தம். மாப்பிள்ளையை விட பெண்ணுக்கு வயசு அதிகமாய் இருந்தாலும் அது அதமப் பொருத்தம்.. ரஜ்ஜை தட்டினாலும், பெண் ராட்சச கணமாகவும் ஆண் தேவ அல்லது மனித கணமாக இருந்தாலும் அது அதமப் பொருத்தம். பெண்ணின் ராசி அல்லது நட்சத்திரத்திற்கும் பிறகு ஆணின் ராசி அல்லது நட்சத்திரம் வந்தாலும் அது அதமப் பொருத்தம். இப்படிச் செய்துவைக்கப்படும் மணங்கள் அதிக நாள் நீடிக்காது என்பது நம்பிக்கை.

1102. மாப்பிள்ளை அறிதல் - சொந்தத்தில் இல்லாமல் அந்நியத்தில் செய்யும்போது மாப்பிள்ளை விபரம் கிடைத்தவுடன் அவர்கள் ஊரைச் சார்ந்த பெரியவர்கள் அல்லது உறவினர்களின் மாப்பிள்ளை பற்றி விசாரித்து அறிந்து கொள்ளுதல். மாப்பிள்ளை வேலை செய்யும் இடத்துக்கோ அல்லது அவர் நண்பர்களுடன் உரையாடியோ மாப்பிள்ளை பற்றி அறிந்து கொள்வார்கள். எங்கள் உறவினர் ஒருவருக்குப் பெண் கொடுக்குமுன் பெண்ணின் உறவினர்கள் எங்கள் உறவினரில் எதிர் வீட்டில் ( வாசலில் இருந்து வீடு முழுதும் தெரியும் ) ஜன்னலோரம் அமர்ந்து காத்திருந்து மாப்பிள்ளை வரும்போது பார்த்தார்களாம். !

செவ்வாய், 30 அக்டோபர், 2018

ஓநாய் குலச்சின்னம் - ஒரு பார்வை


ஓநாய் குலச்சின்னம்  - ஒரு பார்வை .


முப்பதாண்டுகள் காலம் ஜியாங் ரோங்கின் சிந்தனையில் கருவுற்றிருந்திருக்கிறது இக்கதை. பன்னெடுங்காலமாக உருக்கிய மனத் தீயை இப்புத்தகத்தில் இறக்கிவைத்து ஆசுவாசம் அடைந்திருக்கிறார். இன்றைய நுகர்வோர் கலாச்சாரத்தின் கோரப்பிடியில் ஆட்பட்டுத் தம்மைத் தவிர வேறு எதையுமே பிரதானமாகக் கருதியிராதவர்கள் கட்டாயம் வாசிக்கவேண்டியது இந்நூல். சீனப் பின்னணியில் இக்கதை திரு. சி. மோகன் அவர்களின் மொழிபெயர்ப்பில் நாம் அருகே காணும் மேய்ச்சல் நிலக் கதைபோல் சரளமாக இருக்கிறது.

எல்லா விலங்குகளிலும் நாம் மிகுதியும் வெறுப்பது ஓநாயாகத்தான் இருந்திருக்கும். பஞ்சதந்திரக் கதைகள் கூட ஓநாய்த் தந்திரத்தைப் பேசி நம்மை வெறுக்கடித்திருக்கின்றன. வயல்களில் பாம்புகளை அதிரடியாக அழிக்கப் புகுந்த போது அவை எலிகளின் எண்ணிக்கையை அதிகமாக்கியதோடு எதிர்பாரா அளவில் தானியங்கள் இழப்புக்கும் வழி வகுத்தது எனப் படித்திருக்கிறேன். சுற்றுச்சூழல் காப்பதால் காகத்தை ஆகாயத்தோட்டி என்று குறிப்பிடுவதுபோல் மேய்ச்சல்நில ஆன்மாவாக , மங்கோலியர்களின் குலச்சின்னமாக ஓநாய்கள் இக்கதையில் குறிப்பிடப்படுகின்றன.

திங்கள், 29 அக்டோபர், 2018

கூட்டாஞ்சோறு – அணிந்துரை.


கூட்டாஞ்சோறு – அணிந்துரை.

நிஜமான கூட்டாஞ்சோறு என்றால் இது தான். புதுக்கவிதைகள் மட்டுமல்ல. மரபுக்கவிதைகளும் வெண்பாக்களும் க்ளெரிஹ்யூக்களும் கூட கூட்டாஞ்சோற்றில் இடம் பெற்றுள்ளன. சுற்றுச்சூழல், இயற்கை ஆக்கிரமிப்பு, விவசாயம், வான்பொய்த்தல், மழை, தரிசு, வெள்ளாமை, காதல், பாசம், காமம், உறவுகள், மூன்றாம் பாலினத்தவர், கிராமம் எனப் பல்வேறு பாடுபொருட்களுடன் துலங்குகின்றன கவிதைகள். அனைத்துக் கவிதைகளையும் பக்குவமாக ருசியான ஒரே கூட்டாஞ்சோறாக்கிய இம்மாபெரும் முயற்சிக்கு என் வாழ்த்துக்கள்.

கலக்கல் ட்ரீம்ஸின் வெளியீடான இதில் பதினாறு கவிஞர்கள் எழுதி இருக்கிறார்கள். தன சக்தி, சீதா, ஸ்வேதா, கார்த்திக் மணி, ராம் சங்கரி, காயத்ரி அருண்குமார், கிருபாஷினி, மதுவதனி, கரிக்கட்டி கவிராயர், ஸ்ரீபுஷ்பராஜ், தமிழ்த்தென்றல், சாயா சுந்தரம், அனுசரன், கடவுளின் ரசிகன், மதுரை சிக்கந்தர், வைகை ராஜீவ் ஆகியோர்.

வெள்ளி, 26 அக்டோபர், 2018

ராமனுக்குத் தம்பியான குகன். தினமலர். சிறுவர்மலர் - 41.

ராமனுக்குத் தம்பியான குகன்.

ராமனுக்கு மூன்று தம்பிகள் தானே அது எப்படி சாதாரண படகோட்டியான குகன் மாமன்னனான ராமனுக்கு நான்காவது தம்பியாக ஆனார் என்று யோசிக்கிறீர்கள்தானே குழந்தைகளே. குகன் யார், அவர் எப்படி ராமருக்குத் தம்பியானார் என்று பார்ப்போம்.  
யோத்தி மன்னன் தசரதன் இட்ட கட்டளைப்படி ராமன் இலக்குவனோடும் சீதையோடும் வனவாசம் புகுந்தார்.  மரவுரி பாதுகை தரித்து அவர் வனம் புகுந்த போது கங்கையைக் கடக்க வேண்டி வந்தது.   
சிருங்கிபேரபுரம் என்னும் நாட்டின் தலைவனான நிசாத மன்னன் குகன். அவன் வேடுவ குலத்தைச் சேர்ந்த தீரன். அடர்ந்த கருங்குழல்கள் தொங்கும் நீண்ட தோள்கள் உடையவன். கங்கை ஆற்றில் படகோட்டி திண்மையான புயங்கள் பெற்றிருந்தான். நூலாடை போல் தோலாடை அணிந்தவன்.  அவன் ராம லெக்ஷ்மண சீதாதேவியின் வருகையைக் கேள்வியுற்றான்.
மன்னர்மன்னன் வருகிறாரா. இவரைக்காணத்தானே  அவன் பிறவியென்னும் பெருங்கடலை நீந்தாமல் காத்திருக்கிறான். உடனே தேனும் மீனும். தினைமாவும் எடுத்துக்கொண்டு ராமரைப் பார்க்கச் சென்றான்.

மீ டூ - சில குழப்பங்களும் சில புரிதல்களும்.

சென்ற சில நாட்களாக அதிகம் விவாதிக்கபடும் வார்த்தை - மீ டூ.

இந்த மீ டூ பற்றி - சில பிரபலங்கள் சொன்னால் அது டிவி டிபேட்டுக்கு உரிய விஷயம். அதில் இருக்கும் உண்மையை அவரவர்க்குத் தக்கபடி எடுத்துக் கொள்கிறார்கள் என்று தோன்றியது. இதில் ரேஸ், ஏஜ், க்ளாஸ் எதுவும் கிடையாது.

சாதாரணர்களுக்கு இல்லையா மீ டூ ப்ராப்ளம். ஏதேனும் ஒரு பருவத்தில் இதைக் கடந்தே இன்றிருக்கும் அனைவரும் வந்திருப்பார்கள். இதில் குழந்தைகளை பாலியல் சீண்டல் செய்தோர் பற்றி செய்தி அதிகம் வருகிறது. அதுவும் ஆண் குழந்தைகளை அவர்கள் குடும்பத்தைச் சேர்ந்த ஆண்களே சீண்டி இருக்கிறார்கள் என்பது அதிர வைத்த விஷயம்.

முகநூலில் பகிரப்படும் பல மீ டூக்கள் வேண்டாத முன்னாள் நண்பரைத் தாக்க ஒரு துருப்புச்சீட்டாகப் பயன்படுகிறது. “டீச்சர் இவன் என் சடையை பிடிச்சு இழுத்துட்டான் “ என்பதாகவே பல மீ டூக்கள் இருக்கின்றன.

உண்மையான மீடூவை சிலரே பகிர்ந்திருக்கிறார்கள். அது மிகப்பெரும் அதிர்ச்சியும் கண்ணீரும் அளித்த சம்பவம். இந்த மாதிரி மீ டூக்களில் அவர்கள் பண பேரத்துக்கு உட்பட்டு இழந்த பல லட்சங்கள் மட்டுமல்ல அடைந்த மனச்சோர்வும் மனச்சிதைவும் பதைக்க வைத்தது. மீண்டு எழுந்தவர்களைப் பார்க்கும்போது பிரமிப்பும் இன்னும் அவர்களுக்கு மனவலிமை பெருகவேண்டும் எனவும் வேண்டத் தோன்றியது.

வியாழன், 25 அக்டோபர், 2018

கணிகண்ணனுடன் சென்ற மணிவண்ணன். தினமலர். சிறுவர்மலர் - 40.

கணிகண்ணனுடன் சென்ற மணிவண்ணன்.

ஆசிரியர் ஊர் மாறிப்போகிறாரே என்று மாணவர்கள் வருந்துவது பழக்கம். ஆனால் இங்கே ஒரு மாணவன் ஊர் விட்டுப் போகிறாரே என்று அவரது குரு வருத்தப்பட்டு அவருடன் செல்கிறார். செல்பவர் சும்மாவா செல்கிறார் அந்த ஊரில் பள்ளி கொண்ட மணிவண்ணனையும் தன் பாம்பணையைச் சுருட்டிக் கொண்டு பின் வரப் பணிக்கிறார். இதெல்லாம் எங்கே நடந்தது அப்படி தன் குருவையும் தெய்வத்தையும் கவர்ந்த கணிவண்ணன் யார் ? அவனுடன் சென்ற மணிவண்ணன் யார் என்று பார்ப்போம் குழந்தைகளே.
திருமழிசை என்ற ஊரில் பார்க்கவர் என்ற முனிவர் மகப்பேறு வேண்டி யாகம் புரிந்து வந்தார். அதன் பயனாக அவரது மனைவிக்கு ஒரு ஆண்குழந்தை பிறந்தது. அக்குழந்தை வளர்த்தியற்ற குறை உருவாக இருந்ததால் அவரது பெற்றோர் அங்கேயே ஒரு பிரம்புத் தூற்றின் கீழ் விட்டுச் சென்றுவிடுகிறார்கள்.

புதன், 24 அக்டோபர், 2018

ஆண்டாளின் அண்ணன் படைத்த அக்கார அடிசில். தினமலர். சிறுவர்மலர் - 39.


ஆண்டாளின் அண்ணன் படைத்த அக்கார அடிசில்.

உலகிலேயே பிரதிபலன் எதிர்பாராத உன்னதமான உறவுகளில் ஒன்று அண்ணன் தங்கை உறவு. உடன்பிறந்த சகோதரர்களே சகோதரிகளுக்குச் சீர் செய்ய அலுத்துக் கொள்ளும் காலமிது. ஆனால் உடன்பிறவா சகோதரர் ஒருவர் ஆண்டாளின் வேண்டுதலை நிறைவேற்ற பெருமாளுக்கு அக்கார அடிசில் படைத்த கதை ஒன்று உண்டு. தங்கை பாடிச் சென்றதற்காக ஒன்று இரண்டல்ல ஆயிரம் அண்டாக்கள் நிறைய வெண்ணெயும் அக்கார அடிசிலும் படைத்த அந்தப் பாசக்கார அண்ணன் யார் என்று பார்ப்போம் வாருங்கள் குழந்தைகளே.
ஸ்ரீவில்லிப்புத்தூர் என்னும் ஊரில் விஷ்ணுசித்தர் என்பார் வாழ்ந்து வந்தார். ஒரு திரு ஆடிப்பூரத்தன்று அவரது தோட்டத்தில் இருந்த திருத்துழாய்ச் செடியின் அருகில் ஒரு பெண்குழந்தை கிடைத்தது அவருக்கு. கொள்ளை அழகு கொண்ட அக்குழவிக்குக் கோதை என்று பெயரிட்டு வளர்த்து வந்தார்.
கோதை நாளொருமேனியும் பொழுதொரு வண்ணமுமாக வளர்ந்து வந்தாள். ஸ்ரீவில்லிபுத்தூர் பெருமாள் கோயிலுக்கு அவள் தந்தை விஷ்ணு சித்தர் தினமும் மலர் கைங்கர்யம் செய்து வந்தார். நந்தியாவந்தனப் பூக்களைத் தொடுத்துக் கெட்டி மாலையாக்கித் தினம் கோயிலுக்குக் கொண்டுபோய்க் கொடுப்பது அவர் தொண்டு. அந்த மாலைகளின் அழகைக் கண்ட கோதை விளையாட்டாய்த் தன் கழுத்தில் அணிந்து கண்ணாடியில் அழகு பார்ப்பார்.

செவ்வாய், 23 அக்டோபர், 2018

காதல் வனம் :- பாகம் .24. காவல் தெய்வம் டாமி.


காதல் வனம் :- பாகம் .24. காவல் தெய்வம் டாமி.

”ஹேய் ஹோய் ஹூ லல்லல்லாலல்லா” என்று மிஷின் இம்பாஸிபிளின் பின்னணி இசை ஒலிக்க டாம் க்ரூஸ் மலையேறிக் கொண்டிருந்தார்,. காரை ஓட்டிக் கொண்டிருந்த ஸாம் பென் ட்ரைவை எடுத்து இசையை நிறுத்திவிட்டு கடற்கரைச் சாலையில் நிறுத்தினார். சிறிது தூரத்தில் அவரது அன்பிற்குரிய முத்தழகி நடந்து வந்து கொண்டிருந்தாள். ஆதி தேவதை..அற்புத சௌந்தரி. ரோஜாப்பூ.

வேகமாக வந்தவள் மூச்சிறைத்தாள். ’என்னாச்சு டாமிக்கு?” . கேட்கும்போது அவள் குரலில் பதட்டம் நிலவியது. மூன்று நாளாயிற்று டாமி இறந்து. அதைச் சொல்ல அவருக்கும் வருத்தம் மனதைப் பிய்த்தது. டாக் ஷோவில் எல்லாம் டாமி முதல் கப் வாங்காமல் திரும்பியதே இல்லை. அவர்கள் குடும்பத்தில் யார் எந்த மனநிலையில் இருந்தாலும் அதை மாற்றும் மந்திரம் டாமியின் கொஞ்சலில் இருந்தது.

குழந்தைகளுடன் குழந்தைகளாகச் சுற்றியே திரிந்து கொண்டிருக்கும் டாமி. கடைசியில் குழந்தைகளைக் காப்பாற்றி விட்டுத் தான் பலியாகி விட்டது.

” மூன்று நாள் முன்னே கோடை போயிருந்தோம். அங்கே ப்ராம்புலேடரில் பசங்களை உக்காரவைச்சு நீலாக்காவும், தேவியும் கூட்டிட்டுப் போயிட்டிருந்தாங்க. அப்போ ரோட்டோட இறக்கத்துல நந்தினி இருந்த வண்டி தேவியோட கைலேருந்து வழுக்கி ஓட ஆரம்பிச்சிருச்சு. எதிர்ல ஒரு டூரிஸ்ட் பஸ் வந்திருக்கு. தேவி வேகமா ஓடிப் பிடிக்கிறதுக்குள்ள டாமி குறுக்கே பாஞ்சு பஸ் சக்கரத்தடியில விழுந்திருச்சு. ட்ரைவர் சடன் ப்ரேக் போட்டுட்டார். ப்ராம் ஓரமா ஓடி பாதுகாப்புச் சுவர்ல முட்டி நின்னுருச்சு. ஆனா டாமி ஸ்பாட் அவுட். அது ஓடித் தடுக்காட்டா பஸ் நந்தினி வந்த ப்ராம் மேலே மோதி இருக்கும்.

திங்கள், 22 அக்டோபர், 2018

நாற்கரச்சாலையும் நீலச்சக்கரமும்.

1921. தான் வரையும் சாலைச் சித்திரத்திற்கு
தானே பூக்காசைச் சுண்டிக்கொண்டிருக்கிறது
பவளமல்லி மரம்.

1922. நிலப் புழுதிக்குள்
குமைந்து நைகின்றன நாற்றுகள்.
நகரமுடியாதவற்றைப் புதைத்து
உருவாகிக் கொண்டிருக்கின்றன
நாற்கரச்சாலைகள்.
ஓடும் ஒவ்வொரு வண்டியின் கீழும்
ஊமைக்கசிவாய் உழுதவன் ரத்தம்
பசுமையிலிருந்து செங்காவிக்கு
உயர்கிறது நீலச் சக்கரம்.

1923. மலைகளை உடைத்து விடலாம்.
மனங்களை கொள்கை பீடிப்பிலிருந்து தகர்த்துவது கடினம்.

1924. கலைஞர்கள் வர்க்கச் சார்பு உடையவர்களா ?

1925. சமூக விழுமியத்துக்குள் வராத ஒழுங்குமுரண்களால் வசீகரிக்கப்படும் காலமிது.

தீபாவளிக் கோலங்கள்.

தீபாவளிக் கோலங்கள்.

ஞாயிறு, 21 அக்டோபர், 2018

இவர்கள் – ஒரு பார்வை.


இவர்கள் – ஒரு பார்வை.


புஷ்பா தங்கத்துரை என்ற பெயரிலும் ஸ்ரீ வேணுகோபாலன் என்ற பெயரிலும் இவரது கதைகளைப் படித்திருக்கிறேன். இரண்டிலும் துல்லியமான மாற்றங்கள் இருக்கும். இதில் மனதைத் தொடும் ஆழமான வகை.

இந்நாவலில் இன்றைக்குக்கூட நாம் பேச அஞ்சும் பெண்களின் காமம் பற்றிய யதார்த்தமான எண்ணங்களைப் பேசி இருக்கிறார். இந்நூல் வெளிவந்த காலம் 1984. ஆனால் இன்றைக்கும் சர்ச்சைக்கு உள்ளாக்கக் கூடிய கதை அமைப்பு இது.

ஒரு நீதிபதி இருமுறை ஒரே கைதியின் வழக்கில் தீர்ப்பு வழங்கியபின் அந்தக் கைதிமேல் இரக்கம் மேலிட ஜெயிலுக்குச் சென்று அவரைச் சந்தித்து அவரது கதையைக் கேட்டறிகிறார். அவர் கூறுவதைப் போல உணர்ச்சிப் பிரவாகங்கள், உணர்ச்சிக் குவியலான மனிதர்களின் கதைகளில் இதுவும் ஒன்று .

தன் நண்பன் நாராயணனின் திருமணத்தில் கலந்துகொள்ளச் செல்கிறார்கள், வசந்தராவ் மற்றும் சில நண்பர்கள். அங்கே அழகி ஒருத்தியைப் பார்த்து ஆன்ம ஈர்ப்புக் கொள்கிறார் வசந்தராவ். 

நாராயணன் திருமணத்துக்கு முதல்நாள் மாலை எதிர்பாராவிபத்தில் சிக்கி காலமாகிவிட அந்தப் பெண் ஸூமானாவை மணக்க வேண்டிய ஒரு சூழ்நிலைக்கு ஆட்படுகிறார் வசந்தராவ்.

சனி, 20 அக்டோபர், 2018

ஆராவமுதனும் அதித்யாவும் ஆராதனாவும் ஆத்திச்சூடிக் கதைகளும் – 8.

ஆராவமுதனும் அதித்யாவும் ஆராதனாவும் ஆத்திச்சூடிக் கதைகளும் – 8.

”ஆதித்யா.. ஆதித்யா ” அழைத்தார் ஆராவமுதன். ஆதித்யாவும் ஆராதனாவும் மாடியில் ஆடிக்கொண்டிருந்தார்கள். தாத்தா அழைத்ததும் இருவரும் ஓடி வந்தார்கள்.

”தாத்தா வாக் போகப்போறேன். யார் வர்றீங்க.” ரெண்டு பேரும் வர்றோம் என்று அவர் கையைப் பிடித்துக் கொண்டார்கள். “ரம்யா இவங்கள அழைச்சிட்டுப் போயிட்டு வர்றேன். ஏதும் வாங்கிட்டு வரணுமாம்மா” என்று கேட்டார்.

”இல்ல மாமா நான் நேத்தே வாங்கின காய் கொஞ்சம் மிச்சம் இருக்கு. பூஜைக்கு உள்ளதெல்லாம் வாங்கிட்டேன். வேறு ஏதும்னா நாளைக்கு வாங்கிக்கலாம்” என்று சொன்னாள் ரம்யா.

சரிம்மா என்று சொல்லிவிட்டு வாசலில் செருப்பைப் போட்டுக் குதித்துக் கொண்டிருந்த ஆதித்யாவையும் ஆராதனாவையும் கையைப் பிடித்து அழைத்துச் சென்றார். பஜார் கடைகள் எல்லாம் ஒரே கூட்டமாக இருந்தது. விஜயதசமிக்காக பூக்கடைகள், பொரிக்கடைகள் எல்லாம் வியாபாரம் தூள் பறந்து கொண்டிருந்தது.

காரைக்குடிச் சொல்வழக்கு:- பச்சநத்தமும் தொருதொருத்தபழமும்.

காரைக்குடிச் சொல்வழக்கு:- பச்சநத்தமும் தொருதொருத்தபழமும்.

1081. குருவ அரிசி – குறுவை அரிசி , சிவப்பரிசி, (பாயாசம், பணியாரம், கொழுக்கட்டை செய்யப் பயன்படுவது).

1082. அள்ளுபிடி முள்ளுபிடி – ஒரு பாத்திரத்தில் அரிசி பருப்பு வகையறாக்களை சமையலுக்கு அளந்து போடும் முன்பு முதலில் ஒரு கைப்பிடி அள்ளிப் போட்டுவிட்டு ( வெறும் பாத்திரத்தில் அளக்கக் கூடாதாம் அதனால் )  அதன் பின் தேவையானதை உழக்கில் அளந்து போடுவார்கள். இது அள்ளு பிடி. அளந்து போட்டு முடித்ததும் கடைசியாக ஓரிரு கைப்பிடி போடுவது உண்டு. அல்லது குறைந்த அளவில் மிச்சமிருக்கும் தானியங்களை அதிலேயே போட்டுவிடுவார்கள். அதற்கு முள்ளுபிடி என்று பெயர்.

சிலர் அளக்கும்போதே உழக்கு அல்லது படியில் கோபுரமாக நன்கு அமுக்கி அதன் பின்னும் அதிகமாக அந்த கோபுரத்தில் தானியத்தை அமுக்கிப் பிடித்து அளந்து போடுவார்கள் . இதற்கு முள்ளுபிடி என்றும் பெயர்.

1083. பெரும்போட்டுப் புள்ள – உடலில் எலும்பு பெரிதாக அமைந்து பார்க்க (ஜைஜாண்டிக்காக ) ஈடு தாடாக இருப்பவர்களை பெரும்போட்டுப் பிள்ளை என்பார்கள். இவர்கள் எவ்வளவு மெலிந்தாலும் மெலிந்தது போல் தெரியாது. சதை குறைவாகவும் உடலில் எலும்பின் அடர்த்தி அதிகமாக அமைந்தும் உள்ளவர்கள்தான் பெரும்போட்டுப் பிள்ளைகள். இவர்கள் அளவில் பெரிதாக இருப்பதால் உண்பதும் அதிகமாக இருக்கும். அதே சமயம் அடுத்தவர்க்குக் கொடுப்பதும் ( ஈதல் )  நன்கு கொடுப்பார்கள். எனவே அவர்களைப் பெரும்போடு என்று சொல்வதுண்டு.

1084. சவலப்புள்ள – ஒரு பிள்ளை கையில் இருக்கும்போதே அடுத்து ஒரு பிள்ளை பிறந்தால் மூத்த பிள்ளை சவலைப் பிள்ளையாகிவிடும். ஏனெனில் இதற்குக் கிடைக்கவேண்டிய கவனிப்புப் பூரா சின்னப் பிள்ளைக்குக் கிடைப்பதால் இது எப்போதும் தாயின் அண்மைக்கும் பாசத்துக்கும் கவனிப்புக்கும் ஏங்கிக் கொண்டே இருக்கும். அதனால் சவலை தட்டி மெலிந்து போய் என்ன கொடுத்தாலும் தேறாமல் இருக்கும்.  

காதல் வனம் :- பாகம் .23. தங்க நிறச் சிங்கக் குட்டிகள்.


காதல் வனம் :- பாகம் .23.  தங்க நிறச் சிங்கக் குட்டிகள்.

”அவள் பறந்து போனாளே .. என்னை மறந்து போனாளே. ” இரண்டு நாள் தாடியுடன் சோஃபாவில் கிடந்தார் சாம். வாழ்நாள் பூரா அவர் தேடியது என்ன. பாசம் காதல் , குழந்தைகள் எல்லாம் தேவைக்கதிகமாகவே கிடைத்துவிட்டது. ஒன்றுக்கு மூன்றாகக் காதல், இரண்டாகக் குழந்தைகள். பாசத்தில் மூழ்கடிக்கும் தேவி. அவருக்கென்ன குறை.  

எங்கே சென்றுவிட்டாள் இந்த ராணி ? அவளுக்கென்ன கேடு ஏன் சொல்லாமல் போனாள். ’பாதுகாப்பான இடத்துக்குத்தான் போகிறேன். தேடவேண்டாம்’ என்று இரண்டே வரிகள் எழுதி வைத்துவிட்டுக் காணாமல் போய்விட்டாள் பாவி.

நந்தன் நந்தினியின் பிறந்தநாள் என்னவோ கோலாகலமாகத்தான் நடந்தது அவர்களைப் பெற்றவள் இல்லாமல். வந்தவர்கள் குசுகுசுவெனப் பேசியது அவ்வப்போது அவர் காதுகளிலும் விழத்தான் செய்தது. “ இவங்க சரோகேட்ஸ் பேபீஸ் தெரியும்தானே. ! “ “ யெஸ் ஐ கேம் டு நோ இட் ஃப்ரம் செந்தில்நாதன் “

சிட் அவுட்டிலும் சேர்கள் போடப்பட்டிருந்தன. ஸாம் நான் சிங்கம்டா எனக் காண்பிக்க விரும்பினாரோ என்னவோ  சிங்கம் தீமில் அமைக்கப்பட்டிருந்தது அந்த பர்த்டே பார்ட்டி. கார்ட்டூன் சிங்கத்தின் உருவங்கள் ஆங்காங்கே காணப்பட்டன. உயர்தரமான ஹோட்டலில் இருந்து உணவுகள் தருவிக்கப்பட்டிருந்தன. அவை சிங்க குகைகளில் உணவுகள் அடுக்கப்பட்டிருந்தன. வரவேற்புப் பெண்கள் குறுக்கும் நெடுக்கும் நடந்து வெல்கம் ட்ரிங்க் கொடுத்துக் கொண்டிருந்தார்கள். சீருடைப் பணியாளர்கள் தேவையானவர்களுக்கு தேவையான விகிதத்தில் காக்டெயில் கலந்து  ட்ரேக்களில் வைத்துச் சுற்றிக் கொண்டிருந்தார்கள்.

அமெரிக்கன், காண்டினெண்டல், சைனீஸ், சவுத் இந்தியன் என்று விதம் விதமான உணவுவகைகள் பரப்பட்டிருந்தன. ஸாமும் தேவியும் நந்தனும் நந்தினியும் அணிந்திருந்த உடைகள் பல ஆயிரங்கள் செலவில் தைக்கப்பட்டிருந்தன. தங்க நிற ஃபர் கொண்ட கிளர்ச்சியான ஸாட்டின் வெல்வெட் கலந்த உடையை அணிந்திருந்தார்கள் நால்வரும். ஈவண்ட் மேனேஜர்க்கே பல லகரங்களை செலவிட்டிருந்தார் ஸாம்.

புதன், 17 அக்டோபர், 2018

பத்ரிக்கையாளர் ப. திருமலை அவர்களின் பார்வையில் பெண்மொழி.

பெண்மொழி ஒரு பார்வை.

//// பத்ரிக்கையாளர் ப திருமலை நான் மிக மதிக்கும் ஆளுமைகளுள் ஒருவர். இவரது கட்டுரைகளில் இருக்கும் முழுமைத் தன்மையும், நம்பகத்தன்மையும் , எந்த ஒரு தலைப்பிலும்  தகுந்த புள்ளி விவரங்களோடு பிரச்சனைகளை எடுத்துக் காட்டுவதும், ஆள்பவர்களுக்கு அஞ்சாமல் வெளிப்படுத்தும் நேர்மையான கருத்துக்களும் ஆச்சர்யப்பட வைப்பவை. அவர் இந்நூலைப் படித்து அதற்குச் சிறப்பளிக்கும் விதத்தில் விமர்சனம் அனுப்பி இருப்பது குறித்து மிகுந்த சந்தோஷம் ஏற்பட்டது. அதை உங்களுடன் பகிர்வதில் மகிழ்கிறேன். சிறப்பான விமர்சனத்துக்கு நன்றியும் மகிழ்ச்சியும் திருமலை சார். ///


பெண்களின் நிலை சற்று மேம்பட்டுள்ள இந்நாளிலும் பெண்களுக்கான அனைத்து உரிமைகளும், பாதுகாப்பும் கிடைத்துவிட்டதா என்றால் இல்லையென்றே சொல்லவேண்டிவரும். காரணம், அன்றாடம் நான் கேள்விப்படும், வாசிக்கும், பார்க்கும் நிகழ்வுகள் அதனை உணர்த்துகின்றன. பெண்களின் வலி, மகிழ்ச்சி, ஆசை, அபிலாஷை என பல்வேறு உணர்வுகளை இந்த சமூகம் முழுமையாக ஏற்றுக்கொள்வதுமில்லை. அங்கீகரிப்பதுமில்லை. ஆனால், "பெண்களை தெய்வமாகப் போற்றுகிறோம்.. தாயாக மதிக்கிறோம்" என்ற பீற்றலுக்கு மட்டும் குறைவைப்பதில்லை. இந்த சூழலில்தான் கவிதாயினி தேனம்மை லட்சுமணன் எழுதிய பெண்மொழி எனும் கட்டுரை நூலினை வாசிக்கும் வாய்ப்பு கிட்டியது. 

அது என்ன பெண்மொழி...உங்கள் தாய்மொழியை எப்படி கற்றுக்கொண்டீர்கள்? சின்னக் குழந்தையிலிருந்தே வீட்டில் உள்ளவர்களும் நண்பர்களும் பேசுவதைக் கேட்டுக் கேட்டு கற்றுக்கொண்டேன் என்பீர்கள். காதால் கேட்டும் வாயால் பேசியுமே நாம் பெரும்பாலும் மொழியைக் கற்றுக்கொள்கிறோம். மொழி என்பது மனிதனின் அறிவு நிலைப்பட்டுள்ளதை அடையாளப் படுத்துகிறது. அதே போன்று அறிவு நிலையின் மூலம் மொழியும் அடையாளப்படுகிறது. எத்தனையோ மொழிகளைக் கேட்டிருப்பீர்கள். அல்லது அறிந்திருப்பீர்கள். ஆனால், "பெண்மொழி" குறித்து அறிந்திருக்கிறீர்களா..? இது வரிவடிவமோ ஒலி வடிவமோ இல்லாத வருத்த வடிவம் கொண்ட மொழி.

செவ்வாய், 16 அக்டோபர், 2018

ஹலோ மதுரையில் கிட்டூர் ராணி சென்னம்மா.

மதுரையில் இருந்து வெளிவரும் இதழ் ஹலோ மதுரை. மதுரை சார்ந்த அனைத்துத் தகவல்களும் கொட்டிக்கிடக்கும் சிறப்பிதழ் . மாதம் ஒருமுறை வருகிறது. நல்ல வழுவழுவென்ற தாள்களில் வண்ணப்பக்கங்களில் மதுரையின் அழகு விகசிக்கிறது. விலை 20 ரூபாய்தான். பிழையே இல்லாமல் படிக்க வெகு சரளம். அழகான லே அவுட்கள். கண்ணைக் கவரும் புகைப்படங்கள்.

இதில் அட்டைப்படங்களாக திருப்பரங்குன்றம், பதினெட்டாம்படிக் கருப்பர், காந்தி ம்யூசியம் என வியக்க வைக்கின்றன. நமது வலைப்பதிவ நண்பர் எஸ் பி  செந்தில்குமார் அவர்களின் பல்வேறு கட்டுரைகளும் இடம் பெற்றுள்ளன.

இப்பத்திரிக்கையை வெளியிட்டு  வருபவர் ரமேஷ்குமார் என்பவர். அவருக்கு ஒரு ஹேட்ஸ் ஆஃப்.

அவர் முகநூலில் தொடர்பு கொண்டு கிட்டூர் வீராங்கனை ராணி சென்னம்மாவின் கட்டுரையை என் வலைப்பதிவில் இருந்து எடுத்து நூலில் கையாள அனுமதி கேட்டிருந்தார். மிகுந்த சந்தோஷத்தோடு ஒப்புக் கொண்டேன்.  கட்டுரையுடன் பேர் போட்டு இதோ பத்ரிக்கையும் அனுப்பி விட்டார். நன்றி ரமேஷ். ஹலோ மதுரை இன்னும் பல சிறப்புகள் காண வாழ்த்துகள்.


நமது நாடு சென்ற நூற்றாண்டுகளில் ஆங்கிலேயரிடம் அடிமைப்பட்டுக் கிடந்தது. அப்போது சுதந்திரம் வேண்டி சாமான்யர்களும் புரட்சியாளர்களும் போராடியது போல சாம்ராஜ்யம் ஆண்டவர்களும் அந்நியரின் ஆக்கிரமிப்புக்கு அடிபணியாமல் போராடினர்.  அவர்களுள் சிலரின் வீர சரித்திரத்தைக் காண்போம்.

திங்கள், 15 அக்டோபர், 2018

காரைக்குடி புத்தகத் திருவிழாவில் எனது நூல்களும் நான் வாங்கிய நூல்களும்.

சென்றவாரம் முழுவதும் காரைக்குடி பெரியார் சிலைக்கு அருகில் உள்ள சுபலெக்ஷ்மி பேலஸ் ஹோட்டலில் தமிழ்நாடு அறிவியல் இயக்கம் நடத்திய புத்தகக் கண்காட்சி நடைபெற்றது.



அதில் மரப்பாச்சி புத்தகாலயம் அரங்கில் எனது நூல்களும் தோழி ராமலெக்ஷ்மி நூல்களும் இடம் பெற்றன. சில விற்பனை ஆனதாகவும் கேள்வி. :)

புதினம் - கதிரேசன்,  சாகித்ய அகாடமி விருது புகழ் எழுத்தாளர் காரைக்குடியைச் சார்ந்த மருத்துவர் சுனில் ஏற்பாடு செய்திருந்த மரப்பாச்சி அரங்கின் பொறுப்பேற்று நடத்திக் கொண்டிருந்தார்.

காதல் வனம் :- பாகம் .22. வலைப்பின்னல்.


காதல் வனம் :- பாகம் .22. வலைப்பின்னல்.

”ஐயோ பாம்பு பாம்பு என்று பதறித் துடித்து எழுந்தாள் முத்தழகி. எங்கே எங்கே என்று ஓடிவந்தார்கள் அவளது தந்தை செந்தில்நாதனும் தாயும். .

“அதோ.. அங்கே.. அங்கே..  பெரிய்ய்ய பாம்பு . இல்ல இங்கதான்”  என்று தன் காலடியைச் சுட்டிக்காட்டினாள். பந்துபோல் உருண்டிருந்த கம்பளியைக் காலடியில் இருந்து உருவினார் செந்தில்நாதன். இன்னும் பயம் நீங்காமல் அவள் உடம்பு விதிர்விதிர்த்துக் கொண்டிருந்தது.

”என்னம்மா இது. உல்லன் கம்பிளி இதைப் போய் பாம்புன்னு நினைச்சிட்டியா. கால்ல சுருண்டு சிக்கிருக்கு போல. என்று சிரித்தார். ”உங்களுக்கு எப்பவும் விளையாட்டுத்தான். எழுந்து இந்தத் தண்ணியக் குடிம்மா” என்று கொடுத்தாள் அழகியின் தாய். வாங்கிக் குடித்துவிட்டுப் போங்கப்பா என்று சிணுங்கியபடி எழுந்து சென்றாள் மகள்.

”என்னம்மா வெப்சைட் ஒண்ணு நம்ம ஷேர் பிஸினஸுக்காக ஆரம்பிச்சுத் தர்றேன்னு சொன்னியே எப்பம்மா அத செய்யப் போறே ”. என்றார்

”ப்ராஸஸ்ல இருக்குப்பா. இன்னும் இரண்டு நாள்ல முடிச்சிருவேன்.” கையைத் தம்ஸ் அப் காட்டினாள்.

பழையவற்றை எல்லாம் நினைத்து உக்கி உருகிப் போகாமல் மகள் தன்னம்பிக்கையுடன் நடந்து கொள்வது அவருக்கு நிம்மதியாயிருந்தது. கொஞ்சம் நாள் போகட்டும். இந்த நினைவுகள் மறையட்டும். அவளுக்கேத்த வரன் கிடைக்காமலா போய்விடுவான். மனதைத் தேற்றிக் கொண்டார்.

மாத்தூர் நகர விடுதியும், தங்கும் அறைகளும்.

ஆயுளை அதிகமாக்கும் ஆனந்த முனீஸ்வரர்.

மாத்தூர் கோவில் பற்றியும் ஸ்தலவிருட்சங்கள், விடுதி பற்றியும் முன்பே எழுதி இருக்கிறேன்.

இப்போது அங்கே அனுவலுக்குச் செல்பவர்கள் தங்க அறைகளும் வசதியாக அமைக்கப்பட்டிருக்கிறன.அவற்றைப் பார்ப்போம்.

நகர விடுதியின் முன்புற புகைப்படம் முன் இடுகைகளில் இடம்பெற்றுள்ளது.

இது குறுக்குவெட்டுத் தோற்றம். பாத்ரூம் & சமையற்கூடத்தின் பக்கம் இருந்து வந்தால் உள்ளே ஒரு வளவும் பக்கத்தில் ஒரு பெரிய கூடமும் மூன்று அறைகளும் கொண்டது இவ்விடுதி. பின் புறம் மாபெரும் போஜன் ஹால் உள்ளது. ஒரே நேரத்தில் 200 பேருக்கு மேல் சாப்பிடலாம்.

இக்கோயிலில் மகிழமரத்தடி ஆனந்த முனீஸ்வரர் குடி கொண்டிருப்பதால் இது திருக்கடையூருக்கு நிகராக சொல்லப்படுகிறது. இங்கே  59, சாந்தி , பீமரத சாந்தி, சதாபிஷேகம் , கனகாபிஷேகம் ஆகியன செய்து கொண்டால் அடுத்தடுத்து கனகாபிஷேகம் மகுடாபிஷேகம் செய்து கொள்ளும் அளவுக்கு ஆனந்த முனீஸ்வரர் ஆயுள் வழங்குவார்,  மிருத்யு நெருங்காது. ஆரோக்யம் நீடிக்கும் என்கிறார்கள்.

வெள்ளி, 12 அக்டோபர், 2018

மௌண்ட் ரோடு ஹோட்டல் ப்ளானட் க்ராண்டே.

அண்ணாசாலையில் தேனாம்பேட்டை டி எம் எஸ்ஸுக்கு எதிரில் அமைதிருக்கும் இது பட்ஜெட் ஹோட்டல். 2 ஸ்டார் ஹோட்டல். OYO மூலம்தான் புக் செய்ய முடியும். ரூம் ரெண்ட் 1400/- என நினைக்கிறேன்.

 தேனாம்பேட்டை டி எம் எஸ் எதிரில் இதன் மெயின் டோர் பக்கவாட்டில் உள்ளது. தங்கும் அறைகள் மேலே. மேல்மாடியில் காலை பஃபே.  தினம் காலையில் சப்ளிமெண்ட்ரி ப்ரேக்பாஸ்ட் உண்டு. ஆனால் இரண்டு மூன்று ஐட்டங்கள் மட்டும்தான். காஃபியோ டீயோ உண்டு.

இது ஏர்போர்ட் போக பக்கம்.பஸ் ஸ்டாப் எதிரில் உள்ளது. இங்கிருந்து பீச்சுக்கும் செல்லலாம்.

இரணிக்கோவில் தூண் சிற்பங்கள். - திராட்சையும் நரியும் பூச்சாடிகளும்.

சிற்பங்களுக்குப் பெயர்பெற்ற இரணியூர் ஆட்கொண்ட நாதர் சிவபுரந்தேவி திருக்கோவிலில் தூண் சிற்பங்களைத் தனியாகப் பதிவிட்டுள்ளேன்.

இது பற்றி முன்பே பல இடுகைகள் வெளியிட்டுள்ளேன். அவை கீழே அணிவகுக்கின்றன.

இக்கோவிலில் அஷ்டலெக்ஷ்மிகள் வெளியேயும் நவதுர்க்கைகள் உள்ளேயும் உள்ள வக்ர அமைப்பில் அமைந்துள்ளன. ஆட்கொண்டநாதரே நரசிம்மேஸ்வரராகவும்,  உக்கிரம் கொண்ட இரணியூர்க் காளியும் காளிக்கூத்தும், இரண்ய மல்யுத்தம், இரண்ய வதமும் நிகழ்ந்தது.   இன்னும் பல்வேறு சிறப்பும் கொண்டது இக்கோயில்.

அஷ்டலெக்ஷ்மி மண்டபத்தில் விநாயகர் முருகன் குழந்தைக்குப் பாலூட்டும் பெண் , யானை வாகனத்தில் இந்திரன், சித்திரக் குள்ளன், சூரியன், யாளிகள், தேவ பூத கணங்கள் , சிம்மங்கள் ஆகியோர் இடம் பெற்றிருக்கிறார்கள்.

பூச்சாடி !

வியாழன், 11 அக்டோபர், 2018

காதல் வனம் :- பாகம் .21. கழற்ற முடியாத கணையாழி.


காதல் வனம் :- பாகம் .21. கழற்ற முடியாத கணையாழி.

”இறகைப் போலே அசைகிறேனே உந்தன் பேச்சைக் கேட்கையிலே..குழந்தை போலே தவழ்கிறேனே உந்தன் பார்வை தீண்டையிலே. “  தொலைக்காட்சியோடு பாடிக்கொண்டிருந்தார் ஸாம். அவரது இரு கைகளிலும் நந்தனும் நந்தினியும் எச்சில் ஒழுகும் பொக்கை வாயோடு சிரித்துக் கொண்டிருந்தார்கள்.  அவர்கள் காலில் மாட்டியிருந்த மணித்தண்டையிலிருந்து ஜல் ஜல் என்ற ஒலி எழும்பிக் கொண்டிருந்தது.

”மானூத்து மந்தையிலே மான்குட்டி பெத்த மயிலே” என்று அடுத்த பாட்டை அவர் தொடரவும் கிக்கி கிக்கி என்றபடி இருவரும் அவரது கன்னத்தில் எச்சில் விரலால் தொட்டுச் சிரித்தார்கள். அவர் உடல் முழுதும் குழந்தை வாசம் அடித்துக் கொண்டிருந்தது. என்னவென்று விலக இயலாத மயக்கம் அவரை ஆட்கொண்டது.

தேவி அமர்ந்து இவற்றை எல்லாம் பார்த்துக் கொண்டிருந்தாள். அவர் குழந்தைகளை தங்கத்தாலே பூட்டி இருந்தார். கழுத்துச் சங்கிலி, ப்ரேஸ்லெட், இடுப்புச்சங்கிலி என தகதகவென ஜொலித்தார்கள் இருவரும். அவள் மேலும் குழந்தைகள் வாசம் அடித்துக் கொண்டுதான் இருந்தது.

புதன், 10 அக்டோபர், 2018

கண்களும் கண்மணிகளும் - ஒரு பார்வை.

கண்களும் கண்மணிகளும் - ஒரு பார்வை.

என்றென்றும் உலகத்தை வளர்க்கும் பெண் குலத்துக்குச் சமர்ப்பணம் செய்யப்பட்டிருக்கும் இந்நூலை எழுதியவர் பிரபல பத்ரிக்கையாளர் ப. திருமலை அவர்கள். அவர்களின் வழக்கமான பாணியில் துல்லியமான புள்ளி விவரங்களுடன் ஒரு ஆவணம் போன்ற நேர்த்தியில் தயாராகி இருக்கிறது இந்நூல்.

அட்டைப்படமும் தலைப்புமே இந்நூல் பற்றிய சுவாரசியமான வரைபடைத்தைத் தோற்றுவித்திருக்கிறது. ஆம் பெண்களும் குழந்தைகளும் எதிர்கொள்ளும் அனைத்துவிதமான ஏற்ற இறக்கங்களையும் இந்நூல் பேசுகிறது.

ஐப்பசி அன்னாபிஷேகக் கோலங்கள்.

ஐப்பசி அன்னாபிஷேகக் கோலங்கள்.

செவ்வாய், 9 அக்டோபர், 2018

பச்சை. மை க்ளிக்ஸ் (HERBAL) GREENS ( & ITS USES ) . MY CLICKS.

பொன்னாங்கண்ணிக் கீரை. கண் பார்வைக்கு நல்லது. மண்டி , பொரியல் வைத்து சாப்பிடலாம்.


திங்கள், 8 அக்டோபர், 2018

பச்சையா பயோ மார்க்கர்ஸா. (அ) பச்சை குத்துவது பண்பாடா இல்லை பயன்பாடு உண்டா.

பச்சையா பயோ மார்க்கர்ஸா. (அ) பச்சை குத்துவது பண்பாடா இல்லை பயன்பாடு உண்டா.
காது வளர்த்துப் பாம்படம் போட்டிருந்த சிகப்பி அக்கா கையில் ஒரு தேள் ஒன்று பச்சை குத்தப்பட்டிருந்தது. வெள்ளை வெளேர் என்றிருந்த கையைப் பிடித்த நான் அந்தத் தேளைப் பார்த்ததும் “ ஐயோ தேள்” எனக் கத்தினேன். சிகப்பி அக்கா கலகலவெனச் சிரித்தார். ”பயந்துப்புட்டியா. இது பச்சைதான் ஆத்தா. தேள் நம்ம அண்டப்புடாதுன்னு சொல்லிக் குத்துனது ” என்றார்.
ஆமாம் உண்மையிலேயே பச்சை குத்துவதால் நன்மை ஏதும் இருக்கா. இது கிட்டத்தட்ட நாலாயிரம் ஐயாயிரம் வருஷத்துக்குமுற்பட்ட தொன்மையான பழக்கம், மேலும் பனி தேசத்து மக்கள் கூடப் பச்சை குத்திக்கிட்டாங்கன்னு தெரிய வருது. மருத்துவரீதியா பார்த்தா இத அக்யுபஞ்சர் முறைன்னு சொல்லலாம். ஆனா பாதரசம் கலந்த நிறங்கள் பயன்படுத்தப்படுவதால் முழுதும் நல்லதுன்னு சொல்ல முடியாது.
பச்சை குத்துதல்னா என்ன. ஊசி முனையில் சிறிது பச்சை வண்ணத்தைத் தொட்டு தோலின் மேற்புறத்தில் துளையிட்டுச் செலுத்துவதுதான் பச்சை குத்துதல். இந்த நிறங்கள் தோலின் இரண்டாவது அடுக்குக்குச் சென்று தங்கி விடுவதால் அவை நிரந்தரமான பச்சை நிறத்தைக் கொடுக்கின்றன. இவற்றைப் போட்டபின்பு காற்றுப் புகாமல் கட்டி வைத்து பசை போல் ஒன்றைத் தடவி ஒரு மாதம் வரை பாதுகாத்தால் பச்சை குத்தியதால் ஏற்பட்ட புண்ணும் வலியும் நீங்கும். பொதுவா பச்சை குத்துவதை விட நீக்குதல் ( லேசர் மூலமாக இருந்தாலும் ) பல மடங்கு செலவும் , உடல் நோவும் கொடுக்கக் கூடியது. குத்திய பச்சையை நீக்க சுமாரா 20 தடவையாவது லேசர் செய்யவேண்டும் என்கிறார்கள்.

சனி, 6 அக்டோபர், 2018

காதல் வனம் :- பாகம் .20. ஸ்பைக் பஸ்டர்.


காதல் வனம் :- பாகம் .20. ஸ்பைக் பஸ்டர்.

”ஹேய் ஹேய் அண்ணனோட பாட்டு” என்று ரஜனி ஆடிக்கொண்டிருக்க முடி சிலும்பிச் சிலும்பி விழுந்தது. ஸாம் பெருமையோடு ராணியின் அருகிலும் ரூபாவதியின் அருகிலும் நின்று புகைப்படத்துக்குப் போஸ் கொடுத்துக் கொண்டிருந்தார். இரண்டு வாரங்கள் இங்குபேட்டரில் இருந்த அவரது குழந்தைகள் நாப்கினால் நன்கு சுற்றப்பட்டு ஸாம் கையிலும் ராணி கையிலும் இருந்தார்கள்.

அனைவரும் புகைப்படத்துக்காகப் புன்னகைத்து நகர்ந்ததும் அங்கே இருந்த தொட்டிலில் இருவரையும் படுக்க வைத்தார்கள் ஸாமும் ராணியும்.  ”எவ்ளோ தலைமுடி.” என்று. சிலும்பிக் கொண்டிருந்த தலைமுடியைத் தடவியபடி சொன்னார் நீலாக்கா.

“நந்தினியும் நந்தனும் அவர் கைகளுக்கருகில் குன்றிமணிக் கண்களைத் திறந்து நாக்கை உதப்பிச் சிரித்துக் கொண்டிருந்தார்கள். முகமெல்லாம் சிவந்து ரோஸ் நிறக் கன்னங்கள் மிளிர்ந்தன.

குழந்தையைப் பார்க்க வந்திருந்த உறவினர்களும் அவர்களின் முடியையே தொட்டுப் பார்த்துக் கொண்டிருந்தார்கள். ”ஸ்பைக்ஸ் ஹேர்ஸ்டைல் வைச்சமாதிரி எவ்ளோ முடி”.

ஃபேஸ்புக்கரும் குக்கரும்.

1901. ஜியோ கிடைக்காத இடங்களிலும் ஏர்டெல் நெட் கிடைப்பது வரம் .

1902. முகநூல் சண்டை சச்சரவுகளைப் பாக்கும்போது ஹைபர்நேஷனிலேயே இருந்து விடலாமா என்று இருக்கு. எதையும் போஸ்ட் செய்ய பயமா இருக்கு. டெரர் ..

1903. இரு இனிமைகளும் அழகு, ஒன்று போதவிழ்ந்த தமிழினிமை, இன்னொன்று சுயம் விரிந்த அக இனிமை.

1904. பிரிவோம்.. சந்திப்போம்.

1905. பிள்ளையாரை வச்சு ஆட்டம் பாட்டம்னு தினம் வாழ்க்கையைக் கொண்டாடிட்டு இருக்காய்ங்க. #க்ரேஸி_பஸவங்குடியன்ஸ்

1906. தொடுவதென்ன தென்றலோ..

வெள்ளி, 5 அக்டோபர், 2018

திருப்பத்தூர் திருத்தளிநாதர் ஸ்ரீயோகபைரவர் திருக்கோவில்.

காரைக்குடியில் இருந்து சுமார் 17 கிலோமீட்டர் தூரத்தில் உள்ளது திருப்பத்தூர். அங்கே திருத்தளிநாதர் கோவிலுக்குச் சென்றோம் ஒரு ஞாயிறு காலையில் .மிக தேஜஸோடு ஜொலித்த அக்கோயிலைப்பற்றிய புகைப்படங்களும் விபரங்களும் பகிர்ந்துள்ளேன்.

ஈசன்  திருத்தளிநாதர் . அம்பாள் சிவகாமி அம்மை. யோக பைரவர் எனப்படும் ஆதி பைரவர் வழிபாடு இங்கே விசேஷம். இறைவனை மகாலெக்ஷ்மி வணங்கியதால் திருத்தளி நாதர் எனப்படுகிறார். வால்மீகி இங்கே தவமிருந்து அவரை புற்று மூடியதால் இந்த ஊர் திருப் புத்தூர் எனலாயிற்று. மேலும் ஈசன் கௌரிதாண்டவம் ஆடிய திருத்தலம்.

அப்பனுக்கும் அம்மைக்கும் ஸ்கந்தருக்கும் பைரவருக்கும் வன்னிமர விநாயகருக்கும், திருநாகேஸ்வரருக்கும் தனித்தனிச் சந்நிதிகள்.  ஸ்தலவிருட்சம் கொன்றை, தீர்த்தம் ஸ்ரீ தளி தீர்த்தம். அகத்தியர் வணங்கிய அகத்திய லிங்கம் இருப்பதும் சிறப்பு
வெளியே பார்க்க சிறியதாகத் தெரிந்தாலும் உள்ளே முன் மண்டபம், அர்த்தமண்டபம், கருவறை ஆகியன கொண்ட பெருங்கோவில் இது.

சூரியபகவான் இடது புறம் வரவேற்கிறார்.

அபிதா. – ஒரு பார்வை.


அபிதா. – ஒரு பார்வை.

1970 களில் வந்த ஒரு நாவல், எண்பத்தி நான்காம் ஆண்டு படித்தது, இன்னும் மனதைக் குடையும் அற்புதத்தை என் சொல்ல. இந்த வருடமே இரண்டு முறை படித்துவிட்டேன். சொல்லவந்த விஷயமோ கைக்கிளைக்காதல். ஆனால் இளவயதுக் காதல்போல் அதில்தான் எவ்வளவு நெளிவு சுளிவு புரிதல், அதேசமயம் தவிர்க்கவொண்ணா தாகமும் அடக்கமாட்டா ஆசையும் வெடித்து விரியும் மோகமும், கிளர்ச்சிகொண்ட கோபமும் கூட.

காதலித்தவளின் மகளைக் காதலியாகக் காண்பது மட்டுமல்ல. இது தன்னைப் பற்றி எண்ணாமல் நிறம், வயது , உருவம் இவற்றை முழுமையாகப் பற்றிய காமம் கலந்த காதல்.

கரடிமலையில் சிறுவயதில் தான் காதல் கொண்ட சகுந்தலையைச் சூழ்நிலை காரணமாகப் பிரிய நேரிடுகிறான் அம்பி. அவன் சென்ற ஊரில் ஒரு வேலையும் முதலாளியின் மகளே மனைவியாகக் கிட்டுவதும் நிகழ்கிறது. இதெல்லாம் அதிர்ஷ்டத்தின்பாற்பட்டாலும் அவனது சிறுவயதுக் காதல் அவன் நெஞ்சில் பாரமாக இறங்கி இருக்கிறது. பசைபோட்டு அழுத்துகிறது. இறுக்கத்தோடே மனைவியுடன் வாழ்கிறான். ஆனால் அதே சமயம் மனைவியுடன் காமம் கொள்வது என்பதும் இயல்பாக நடக்கிறது. ஒருவர்மேல் ஒருவர் கொண்ட கோபத்தைத் தீர்க்கும் கழிமுனையாக ஒருவரை ஒருவர் எடுத்து விழுங்கும் கோபத்தீர்வாகக் காமம் அமைகிறது.

வியாழன், 4 அக்டோபர், 2018

புதன், 3 அக்டோபர், 2018

காரைக்குடிச் சொல்வழக்கு :- அப்புராணியும் உக்கிராணமும்.


1061.குடைக்கொசுவலை/தொட்டிக் கொசுவலை - குழந்தைகளைப் படுக்கையில் தூங்கவைக்கும்போது குடைக்கொசுவலை போட்டு வைப்பதுண்டு. தொட்டிலைச் சுற்றிக் கட்டவும் கொசுவலையை உயரமான பாவாடை போல் தைத்து உபயோகிப்பார்கள்.  

1062. கைப்பண்டம் கருணைக்கிழங்கு - கஞ்சம்பிடித்தவர் கையில் இருந்து ஒரு பொருளையும் வாங்க முடியாது. அவர்களின் கைப்பண்டத்தை அடுத்தவர்களுக்குக் கொடுக்க யோசிப்பார்கள். ஆனால் அடுத்தவர்களை தானம் செய்யும்படி வலியுறுத்துவார்கள். அப்படிப்பட்டவரைக் குறிப்பிடும்போது அவர்களின் கைப்பண்டம் கருணைக்கிழங்கு என்று சொல்வதுண்டு 

1063. அப்புராணி - அப்பாவி, ஒன்றும் அறியாதவர் , பழிபாவம் தெரியதவர், வெள்ளந்தி, வெகுளி, குற்றமற்றவர். 

1064. உக்கிராணம் - ஒரு விசேஷம் என்றால் அதற்குத் தேவையான மளிகை, அரிசி, பருப்பு பயறு வகைகள், காய்கறி , கனி, பால், தொன்னைகள், பாக்குமட்டைத்தட்டுகள், வாழை இலை, பழக் கப்புகள், முந்திரி, பாதாம், நெய், பழ டின்கள்,  போன்ற பொருட்களை ஓரிடத்தில் அல்லது ஒரு அறையில் சேர்த்து வைப்பார்கள். அதற்கு மொத்தமாக உக்கிராணம் என்று பெயர். இதை சமையல் ஆள் அல்லாத ஒருவரிடம் ஒப்படைத்து விடுவார்கள். அவர் அந்த விசேசத்தின் போது சமையலுக்குத் தேவையான பொருட்களை உக்கிராணத்தில் இருந்து அளந்து எடுத்துக் கொடுப்பார். இதைப் பொதுவாக பெண்கள் மேற்பார்த்துக் கொள்வதால் அவருக்கு உக்கிராணக்காரக்கா என்று பெயர்.

1065. ஊவுதி, உவ்வூதி, துண்ணூரு, விவூதி, திருநீறு, திருநீர் - நெற்றியில் மூன்று பட்டையாக இடும் சைவச் சின்னம், சிவச்சின்னம், விபூதி. 

திங்கள், 1 அக்டோபர், 2018

கர்வம் அழிந்த இந்திரன். தினமலர். சிறுவர்மலர் - 38.


கர்வம் அழிந்த இந்திரன்.

பதவி என்பது எப்பேர்ப்பட்டவரையும் ஆணவம் கொண்டவராக்கிவிடும் தன்மை வாய்ந்தது. சாதரண பதவி கிடைத்தவர்களே இப்படி என்றால் அமரர்களுக்கெல்லாம் தலைவனாகும் பதவி கிடைத்த இந்திரனுக்கு ஏற்பட்ட கர்வமும் அது எப்படி நீங்கியது என்பதையும் பார்ப்போம் குழந்தைகளே.

அமராவதிபட்டிணத்தை ஆண்டுவந்த இந்திரனுக்குத் தான் எல்லாரினும் மேம்பட்ட பதவி வகிப்பவன், தேவலோகத்தின் அதிபதி என்ற மண்டைக்கர்வம் ஏற்பட்டது. அதனால் அனைவரையும் உதாசீனப்படுத்திவந்தான். அமிர்தம் அருந்தியதால் தான் இறப்பற்றவன், ஈரேழு பதினான்கு லோகத்திலும் அதிகமான சம்பத்துக்களை உடையவன் என்ற இறுமாப்பில் இருந்தான்.

இந்திரசபையில் அவனுக்குக் கீழ்தான் அனைத்து தேவர்களும் கிரகங்களும் அமர்ந்திருப்பார்கள். ரம்பா, ஊர்வசி, மேனகை, திலோத்தமை, அப்ஸரஸ் கன்னிகளும் ததாஸ்து தேவதைகளும் அவனது கையசைவுக்குக் காத்திருப்பார்கள். கலா நிகழ்ச்சிகளும் கேளிக்கை கொண்டாட்டங்களும் அவன் விருப்பப்படிதான் நடந்துவந்தன. இப்படி இருக்கும்போது அவன் தன்னை விண்ணளவு அதிகாரம் கொண்டவனாக நினைத்துக் கர்வம் கொண்டான்.
Related Posts Plugin for WordPress, Blogger...