மீ டூ - சில குழப்பங்களும் சில புரிதல்களும்.

சென்ற சில நாட்களாக அதிகம் விவாதிக்கபடும் வார்த்தை - மீ டூ.

இந்த மீ டூ பற்றி - சில பிரபலங்கள் சொன்னால் அது டிவி டிபேட்டுக்கு உரிய விஷயம். அதில் இருக்கும் உண்மையை அவரவர்க்குத் தக்கபடி எடுத்துக் கொள்கிறார்கள் என்று தோன்றியது. இதில் ரேஸ், ஏஜ், க்ளாஸ் எதுவும் கிடையாது.

சாதாரணர்களுக்கு இல்லையா மீ டூ ப்ராப்ளம். ஏதேனும் ஒரு பருவத்தில் இதைக் கடந்தே இன்றிருக்கும் அனைவரும் வந்திருப்பார்கள். இதில் குழந்தைகளை பாலியல் சீண்டல் செய்தோர் பற்றி செய்தி அதிகம் வருகிறது. அதுவும் ஆண் குழந்தைகளை அவர்கள் குடும்பத்தைச் சேர்ந்த ஆண்களே சீண்டி இருக்கிறார்கள் என்பது அதிர வைத்த விஷயம்.

முகநூலில் பகிரப்படும் பல மீ டூக்கள் வேண்டாத முன்னாள் நண்பரைத் தாக்க ஒரு துருப்புச்சீட்டாகப் பயன்படுகிறது. “டீச்சர் இவன் என் சடையை பிடிச்சு இழுத்துட்டான் “ என்பதாகவே பல மீ டூக்கள் இருக்கின்றன.

உண்மையான மீடூவை சிலரே பகிர்ந்திருக்கிறார்கள். அது மிகப்பெரும் அதிர்ச்சியும் கண்ணீரும் அளித்த சம்பவம். இந்த மாதிரி மீ டூக்களில் அவர்கள் பண பேரத்துக்கு உட்பட்டு இழந்த பல லட்சங்கள் மட்டுமல்ல அடைந்த மனச்சோர்வும் மனச்சிதைவும் பதைக்க வைத்தது. மீண்டு எழுந்தவர்களைப் பார்க்கும்போது பிரமிப்பும் இன்னும் அவர்களுக்கு மனவலிமை பெருகவேண்டும் எனவும் வேண்டத் தோன்றியது.


பதின்பருவத்தில் சிலர் கடந்த இந்த மீ டூக்களில் சம்பந்தப்பட்டிருப்பவர்கள் தொடர் ரேப்பிஸ்டுகள் அல்ல. சந்தர்ப்ப சூழல் காரணமாக தவறு செய்தவர்கள். நெருங்கிய உறவினராய் இருக்கும் பட்சத்தில் அவர்கள் தண்டிக்கப்பட வேண்டும் என்பதில் எந்தக் குழப்பமும் இல்லை. ஆனால் மதிப்பிற்குரிய உறவினராய் இருக்கும்போது எப்படி தண்டிப்பது என்பதை சிந்திக்க வேண்டியது அவசியம். முதலில் பாதிக்கப்பட்டவரையும் பாதித்தவரையும் ஒரு கவுன்சிலிங்குக்கு உட்படுத்துவதுதான் சிறந்த தீர்வாக இருக்க முடியும்.

பிரபலமாயினும் சரி, சாதாரணர் ஆயினும் சரி ( டிவியில் )  இந்தப் பெண்கள்  மீடூவை ஏன் இத்தனை நாள் வெளியிடவில்லை, இன்றைக்கு என்ன புதிதாய்  என்று கேட்கிறார்கள். நான் யார் பக்கமும் வக்காலத்து வாங்கவில்லை என்றாலும் அந்தப் பெண்களின் பொறுமை எல்லை மீறியதன் விளைவே இது எனச் சொல்வேன். யாரிடம் சொல்வது , சொன்னால் எடுபடுமா என்ற தயக்கமும் பயமும் சிந்தனையும் ஆட்டிப் படைக்க அதை ஒரு சந்தர்ப்பம் கிடைக்கும்போது அதிரடியாய் வெளியிட்டு விடுகிறார்கள்.

சாதாரணர்களுக்கு நிகழும் மீ டூக்கள் அவர்களின் சமூக பயம் காரணமாக வெளிப்படுத்துவது தவிர்க்கப்படுகின்றன. இவற்றில் அநீதியின் எல்லை எது என்று வரையறுக்க முடியாவிட்டாலும் அவற்றை அவர்கள் தமக்குள்  தமக்குத் தெரிந்த வழியில் தீர்த்துக் கொள்கின்றனர்.

சமூக வலைத்தளங்களில் மற்றும் மீடியாக்களில் பணிபுரியும் பெண்கள் இதனை ஒரு முறையாவது சந்தித்து  இருக்கலாம். அளவீடுகள் வேறுபடலாமே தவிர அப்படி என்றால் என்ன என்று யாரும் கேட்டுவிட முடியாது. தற்காலிகப் பணியில் இருப்பவர்கள் இதைத் தவிர்த்து விட முடிகிறது. அல்லது விலகிவிட முடிகிறது. பாதுகாப்பான இடத்தில் வருமானம் குறைவு என்றாலோ அல்லது இல்லை என்றாலோ கூட பணி புரிவதில் எந்த வருத்தமும் இருப்பது இல்லை. எந்தக் காலத்திலும் இவர்களின் வருமானத்தை நம்பி குடும்பம் இல்லை என்பதும் ஒரு காரணம்.

ஆனால் நிரந்தரப் பணியில் இருப்பவர்கள்(  நிரந்தரமாக ஒரு ப்ராஜெக்ட் அல்லது நிறுவனம்)  அவர்களின் மேலதிகாரியின் இம்மாதிரி நடத்தையைப் ( தொடர்ந்து பணிபுரிய வேண்டிய சூழல், அவர் மிகுந்த நல்லவர் ஆனால் சிற்சில சமயம் எல்லை மீறுகிறார். , அதாவது இரட்டை அர்த்தத்தில் பேசுவது, தவறான பார்வை, தவறான வார்த்தைகள் ) பணியிடப் பாலியல் பலாத்காரம் என்ற பெயரில் புகார் செய்தால் தொடர்ந்து அவரோடு பணி புரிவது எப்படி. ? இதை விசாரிப்பவர்கள் இதற்குத் தகுந்த தீர்வளித்துள்ளார்களா. ?   இதற்கு நிறுவனங்களின் பதில் என்ன. ?