சிகப்பி இல்லத்தில் சில பாடல்கள்.

 ஆ.. காரைக்குடியிலா முதியோர் இல்லமா. அதுவும் நகரத்தார் குடும்பங்களிலா என்று திகைக்க வேண்டாம். இன்று பல்வேறு காரணங்களை ஒப்பு நோக்கும்போது முதியவர்கள் தங்க இவை பாதுகாப்பானவையாகவே எனக்குத் தோன்றுகிறது. இங்கே தங்குபவர்கள் மாதாந்திரக் கட்டணம் கட்டி மிகுந்த வசதியோடேயே தங்குகிறார்கள்.. ஹோம் அவே ஃப்ரம் ஹோம். பட் இட்ஸ் அ ஹோம்.. 

பெரிய வீடுகளில் தனித்தனியாகத் தங்கி வந்த பெரியவர்கள் பாதுகாப்புக் காரணங்கள் மற்றும் தனிமை கருதி இங்கே தங்கி இருக்கிறார்கள். வசதியானவர்கள். ஒரு மகன், ஒரு மகள் உள்ள பெற்றோர், அல்லது பிள்ளை இல்லாதவர்கள், கணவன் அல்லது மனைவி இழந்தவர்கள் இவர்களுக்கு கிட்டத்தட்ட 60 வயதில் இருந்தே உடல்நலக் கோளாறுகள் ஆரம்பித்து விடுவதால் எல்லா வேலைகளையும் முன்போல் தனக்குச் செய்து கொள்ள முடிவதில்லை. முக்கியமாக மூன்று வேளையும் சுடச் சுட சமையல்.

திருப்புகழும் உபதேசமும் சிவதீட்சையும்.

காரைக்குடி துபாய் நகர விடுதியில் திருப்புகழ் பாராயணமும் 961* உபதேசம் வழங்கலும் நடைபெற்றது.

கொஞ்சம் மலையும் கொஞ்சும் நீரும். மை க்ளிக்ஸ். HOGENAKKAL. MY CLICKS.

ஹொகனேக்கலில் பரிசலில் செல்லுமுன் சில விபரங்களைத் தெரிந்துகொண்டு செல்வது நல்லது.

பத்துவயதுக்குட்பட்ட குழந்தைகள் பரிசலில் செல்ல அனுமதி இல்லை.

உயிர்காக்கும் சட்டை அணியாமல் பரிசலில் செல்ல அனுமதி இல்லை.  

விடாமுயற்சிக்கு ஒரு பகீரதன். தினமலர். சிறுவர்மலர் - 28.

விடாமுயற்சிக்கு ஒரு பகீரதன்.

ஒரு விஷயத்தைச் செய்யப் பகீரப் ப்ரயத்தனம் செய்தேன் என்பார்கள் அப்படி என்றால் என்ன ? பகீரதன் என்ற மாமன்னன் கங்கையை இப்பூமிக்குக் கொண்டுவர பலவிதமான தவம் தியானம் இவற்றை ஓராண்டு ஈராண்டல்ல பல்லாயிரம் ஆண்டுகள் இயற்றினார். அதைத்தான் பகீரதப் ப்ரயத்தனம் என்கிறார்கள். 

அது எதற்காக என்று பார்ப்போம் குழந்தைகளே.

மமதையை அடக்கிய மகேசன். தினமலர். சிறுவர்மலர் - 27.

மமதையை அடக்கிய மகேசன்.

மனிதர்களுக்குத் தற்பெருமையும் தான் என்ற மமதையும் இருக்கக் கூடாது. மனிதர்களுக்கே இருக்கக்கூடாது என்றால் தெய்வீக அவதாரங்களுக்கு இருக்கலாமா. அதை மகேசன் எப்படி அடக்கினார் என்பதைப் பார்ப்போம் குழந்தைகளே.

வாட்ட சாட்டமான வயிறு பெருத்த குண்டோதரர்கள் இருவர் பந்தியில் சம்மணமிட்டு அமர்ந்து ’கல்யாண சமையல் சாதம் காய்கறிகள் ப்ரமாதம்’ என்று பாடாமலே வெளுத்துக் கட்டிக்கொண்டிருந்தார்கள். 

உருவுகண்டு எள்ளாமை வேண்டும்./அகந்தையை அழித்த உபேந்திரன். தினமலர் சிறுவர்மலர் - 26.

உருவுகண்டு எள்ளாமை வேண்டும்./அகந்தையை அழித்த உபேந்திரன்.

நர்மதை நதியின் கரை. அங்கே அஸ்வமேத யாகங்கள் ஒன்றல்ல. இரண்டல்ல.. நூறு யாகங்கள் ஒருங்கே நடைபெற்றுக் கொண்டிருந்தன. இந்திர பதவியை அடைந்தபின்னும் அதைத் தக்கவைத்துக் கொள்ள மஹாபலி மன்னன் இந்த ஹோமங்களை நடத்திக் கொண்டிருந்தான்.

அசுரகுல மன்னன் ஆனாலும் மஹாபலி அறநெறி தவறாதவன். பிரஹலாதனுடைய பேரன். தன்னால் எதுவும் முடியும் என்ற எண்ணம் கொண்டவன். சகல சம்பத்துகளும் கொண்ட அமராவதிப் பட்டணம் மஹாபலி மன்னனின் வசமாகிவிட்டது.  இந்திரனும் தேவர்களும் இந்திரபுரியைவிட்டு மறைவிடம் தேடித் தஞ்சம் புகுந்தார்கள்.

ஹோம சமித்துக்கள் மலைபோல் குவிக்கப்பட்டிருந்தன. அவிர்பாகங்களை அந்த அந்த தேவதைகள் பிரத்யட்சமாகி வாங்கிக் கொண்டார்கள். பூக்களும் பூஜா திரவியங்களுமாக மணத்துக் கொண்டிருந்தது அந்த இடம். ஹோம குண்டங்களில் இருந்து ஹோமப் புகை சூரியனைத் தொடுவது போல எங்கெங்கும்உயர்ந்து கொண்டிருந்தது.

அசுர குல குரு சுக்கிராச்சாரியாரின் மேற்பார்வையில் ஒவ்வொரு யாக குண்டத்திலும் பட்டும் பீதாம்பரமும் கொப்பரையும் வாசனைப் பொருட்களும் பூமாலைகளும் மணக்கப் பூர்ணாகுதி நடைபெற்றுக் கொண்டிருந்தது. பூர்ணாகுதி முடிந்ததும் யாசிப்பவர்களுக்கு வேண்டிய பொன்னும் பொருளும் கொடுத்து மஹாபலி அவர்களின் ஆசி பெறுவான்.

தினத்தந்தியில் விடுதலை வேந்தர்கள்.

தினத்தந்தியில் விடுதலை வேந்தர்கள் நூல் வெளியீடு பற்றி செய்தி வந்துள்ளது.

திருக்காளஹஸ்தி காளத்தியப்பர் கோவில்.

திருக்காளஹஸ்திக்கு ஒருநாள் மாலையில் செல்லும் வாய்ப்புக் கிடைத்தது. திருத்தணியில் இருந்து டாக்ஸி மூலம் சென்றடைந்தோம். மின்னும் வெய்யிலில் பளீரென்ற மூன்று நிலை வெண் கோபுரம் கண்ணைக் கவர்ந்தது. இன்னொரு புறம் எழுநிலை இராஜகோபுரம் இருக்கிறது. 

திருத்தணிகை முருகன் கோவில்.

திருத்தணிகைக்கு இந்த முறை சென்றபோதும் ( படியில் ஏறாமல் ) வாகனப் பிரயாணப்பாதையிலேயே சென்றோம்.  அது ஒரு காலை நேரம். மிக அழகாக வடிவமைக்கப்பட்ட முகப்பு ஆர்ச்சுகள் கம்பீரமாக நம்மை வரவேற்கிறது.

திருத்தணியைப் போல வெய்யில் கொட்டிய ஊரை நான் பார்த்ததே இல்லை. சும்மா உங்க வெய்யில் எங்க வெய்யில் இல்லை. இது தந்தூரி அடுப்பு கூட இல்லை சூளையில் செங்கல்லைச் சுடும் வெய்யில். ஆமா அந்த ஊரில் எப்படித்தான் எல்லாரும் இருக்காங்கன்னே தெரியல. :(

தினமலர் புத்தக உலகத்தில் விடுதலை வேந்தர்கள்.

தினமலரின் புத்தக விமர்சனப் பகுதியான புத்தக உலகத்தில் எனது ஏழாவது நூலான விடுதலை வேந்தர்கள் பற்றிய விமர்சனம் வெளியாகி உள்ளது. சக்தி என்பவர் மதிப்புரை எழுதி உள்ளார். அவருக்கு நன்றி.

தாப்பா கார்டனில் ஒரு மதிய உணவு.

இயற்கை அழகு கொட்டிக்கிடக்கும் காரைக்குடி அரியக்குடி சாலையில் அமைந்துள்ளது தாப்பா கார்டன். ரயில்வே ட்ராக் எதிர்ப்புறம் கடந்து வரவேண்டும்.

“தாலாட்டும் காற்றே வா.. தலை சாயும் பூவே வா.. “ என்று பாடிக்கொண்டே காரில் வரலாம். :)  ஏன்னா காரைக்குடி எங்க ஊராக்கும். கொள்ளை அழகாக்கும். :)

இந்த தாப்பா கார்டனில் ஒரு நாள் மதிய உணவருந்த சென்றோம்.

மிக அமைதியான சூழலில் தண்ணென்றிருக்கிறது தாப்பா கார்டன். இங்கே தங்குவதற்கும் அலுவலக மீட்டிங் போன்றவை நடத்துவதற்கும் பல்வேறு வசதிகளும் ஹால்களும் உள்ளன என்று சொன்னார்கள். ஏசி நான் ஏசி ரூம்ஸ், பார் வசதி, கார்பார்க்கிங் ( பிரம்மாண்டமான சோலையில் இதற்கென்ன பஞ்சம்  ) அமைதி, இயற்கை எல்லாம் இருக்கிறது.

உணவகம் தனியாக இருக்கிறது. அதன் எதிரேயே ஒரு நீச்சல் குளமும் நிர்மாணிக்கப்பட்டிருக்கிறது. உணவகத்தில் அந்தக்கால ஓவியங்கள் அழகூட்டுகின்றன.

எடுத்தவுடன் விநாயகர் கோவில்.

இன் & அவுட் பாதைகள். முன்புறம் பெரிய லான். & போர்ட்டிகோ.

ஸ்ரீரங்கம் ரங்கநாத ஸ்வாமி கோவில்.

ஸ்ரீரங்கம் ரங்கநாத ஸ்வாமி கோவில்

”ஸ்ரீரங்க ரங்க நாதனின் பாதம் வந்தனம் செய்யடி. ஸ்ரீதேவி ரங்க நாதனின் பாதம் மங்களம் பாடடி”. என்ற பாடல் அடிக்கடி நான் முணுமுணுப்பது. அதேபோல் குழந்தைகளைக் கொஞ்சும் போது “ ங்கா ங்கா ங்கா காவேரி ரங்கா கஸ்தூரி ரங்கா எங்கே இருக்குமாம் ரங்கம்பழம் . தீர்த்தக் கரைக்கும் திருவானைக்காவலுக்கும் நடுவிலே இருக்குமாம் என்னைப் பெத்த ரங்கம் பழம்” என்று கொஞ்சுவார்கள் காரைக்குடிப் பக்கம்.  மேலும் ஸ்ரீரங்கம் என்றால் ஸ்ரீரங்கத்து தேவதைகளும் ரங்கநாதன் ஆகிய சுஜாதாவும் நினைவுக்கு வராவிட்டால் நாம் என்ன எழுத்தாளர். ? 

108 வைணவத் திருத்தலங்களுள் ஒன்று. காவிரிக்கரையில் அமைந்திருக்கும் சிறப்புப் பெற்றது. ஏழு சுற்று மதில்கள், 21 கோபுரங்கள் மட்டுமல்ல. தென்னிந்தியாவிலேயே மிகப்பெரிதான இக்கோபுரம் தமிழக அரசின்  பண்பாட்டுச் சின்னமாகப் பொறிக்கப்பட்டுள்ளது. கம்பர் இராமாயணத்தை அரங்கேற்றியது இங்குதானாம். !

ஆடிப்பெருக்குக் கோலங்கள்.

ஆடிப்பெருக்குக் கோலங்கள்.

திருவானைக்காவல் ஜம்புகேஸ்வரர் கோயில்.

திருவானைக்காவல் ஜம்புகேஸ்வரர் கோயில்.

திருச்சி கோவில்கள் எல்லாம் பிரம்மாண்டமானவை. எவ்வளவு பிரம்மாண்டம் என்றால் இரண்டு இராஜ கோபுரங்கள் கொண்டவை. அதில் முதல் இரண்டு கோபுரங்களின் வழியாக ஆட்டோ போன்றவையும் வரும். இரண்டாவது கோபுரம் வழியாக கோயிலுக்கான பொருட்களைச் சுமந்து மெட்டாடர் வேன் சன்னிதிக்கு முன்பு வரை வரும். அம்மாம் பெரிசு. !!!

இக்கோயிலில் ஒரு சிறப்பு காலைச்சந்தி பூஜையில் கோ பூஜை நடக்கும். சங்காபிஷேகங்களும் பிரசித்தம். உச்சிக்கால பூஜை விமர்சையாக நடக்கும். அப்போது அர்ச்சகர் புடவை உடுத்தி க்ரீடம் அணிந்து மேளதாளத்தோடு யானை முன் செல்ல சுவாமி சந்நிதிக்கு வந்து பூஜை செய்வார். அர்ச்சகார் ரூபத்தில் அகிலாண்டேஸ்வரியே இறைவனை பூஜைசெய்வதாக ஐதீகம். பஞ்சபூத ஸ்தலங்களுள் ஒன்று இது. காவிரி நீர் இங்கே சந்நிதிக்கே வருகிறது. எனவே இது அப்பு ஸ்தலம்.

கல்வி வளர்ச்சி நாளில் விடுதலை வேந்தர்கள் வெளியீடு.

காரைக்குடி ராமனாதன் செட்டியார் நகராட்சி உயர்நிலைப் பள்ளியில் காமராஜர் பிறந்த நாளை முன்னிட்டு கல்வி வளர்ச்சி நாள் விழா   பேர்ல் சங்கமம் ரோட்டரியின் தலைவர் திரு. நாவுக்கரசு அவர்கள் தலைமையில் கொண்டாடப்பட்டது. இந்நிகழ்வில் ஒரு அங்கமாக என்னுடைய ஏழாவது நூலான ( சிறார்களுக்கானது )  ”விடுதலை வேந்தர்கள்” வெளியிடப்பட்டது.  திரு பாகை கண்ணதாசன் அவர்கள் வெளியிட ரோட்டரியின் தலைவர் திரு. நாவுக்கரசு அவர்களும் ரோட்டரி கவர்னர் திரு. முத்துக்குமார் அவர்களும் பெற்றுக் கொண்டார்கள்.

இந்நிகழ்வில் ரோட்டரி சங்கத்தினரும்,  தலைவரும்,  பெற்றோர் ஆசிரியர் சங்கத்தலைவர் திரு சகாய அமலன் அவர்களும் வாழ்த்துரை நல்கினார்கள்.  பொற்கிழிக் கவிஞர் திரு நாகப்பன் அவர்களும், சுசேந்திரன் என்னும் மாணவன் ஒருவனும் கவிதையில்  வாழ்த்துரை நல்கினார்கள்.

தேவகோட்டை சேவுகன் அண்ணாமலை கல்லூரியின் பேராசிரியரும் பட்டிமன்ற நடுவருமான  திரு பாகை கண்ணதாசன் அவர்கள் பெருந்தலைவர் காமராஜர் பற்றி சிறப்புரை நல்கினார்கள். திரு பாகை கண்ணதாசன் அவர்களின் பேச்சும் கவிஞர் திரு நாகப்பன் அவர்களின் கவிதையும் வெகு சிறப்பு. நினைவில் இருத்தியவற்றைப் பகிர்ந்துள்ளேன்.

திருக்குறள் ஒப்புவித்தல் போட்டியில் பரிசு பெற்ற மாணாக்கருக்குப் பரிசுகள் வழங்கப்பட்டன. விடுதலை வேந்தர்கள் நூலின் 25 பிரதிகளை பேர்ல் ரோட்டரி சங்கத்தலைவர் திரு. நாவுக்கரசு அவர்கள் வாங்கி அங்கேயே மாணவர்க்குப் பரிசளித்தார்கள். !

இவை அனைத்தும் கீழேயும் விரிவாகக் கொடுத்துள்ளேன்.

கல்விக்கண் திறந்த காமராஜருக்கு மரியாதை. மாணவக் கண்மணிகள் பூத்தூவி வணங்குகிறார்கள்.

வரவேற்புரை கூறி இந்நிகழ்வை  ஆசிரியை திருமதி கோமதி ஜெயம் அவர்கள் தொகுத்து வழங்கினார்கள்.

ஆறாம், ஏழாம் வகுப்பு மாணவர்கள் கலந்து கொண்ட இக்கூட்டம் மிக அமைதியாகவும் கட்டுக்கோப்பாகவும் நடைபெற்றது.  பேச்சாளர்களின் உரையைக் கவனித்து சரியான தருணத்தில் கைதட்டினார்கள். ஊன்றிக் கேட்டதுமல்லாமல் கேட்டவற்றுக்குத் தக்க பதில் சொல்லி அசரடித்தார்கள்.

சாட்டர்டே ஜாலிகார்னர். வாசிப்பை நேசிக்கும் சரஸ்வதி காயத்ரி.

என் பெயர் சரஸ்வதி காயத்ரி வீட்டில் காயத்ரி .வெளியில்( official பெயர் சரஸ்வதி). சென்னை ,மடிப்பாக்கம்( அரசு) பள்ளியில் ஆசிரியை. 27 வருட பணி அனுபவம். சிறுவயதிலிருந்தே புத்தகங்கள் படிப்பதில் ஆர்வம் அதிகம். திருமணமானவுடன் குடும்பம்,குழந்தைகள் ,வேலை என வாசிப்பது நின்று இப்பொழுது ,2015ல் முகநூல் வந்தப்பிறகு இழந்த ஆர்வங்களையெல்லாம் மீட்டெடுத்திருக்கிறேன். அதில் வாசிப்பது தலையாயது.

சரஸ்வதி காயத்ரி என் முகநூல் தோழி. புத்தகங்களை வாசிப்பதிலும் அவற்றை மென் இறகால் தொடுவது போல மென்மையாக விமர்சிப்பதிலும் வித்தகி. சொல்லப்போனால் இவருக்கு கவிதைத் தொகுதிகள்தான் பிடிக்கும். வண்ணதாசனின் கவிதைகள் பிடிக்கும்.

இவர் தனது உறவினர்கள் பற்றி எழுதும் அனைத்தும் மனம் தொட்டவை. உறவுகளின் நெருக்கத்தையும் அன்பையும் வாசித்துக் கண்ணைக் கசியவிட்டவை. வீடு பற்றிய இவரது கவிதை என் உயிரைத் தொட்ட ஒன்று. வீடு என்பது சிதிலமானாலும் அதில் வாழ்ந்த அன்பு இன்னும் உயிர்த்துக்கொண்டிருக்கிறது இவரது எழுத்தில்.

இனி சாட்டர்டே ஜாலி கார்னருக்காக நான் இவரிடம் சிறுகதை, கவிதைகள் பற்றிய இவரது பார்வையைக் கேட்டிருந்தேன். அவர் கூறியதை இங்கே அளித்திருக்கிறேன்.

///பாவண்ணனின் " துங்கபத்திரை" படித்துக்கொண்டிருக்கிறேன்.
நந்தனார் படத்தில் தண்டபாணி தேசிகரின் குரலைப்பற்றி அவர் எழுதியிருப்பதை படித்தவுடன் படிப்பதை நிறுத்தி விட்டு பாடல்களை கேட்க ஆரம்பித்து விட்டேன்.துக்கப்பிரவாஹத்திலிருந்து மீள்வதற்கு படிக்க ஆரம்பித்து மீண்டுமொரு துக்கத்தில்..

ஆத்தங்குடி நகரச் சிவன்கோவில்.

ஆத்தங்குடி நகரச் சிவன் கோவில்

ஆத்தங்குடி நகரச் சிவன் கோவிலில் சமீபத்தில்தான் கும்பாபிஷேகம் முடிந்தது. ஏப்ரல் மாதம் என நினைக்கிறேன். கோபுரங்கள் புதுப்பொலிவுடன் ஜொலிக்க சுற்றிலும் நூற்றுக்கணக்கான யாகசாலைகள் காட்சி அளித்தன. எல்லா வகையிலும் ( வட்டம் , சதுரம், தாமரை, இதயம் ஆகிய வடிவங்களில் ) யாக குண்டங்கள் அமைக்கப்பட்டிருந்தன. 

திருச்சி தாயுமானசுவாமி கோயில்.

தாயுமான சுவாமிகள் கோவில்.

தாயுமான சுவாமி கோவிலுக்கு முன்பே ஒருமுறை சென்றிருக்கிறோம். எனது உறவினர் ஒருவருக்குக் குழந்தை பிறந்தவுடன் இங்கே வாழைப்பழத்தாரை வேண்டுதலாக அளித்தார்கள். அதை ஒரு கயிறில் கட்டி ஆட்டி தீபம் காட்டி திரும்ப எங்களுக்கே அளித்தார்கள். அதில் இருந்த வாழைப்பழங்களை அங்கே படியேறி வந்தவர்களுக்குப் பிரசாதமாக அளித்தபடியும் நாங்களும் எடுத்துக்கொண்டு திரும்பினோம்

பாசம் பெரிதெனப் போராடிய மேருமலை. தினமலர். சிறுவர்மலர் - 25.

பாசம் பெரிதெனப் போராடிய மேருமலை.

தொம் தொம் என அதிர்கின்றன உலக்கைகள், மாமிச மலைபோல் படுத்திருக்கிறான் ஒருவன். கொர் கொர் என்ற குறட்டை ஒலி காற்றில் அதிர்கிறது. அவன் விடும் குறட்டையிலும் மூச்சுக் காற்றிலும் அவனது கரிய மீசைகள் அசைகின்றன கருத்த உதடுகள் விரிய வாய்பிளந்து உறங்குகிறான். கடுமையான உறக்கம். ஒரு நாள் அல்ல இரண்டு நாள் அல்ல. ஆறு மாதங்களாகப் போகின்றன அவன் தூங்க ஆரம்பித்து.

எந்த அசைவுமில்லாமல் நித்திரை கொண்டிருக்கிறான் அவன். அவனை எழுப்ப யானைகள் சூழ்ந்து நிற்கின்றன. பாகன்கள் அங்குசத்தால் குத்தி யானைகளை இயக்குகிறார்கள். அவை  படுத்திருப்பவனைத் தம் தும்பிக்கை கொண்டு புரட்டுகின்றன. வீரர்கள் கதம், தண்டம், சூலம் கொண்டு அவனை பல்வேறு திசைகளில் இருந்தும் குத்தி எழுப்புகிறார்கள். கழுதைகளைக் கத்தவிட்டுச் சத்தம் எழுப்புகிறார்கள். டம் டம் என்ற சத்தம் கேட்கிறது அவன் படுத்திருக்கும் மாளிகையின் விதான மாடமெங்கும்.

திருப்பட்டூர் பிரம்மபுரீஸ்வரர் கோயில்.

திருப்பட்டூர் சென்றால் வாழ்க்கையில் திருப்பம் நிகழும் என்பார்கள். அதே போல் அன்றிலிருந்து நம் தலையெழுத்தும் மாற்றி  சிறப்பாக எழுதப்படுகிறதாம். திருச்சியிலிருந்து முப்பத்தைந்து கிலோமீட்டரில் ( சமயபுரத்தில் இருந்து பதினைந்து கிலோமீட்டர் தொலைவில் ) இருக்கிறது திருப்பட்டூர் பிரம்மபுரீஸ்வரர் திருக்கோயில். இங்கே ஒரு விசேஷம் தினமும் சூரிய ஒளி பிரம்மபுரீஸ்வரரின்மேல்பட்டு  அவரைத் தரிசித்து வணங்குகிறது.

இங்கே தினமும் பிரம்மனுக்கு சிறப்பு பூஜை நடைபெறுகிறது. சிவன் சந்நிதியிலிருந்து ப்ரகாரத்தில் சிவனுக்கு வலப்புறம் தெற்குத் திசையில் தனி சந்நிதியில் கிழக்கு நோக்கி அமர்ந்திருக்கிறார் பிரம்மா. இவருக்கு மஞ்சள் பூசி விசேஷபூஜை நடக்கிறது. இந்த பூஜை கட்டாயம் காணவேண்டிய ஒன்று. அன்று வியாழக்கிழமையாகவும் அட்சய திரிதியையாகவும் அமைந்தது வெகு சிறப்பு. எனவே ஏழரைக்கு மேல் அபிஷேகமும் அலங்காரமும் நடந்தது

தங்கமாய் ஜொலிக்க. ( நமது மண்வாசத்துக்காக )

செம்பிலிருந்து தங்கமாகுங்கள்.

காரைக்குடியில் துபாய் நகர விடுதி.

காரைக்குடி செஞ்சையில் புதிய விடுதி ஒன்று 951* துபாய் வாழ் நகரத்தார்களால் அமைக்கப்பட்டுள்ளது. ஏற்கனவே காரைக்குடியில் 952* சிங்கப்பூர், 953* பினாங் நகரத்தார் விடுதிகள் உள்ளன.

இது நாகநாதபுரம் பெருமாள் கோயிலுக்கு எதிரில் அமைக்க்கப்பட்டுள்ளது. கோயிலுக்கு எதிரில் உள்ள புஷ்கரணியின் 954* ஈசான்யப் பக்கம் நாவன்னா புதூர் செல்லும் வழியில் ( அன்னை சத்யா நகர் என்னும் பொட்டலுக்கு அருகில் ) அமைக்கப்பட்டுள்ளது.

 இது மெயின் ஹால்.

துபாய் நகரத்தார் சங்கத்தின் முன்னாள் தலைவரும் மூத்த உறுப்பினருமான திரு சொக்கலிங்கம் அவர்களின் பெருமுயற்சியாலும் துபாய் வாழ் நகரத்தாரின் நன்கொடைகளாலும் கட்டப்பட்டுள்ளது இந்த விடுதி. சொல்லப்போனால் இது அவர்களுடைய நெடுநாள் விஷன் என்றுதான் சொல்ல வேண்டும்.

பழம்பெரும் வீடுகள்.

கானாடுகாத்தானில் மட்டுமல்ல பல்வேறு ஊர்களிலும் 941* பழம்பெரும் வீடுகள் பராமரிப்பின்றி சிதலமடைந்து வருகின்றன. அவற்றை எல்லாம் பாதுகாத்து ஆவணப்படுத்தலாம். அதோடு யாரும் வசிக்காததாலே அவை பாழ்படுகின்றன. அவற்றுக்கும் ஆன்மா இருக்கிறது. வயதான பெற்றோர் போலத் தனித்திருக்கிறது வீடு. அவற்றைப் புதுப்பித்து ஹெரிட்டேஜ் ஹோம்களாக மாற்றலாம்.

இந்த வீட்டில் காலிங் பெல் மிகப் பழமையானது. :)

திருச்சி மலைக்கோட்டை உச்சிப்பிள்ளையார் கோவில்.

திருச்சி மலைக்கோட்டை உச்சிப்பிள்ளையார் கோயில்.

திருச்சி மலைக்கோட்டைக்குப் போகும்போது தெரியாது உச்சிப் பிள்ளையார் நிஜமாகவே மிக மிக உச்சியில்தான் இருக்கிறார் என்று. கல்லூரிப் பருவத்தில் ஒருமுறை சென்ற போது மலையைச் சுற்றி இருக்கும் கடைகளில் ஷாப்பிங் செய்துவிட்டுத் திரும்பி விட்டோம். சில ஆண்டுகளுக்கு முன்பு போகும்போதும் திருச்சி ஏர்ப்போர்ட்டில் நெருங்கிய உறவினரை ரிசீவ் செய்ய சென்றதால் தாயுமான சுவாமி சந்நிதிக்கு மட்டும் சென்று வணங்கி வந்தோம்.

கீழே மாணிக்க விநாயகர் அருள் வழங்குகிறார். அவரை ஒட்டியும் ஒரு பாதை. அதன் பின்னும் மலையில் ஒரு மலைப்பாதை. ஒரு பையன் சைக்கிள் எல்லாம் ஓட்டிப் போனான். சிலர் டூ வீலரிலும். ஆமா இவங்க எல்லாம் எங்கேருந்து எங்கே போறாங்க. இத்தனையையும் தாங்குதா அந்த மலை. ( ஏன்னா தாயுமானவர் ( சிவன் )  சந்நிதியைச் சுற்றிலும் ஏகப்பட்ட மண்டபங்கள், பழைய மண்டபங்கள், புது மண்டபங்கள், சந்நிதிகள், இதுல மலைக்குகைகள், ( பல்லவர் கால & பாண்டியர் கால ) குடைவரைக் கோயில்களும் நாயக்கர் கால கோட்டை ஒன்றும் இருக்காம் ! ) கர்நாடகப் போரில் இக்கோட்டை முக்கியப்பங்கு வகித்ததாம் !

சாட்டர்டே ஜாலி கார்னர். சுபஸ்ரீமோகனும் ஷி ஹுவாங்க்டி அளித்த சீனப்பெருஞ்சுவரும்.

தங்கை சுபஸ்ரீ மோஹன் முகநூலில்தான் அறிமுகம் என்றாலும்  எங்கள் நட்பு ஏழெட்டு வருடங்களுக்கு மேற்பட்டது. இவர் பெய்ஜிங்கில் வசித்து வருகிறார்.

சீனா அண்ணன் தேசம் என்ற நூலாசிரியர். இந்த நூலை இவர் சென்னையில் வெளியிட்ட நிகழ்வில் எங்கள் முகநூல் தோழமைகள் எல்லாம் கலந்து கொள்ள நான்மட்டும் கலந்து கொள்ள இயலவில்லையே என்ற வருத்தம் இருந்தது.

அதைத் தீர்க்க அவரிடம் பலமுறை இந்தச் சீனாவைப்பற்றி ஏதேனும்  சாட்டர்டே ஜாலி கார்னருக்காக எழுதிக்கொடுங்கள் என்று மன்றாடி  ( ! ) இருந்தேன். ஒருவழியாக டைம்கிடைத்து என் ஞாபகம் வந்து இன்று எழுதி அனுப்பினார் சுடச் சுட அந்த சீனப்பெருஞ்சுவர் இடுகை உங்களுக்காக இங்கே. :)

அன்பும் நன்றியும் தங்காச்சி :)

ஆனந்தம் யூத் ஃபவுண்டேஷனின் அற்புத சேவைகள்.

ஆனந்தம் யூத் ஃபவுண்டேஷனின் அற்புத சேவைகள்.

”என்னம்மா உனக்கு ஸ்காலர்ஷிப் கொடுத்தா நல்லா படிப்பியா.”

”எனக்கு ஸ்காலர்ஷிப் கொடுக்காட்டியும் பரவாயில்லை. என்னை விட கஷ்டப்படுற நிறையப்பேர் இருக்காங்க. அவங்களுக்கு கட்டாயம் கொடுங்க. உங்க உதவி தேவைப்படுறவங்க நிறைய இருக்காங்க. ” என்று கண்ணீர் விட்டு அழுது தனக்கு வந்த உதவியைக் கூட இன்னொருவருக்கு விட்டுக்கொடுத்த அச்சிறுமி மிகவும் எளிய குடும்பத்தைச் சேர்ந்தவள். இதைக் கேட்ட அந்த ஃபவுண்டேஷன் சார்பாக இந்தக் குழந்தைகளை நேர்காணல் நடத்திய என் உறவினர் கண்களிலும் கண்ணீர்.

மாமல்லபுரம் கலைச் சிற்பங்கள்.

மாமல்லபுரத்தில் கலை பண்பாட்டுத்துறை இருக்கிறது. அங்கே பல்வேறு வகையான சிற்பங்கள் இருக்கின்றன. அவற்றை முழுமையாக எடுக்க முடியவில்லை. ஏனெனில் அன்று அங்கு செல்ல அனுமதி இல்லை. கிடைத்தவற்றை சுட்டிருக்கிறேன். அதோடு முன்பே எடுத்தவையும் வருகின்றன. 

சுவரில் செதுக்கப்பட்ட எல்லா சிற்பங்களின் மேலும் சித்திரக்குள்ளர்கள் காட்சி அளிப்பது அழகு. பல்லவப் பேரரசன் மாமல்லன் நரசிம்மனின் சிற்பம் மட்டும் கறுப்பு நிறத்தில் காட்சி அளிக்க மற்றவை எல்லாம் சுண்ணாம்பு/வண்ணம் அடிக்கப்பட்ட மாதிரி இருக்கின்றன. சிம்ம யாளிகளும் தூண் நாகங்களும் ( காரைக்குடித் தூண்கள் போல ) காட்சி அளிப்பது சிறப்பு. 

இனி இந்தியத் தொல்பொருள் ஆய்வுத்துறையின் குறிப்புகள் தொடர்கின்றன. 

சமயபுரம் மாரியம்மன் கோவில்.

சமயபுரம் மாரியம்மன் கோவில்.

பால்குடமும் மதுக்குடமும் பூச்சட்டியும் சுமந்து சென்று கொண்டிருந்தார்கள் திருச்சி மக்கள். இது கிட்டத்தட்ட 3 நாட்களாகத் தொடர்ந்து நடைபெற்று வந்தது. திங்கள், செவ்வாய், புதன். பங்குனிப் பால்குடம். 

திருச்சியில் இருந்து பதினைந்து கிலோமீட்டர் தொலைவில் கண்ணனூர் என்னும் இடத்தில் கோயில் கொண்டிருக்கிறாள் மாரியம்மா. ஸ்ரீரங்கத்தில் வைஷ்ணவியாக இருந்த அம்மன் தான் மாரியம்மனாக இங்கே கோயில் கொண்டிருக்கிறாளாம். தீர்த்தம் மாரி தீர்த்தம். ஸ்தலவிருட்சம் வேப்பமரம். நானூறு ஆண்டுகளுக்கு முற்பட்ட கோவில் இது.

என் சின்னப் பையனுக்கு இங்கே முடி இறக்க வந்திருக்கிறோம். பல்லாண்டுகளுக்கு முன். அப்போதே கூட்டமும் கடைகளுமாக இருக்கும். இப்போது இன்னும் அதிகமாகிவிட்டது. இங்கேயிருந்து திரும்பும்போதுதான் தமாஷாகி விட்டது. எங்கள் வீட்டில் குடி இருக்கும் காளிமுத்து அக்கா என்பவரைத் துணைக்கு அழைத்துக் கொண்டு இங்கே முடி இறக்க வந்தேன். முடி இறக்கியபின் நேரே ஸ்ரீரங்கம், திருவானைக்காவில் வணங்கிவிட்டு காரைக்குடி பஸ் ஏற வேண்டும். அன்று பந்த் தினம் வேறு,

பஸ் ஸ்டாண்டுக்கு வந்து சூரிய ஒளியில் போர்டு மின்ன காரைக்காலா காரைக்குடியா எனத் தெரியாமல் ஏறி அமர்ந்தாச்சு. உட்கார்ந்திருந்த ஒருவர் கூட காரைக்குடிப் பக்கம் மாதிரித் தெரியவில்லை. அக்கா சொன்னார். மூணு வயசுப் பையனுக்கு எதுக்கு டிக்கெட்டு ? நான் எடுக்கிறேன் கொடு என்றார்.

மதினாத் ஜுமைரா சந்தையில் மணல் ஒட்டகம். - DUBAI SAND ART.

துபாயில் பல்வேறு விதமான மால்கள் பிரசித்தமானவை. சில மால்களில் மட்டுமே நம்மைப் போன்றோர் பொருட்களை வாங்க முடியும். சில மால்கள் ரொம்ப காஸ்ட்லி. அது இண்டர்நேஷனல் பயணிகளுக்காக அதிக விலையுடன் (யூரோக்களுக்காகக் காத்திருக்கும்) இருக்கும் அலங்கார மாளிகைகள்.  எல்லாமே ஷோகேஸில் வைக்கும் அலங்காரப் பொருட்கள்தான்.

சூக் மதினாத் ஜுமைரா என்ற மாலில் இது போன்ற கலைப்பொருட்கள் கொட்டிக் கிடக்கின்றன. அதே போல் அங்கே சில உணவுக் கடைகளும் இருக்கின்றன. ஒரு சில பேக்கரிகளும் சாக்லேட் தயாரிக்கும் கடைகளும் இருக்கின்றன. ஆனால் எல்லாம் ஆனைவிலை, டைனோசர் விலை, திமிங்கிலம்  விலைதான்.

ஒரு நாள் என் தம்பியுடன் நண்பர் & சகோதரர் எழுத்தாளர் கவிமதியும் உடன் வந்து இந்த மால்களை எங்களுக்குச் சுற்றிக் காட்டினார்.  நன்றி கவிமதி சகோ & மெய்யப்பன். :)

இங்கே எதையுமே வாங்கக்கூடாது என்று எச்சரித்தே கூட்டிச் சென்றார் ஏனெனில் ஏதும் வாங்க வேண்டுமென்றால் சொத்தையே எழுதி வைக்கவேண்டுமாம். :)

மஞ்சள் ஒட்டகம் பாருங்க. இது மெட்டலால் ஆனது.

மிக உயர மர விதானங்கள். செண்ட்ரலைஸ்ட் ஏசி.

லாண்டர்ன் எனப்படும் மின்சார தொங்கு ( ஹரிக்கேன்)  லாந்தர்கள்.

ஃபிலிப்பினோ பெண் விற்பனையாளர்.

கடை தப்பாமல் ஒட்டகச் சிலை இருக்கிறது.

எல்லாவற்றிலும் விண்டோ ஷாப்பிங்தான் :)

இதோ சுற்றி சுற்றி மாலைச் சுற்றிக் கடைசியாக இந்த மணல் ஒட்டகம் ( சாண்ட் ஆர்ட்) செய்யும் கடைக்கு வந்துவிட்டோம்.

இது சாப்பாட்டுக் கூடம்.

இது ஜுமைரா சிட்டி. பாம் ஜுமைரா பில்டிங் தூரத்தே அழகாகக் காட்சி அளிக்கிறது.

ஜுமைரா சந்தையின் வெளிப்பகுதி. இங்கே நீர் நிலைகள் எல்லாம் இருக்கின்றன. படகுகளும் ஓட்டுகிறார்கள். இந்த எண்பட்டை தாமரையின் உள்ளே ஒரு வெண் தாமரையும் இதழ் விரித்திருக்கிறது. எல்லா இடங்களிலும் தண்ணீரை நிரப்பிக் குளிர்வித்திருந்தார்கள்.

பார்க்கும் இடமெல்லாம் பேரீச்சை மரங்கள் வேறு. பச்சை பேரீச்சை, அரக்கு பேரீச்சை , ஃப்ரெஷ் பேரீச்சை எல்லாம். அதெல்லாம் இன்னொரு போஸ்டில் போடுவேன். :)

அங்கே படங்கள் நடக்கும் தியேட்டர் ஹாலும் இருக்கிறது.

இந்தத் தாழ்வாரங்களில் ஒளி ஊருடுவும் வண்ணம் அமைக்கப்பட்டிருக்கு. இது துருக்கிய பெர்சிய இஸ்லாமியக் கட்டிடக்கலை பாணியில் கட்டப்பட்டிருக்கு.

திரும்பிப் போவோம் வாங்க. சாண்ட் ஆர்ட் ஆர்ட்டிஸ்டிடம் அம்மாவும் அப்பாவும் மணல் ஒட்டக ஓவியம் வாங்க ஆர்டர் கொடுத்திருந்தாங்க.  சுமாரா மூன்று ஒட்டகம் வரைந்து கொடுக்க 500 ரூபாய். நம்மூரு காசில். பத்து திர்ஹாம் என்றால் 170 . அது ஒரு ஒட்டகத்துக்கு.

அவர் எங்களுக்காக ஒட்டகம் செய்ய நாங்க வெயிட்டிங்.

ஒரு கண்ணாடிக்குடுவையில் கலர் மணல்களை பக்குவமாக ஒரு மினி ஃபனலில் ( FUNNEL )  கொட்டி அதன் சைடில் சிறு குழாய் ( மினி ப்யூரட் சைஸ் அல்லது மினி நீள இங்க் ஃபில்லர் சைஸ்.) வழியாக அந்த கறுப்பு மணலை சைடில் கொட்டி ஒரு குச்சி மூலம் சரசரவென ஒட்டகங்களை உருவாக்குகிறார்கள். கையில் இருக்குது வித்தை. மேலே பாருங்கள் ஒரு பாலைவனமே படைத்துவிட்டார் அந்த ஓவியர்.

இந்த மணல் பாட்டிலில் செட் ஆனதும் கலைவதும் இல்லை அழிவதும் இல்லை. பத்திரமாக பாலிதீன் பையில் போட்டு எடுத்து வந்தோம். அம்மா வீட்டுக்குச் செல்லும்போது அந்த ஓவியத்தை புகைப்படம் எடுத்துப் பகிர்கிறேன்.

ஒட்டகத்தைக் கட்டிக்கோ என்ற பாட்டு அசந்தர்ப்பமாக ஞாபகம் வந்துகொண்டே இருந்தது. 

கார் பார்க்கிங்.

நல்ல வழுவழுவென்ற கார் பார்க்கிங் தளங்களை முதன் முறையாக நான் துபாயில்தான் பார்த்தேன்.

ஒன் திர்ஹாம் மால், லூ லூ மால் எல்லாம் புகைப்படம் எடுக்கலை..

வெளிநாட்டுப் பயணிகளைக் கவரும் விதத்தில் அமைக்கப்பட்டிருக்கு ஒவ்வொரு மாலும். பெட்ரோல் தீர்ந்தாலும் அவர்களுக்கு மால்கள் வருமானத்துக்கு வழி வகுக்கும். அவ்ளோ அழகு மால்கள்.

அடுத்த போஸ்ட்களில் துபாய் மால், எமிரேட்ஸ் மால், இபுன் படாடா மால் எல்லாம் பார்க்கலாம்.

திருவண்ணாமலை அருணாசலேஸ்வரர் கோயில்.

அடிமுடி அறியவொண்ணா அண்ணாமலையாரை தரிசிக்கவில்லையே என பலகாலம் ஏங்கி இருக்கிறேன். அதற்கான வாய்ப்பு சில மாதங்களுக்குமுன் கிட்டியது.

அடி அடியாய் கிரிவலம் வரும் வாய்ப்பும் கிட்டியது. அடேயப்பா கிட்டத்தட்ட 18 கிலோமீட்டர்கள். ஒரு பௌர்ணமி இரவில் கிழக்கு கோபுர வாசலில் ஆரம்பித்து ( சுமார் 7 மணி இருக்கும். ) இரவு இரண்டரை மணிக்கு கிரிவலம் முடித்து தங்கியிருந்த ஹோட்டலுக்கு வந்து சேர்ந்தோம். மறுநாள் மாலைதான் எழுந்து திரும்ப கோயில் தரிசனம் செய்தோம்.

கட்டாயம் ஒருமுறை சென்று தரிசிக்க வேண்டிய கோவில் இது.

அடிமுடி அறியவொண்ணா அருணாசலராக ஜோதிஸ்வரூபமாக எழுந்தருளி இருக்கிறார் அண்ணாமலையார்.

அயனும் அரியும் அரனின் அடிமுடி அறிய அன்னமாகவும் வராகமாகவும் உருமாறித் தேடுகிறார்கள்.

அப்போது அரனின் சிரசில் இருந்து பல்லாண்டுகளாக விழுந்து வந்து கொண்டிருந்த தாழம்பூவிடம் பிரம்மன் தான் முடியை தரிசித்ததாக பொய் சாட்சி சொல்லும்படி வேண்டுகிறார்.  அது பொய் சொல்ல சம்மதிக்கிறது.

அரனிடம் அப்படிச் சொல்லும்போது வெகுளும் அவர் தன் பூஜையில் இனி தாழம்பூவிற்கு இடமில்லை சாபமளிக்கிறார். பொய் சொன்ன பிரம்மனுக்கும் உருவ வழிபாடு இல்லை என சாபமளிக்கிறார்.

சிவலிங்க ரூபத்தில் மட்டும் அடிப்பாகம் பிரம்மாவாகவும், நடுப்பாகம் விஷ்ணுவாகவும் மேற்பாகம் சிவனாராகவும் காட்சி அளிக்க அருள்கிறார்.

இந்நிகழ்வை நினைவுகூறும் விதமாக வருடந்தோறும் கார்த்திகைமாதத்தில் பரணி நாளில் தீபத்திருவிழா நடைபெறுகிறது. திருவண்ணாமலையில் மலை மேல் ஜோதி ஏற்றப்பட லட்சக்கணக்கில் மக்கள் வந்து ஈசனை தீபத்தில் தரிசிக்கின்றனர்.

இங்கே உள்ள சத்திரங்களில் பதினோரு நாட்கள்  சாமி தரிசனம் செய்வதற்காகத் தங்குவதாக வேண்டிக் கொண்டு தங்குபவர்கள் உண்டு. காரைக்குடியில் நிறைய பேருக்கு அருணாசலம் என்ற பேர் உண்டு. என் அன்பிற்குரிய அப்பத்தா வீட்டு ஐயா பேரும் அதுதான்.  என் சகோதரன் பேரும் அதுதான்.

ஜோதியாய் அப்பன் இருக்க அவன் நெற்றியில் உருவான தீப்பொறியால் உண்டானவன் முருகன். அவனுக்கும் இங்கே ஸ்பெஷல் வழிபாடுதான்.

இக்கோயில் அருணகிரி நாதர் வழிபட்ட தலம். இத்தல முருகனுக்காக திருப்புகழை நாமணக்கப் பாடியுள்ளார். தனித்தனிச் சந்நிதிகள் உள்ளன.

அருணாசலத்தின் மகிமையையும் அருணாசலேஸ்வரரின் மகிமையையும் எழுதித் தீராது. மிகப் பெரும் லிங்க மூர்த்தி. அம்பாள் சிட்டுப் போல காட்சி அளிக்கும் உண்ணாமுலையம்மன். சொப்புப் போல கண்கவர் உருவம்;

பல்வேறு சந்நிதிகள், பல்வேறு கடவுளர்கள், சிவனே பல்வேறு திருநாமங்களில் உறையும் இடம். மேலும் கோயிலைச் சுற்றிலும் பல்வேறு சமூகத்தாரின் மடங்கள், சமய மடங்கள், சாமியார் மடங்கள் மட்டுமல்ல சாமியார்களின் சமாதிகளும் காட்சி அளிக்கின்றன.

கிரிவலம் அன்று மட்டும் லட்சக்கணக்கில் புனித யாத்ரீகர்கள் வந்து வணங்கிச் செல்கிறார்கள்.

பாதை முழுவதும் சாமியார்கள் சித்தர்கள் நடைபாதை உணவு , இயற்கை மருந்து வியாபாரிகள் , அன்னதானக் கொட்டகைகள், இது போக கார்ப்பரேட் சாமியார் மடங்களும் திசைக்கொன்று இருக்கிறது.

ஒவ்வொரு திசைக்கும் ஒவ்வொரு லிங்கம். அப்பு, வாயு, தேயு , ஈசான லிங்கம் என்று கிட்டத்தட்ட ஒன்பது லிங்கங்கள். ஒவ்வொரு இடத்திலும் கியூவும் கூட்டமும்தான்.

இது போக காளி, முனீஸ்வரர் போன்ற உக்கிர தெய்வங்களும் , சனீஸ்வரர் போன்ற கிரகங்களும் தனிக்கோயிலில் காட்சி அளிக்கின்றார்கள். ஆதிபராசக்தி, ஆஞ்சநேயருக்கும் தனிக்கோயில்கள் இருக்கின்றன.

ப்ளாஸ்டிக் பொருட்களில் இருந்து இயற்கை மூலிகை வேர் வரை அனைத்தும் கிடைக்கிறது.

போலீசாரின் பூத் அங்கங்கே காவல் கண்காணிப்போடு செயல்படுகிறது. நல்ல விஷயம். ஆனால் முக்கிய விஷயம் ஆட்டோ, கார், டூவீலர் போன்ற வண்டிகள் கிரிவலப் பாதையில் மட்டுமல்ல ஊருக்குள்ளே கூட அனுமதிக்கப்படுவதில்லை.  கிரிவலம் ஆரம்பித்து விட்டவர்கள் முடித்துத்தான் வெளியே வந்து ஆட்டோ போன்றவற்றில் ஏறலாம் . இல்லாவிட்டால் திரும்ப நடக்க தெம்பு வரும்வரை  நடைபாதையிலேயே அமரவேண்டியதுதான்.

பலர் கான்வாஸ் ஷீ போன்றவை அணிந்து நடக்கிறார்கள். காற்றில் மூலிகை வாசமும் பௌர்ணமியின் பால் வாசமும் அங்கங்கே தூபத்தின் வாசமும் கலந்து நம்மேல் ஒரு தெய்வீகச் சாயலைப் படரவிடுகிறது.

பஸ் ஸ்டாண்டுக்கு பலகாத தூரம் முன்பே இறக்கி விட்டு விடுகிறார்கள். பௌர்ணமி அன்று ஊருக்குள்பஸ் போகாதாம்.