அன்ன பட்சி - அணிந்துரையில் கனிந்துரைத்த சுசீலாம்மா.

நன்றி அதீதம் சிறப்பான முன்மொழிதலுக்கு. :-

 மிக்க நன்றி சுசீலாம்மா..

////எம்.ஏ.சுசீலா
[எழுத்தாளர்,மொழிபெயர்ப்பாளர்,தமிழ்ப்பேராசிரியர்-பணி ஓய்வு(பாத்திமாக்கல்லூரி)] :

அன்னப்பட்சியை நீவியபடி…..

*கொப்பளித்துப் பெருகும் உற்சாகமும் மலர்ச்சியும் கொண்ட பதின்பருவத்துப் பெண்ணாக, வேதியல் மாணவியானாலும் சமகாலப்படைப்புக்களின்பால் தணியாத தாகம் கொண்ட வாசகியாக, தினம் ஒரு கவிதையை எழுதிப் பார்த்தபடி மலர்ந்து கொண்டிருக்கும் துடிப்பான படைப்பாளியாக….இப்படிப் பல பரிமாணங்களில் ‘80களில் எனக்கு அறிமுகமாகியிருந்த என் அன்பு மகளும் மாணவியுமான தேனம்மை லட்சுமணனின் இன்றைய வளர்ச்சிக்கு உரைகல்லாகக் கைகளில் தவழும் ’அன்னப்பட்சி’யைப் பரிவோடு நீவித் தந்தபடி இந்த அணிந்துரை……

*கால வெள்ளத்தில் எதிர்நீச்சல் போட்டுக் கரையேறியாக வேண்டிய கட்டாய நிர்ப்பந்தங்களில் இளமைப்பருவத்தில் நம்மில் துளும்பிக் கொண்டிருந்த ஆர்வங்களைப் பலரும் தவற விட்டு விடுகிறோம். கரைந்தும், நீர்த்தும், தொலைந்தும் போய்விடாதபடி அவற்றைத் தன் உள்ளத்தில் அக்கினிக்குஞ்சாய் அடைகாத்து, உரிய தருணம் கனிந்தபோது அவற்றுக்கு வெளிப்பாடும் தர முயன்றிருக்கும் தேனம்மையை எண்ணும்போது உண்மையிலேயே பெருமையாய் பெருமிதமாய் உணர்கிறேன்.

ஒரு பத்திரிகையாளர்,விமரிசகர்,கட்டுரை,சிறுகதை ஆக்கங்களை உருவாக்குபவர்,வெற்றிகரமான வலைப்பதிவர் என்று பல முகங்கள் இருந்தாலும் தேனம்மையின் தேடல் உள்ளம் நிறைவு காண்பது கவிதைக்குள்ளேதான் என்பதன் நிரூபணம் அவரது கவிதைத் தொகுப்பான ‘அன்னப்பட்சி’. ’


*‘அன்னப்பட்சி’ தொகுப்பிலுள்ள கவிதைகள் ஒற்றை இலக்கை மட்டுமே குறிவைப்பவை அல்ல; ஒற்றைப்பரிமாணம் கொண்டவையும் அல்ல. சமூகப்பார்வை, தனிமனித அவசங்கள் ஆகிய இரண்டுக்கும் ஒத்த இடம் தந்திருப்பவையாக வெவ்வேறு உள்ளடக்கங்களுடன் மலர்ந்திருப்பதனாலேயே வேறுபட்ட ரசனை கொண்ட வாசகர்களின் கவனத்தை ஈர்க்கக்கூடிய தன்மை இயல்பாகவே இவற்றுக்கு அமைந்து விடுகிறது.


* நீரை ஒதுக்கிப் பாலை மட்டும் பருகும் அன்னங்களும் நம் நெஞ்சில் நிலைத்திருப்பது போலத் தேனம்மையின் அன்னப்பட்சியிலிருக்கும் அருமையான சொல்லாட்சிகளும் பொருள் நுட்பங்களும் நம் உள்ளங்களில் என்றென்றும் கல்வெட்டாய் உறைந்திருக்கும். எதிர்காலத்தில் இன்னும் பல சிறப்பான ஆக்கங்கள் தேனம்மையிடமிருந்து வெளிப்பட இந்த அன்னப்பட்சி இலக்கிய ஆர்வலர்களிடம் தூது செல்லட்டும்.


**—————
அன்னப் பட்சி
பக்கங்கள்:96; விலை: ரூ 80
வெளியீடு: அகநாழிகை பதிப்பகம்
கிடைக்கும் இடம்:
சென்னை புத்தகக் கண்காட்சியில்.. அரங்கு எண் 667 & 668
அகநாழிகை புத்தக உலகம்,
எண்: 390, அண்ணா சாலை, KTS வளாகம், முதல் தளம்,
சைதாப்பேட்டை, சென்னை – 15.
தபாலில் வாங்கிட: aganazhigai@gmail.com

டிஸ்கி 1. :- இந்த அணிந்துரையை ஜனவரி 2014 அதீதம் இணைப்பிலும் காணலாம். 

 டிஸ்கி .2.:-
”அன்ன பட்சி” கவிதைத் தொகுப்பைக் கூரியர் மூலம் பெற.

சென்னைக்கு -- புத்தக விலை 80+ கூரியர் சார்ஜ் 20 = 100 ரூபாய்

மற்ற ஊர்களுக்கு - புத்தக விலை 80 + கூரியர் சார்ஜ் 45 = 125 ரூபாய்

இணையத்தில் வாங்க.

.http://aganazhigaibookstore.com/index.php?route=product/product&product_id=1795

http://aganazhigaibookstore.com/index.php?route=product%2Fproduct&product_id=1795 — with Thenammai Lakshmanan.

By post aganazhigai@gmail.com

என் நூல்கள் கிடைக்குமிடம். :- 

Aganazhigai book store.
390, Anna Salai,
KTS valagam, 1 st floor,
saidapet ,
Chennai – 15.

By post aganazhigai@gmail.com

டிஸ்கவரி புக்பேலஸ் , சென்னை
விஜயா பதிப்பகம் கோவை
மீனாக்ஷி புக் ஸ்டால் , மதுரை
அபிநயா புக் சென்டர், சேத்தியா தோப்பு
வம்சி புத்தக நிலையம்  , திருவண்ணாமலை
அகநாழிகை புக் சென்டர் , சென்னை.  

சி. சு. செல்லப்பா கதைத் தொகுதி 1 & 2 ..

சி. சு. செல்லப்பாவின் கதைத் தொகுதிகள் ஒன்று மற்றும் இரண்டையும் கல்லூரிக் காலத்தில் படித்திருக்கிறேன். அதைப் பற்றிய குறிப்புக்களும் எடுத்து வைத்திருக்கிறேன். ரொம்ப யதார்த்தமான வரிகளில் பதிவு செய்யப்பட்டிருக்கும் கதைகள் அவை.எளிமையும் அழகியலும் நிறைந்த கதைகள். தீர்வை நம்மிடமே விட்டுவிடும் கதைகள்.

அவை பற்றிய சிறு குறிப்பு :-

தொகுதி ஒன்றில் 12  கதைகள் இருக்கின்றன.

1. ஸரசாவின் பொம்மை :- அத்தானும் பொம்மை.

2. குருவிக் குஞ்சு - விடுதலை.

3. பாத்யதை - தங்கையின் மணம் முடிந்தபின் ரயிலில்

4. கனவின் எதிரொலி - சிலம்பில் பாண்டியன் மனைவி.

5. புதியவள் - மணம் முடித்த பெண்

6. ஆறுதல் - குழந்தை தூங்கியபின் முத்தமிடல்

7. நொண்டிக் குழந்தை - நொண்டியின் பரபரப்பு

8. ஞாபகம் - தங்கை புருஷனுக்கு மறுமணம். குழந்தை-  ராதா.

9. வந்தே மாதரம் -  போலீஸ்காரன்.

10. கொண்டுவந்த சீர் - குழந்தை.

11. தீர்மானம் - மூன்றாம் தாரம் பெண் பார்க்கப் போக முடியாது எனத் தீர்மானம்

12. வேண்டாத விடுதலை. - கிளி - கூண்டுக் கிளிக்குக் கூண்டே உலகம்.


தொகுதி இரண்டில்  9 கதைகள் இருக்கின்றன.

1. வாழ்க்கை :- மயானக்காரன் கூட செத்துப் போன உயிரைப் பற்றிப் பொறுப்பற்று பிணத்தைக் கிளறுதலும் பாட்டுப்பாடுதலுமான கதை.

2. ஒரு சந்தர்ப்பத்தில் :- கணவன் மனைவி சண்டை. மனைவி கொழுந்தன் ஊர் போன பின் அலங்கரித்துக் கொள்ளல் .

3. மூடி இருந்தது. :- சிறைக்கைதிக்கு உயிர் போன பின்பு உலகக் கதவு மூடி இருந்தது. ( அது ஒரு தூக்கு தண்டனைக்கைதி பற்றிய கதை என்று ஞாபகம். )

4. என்ன சம்பந்தம் :- மனைவியும் எதிர்வீட்டுத் தாசியும் ஒரே நேரத்தில் கனகாம்பரம் வாங்குவதைக் கணவன் எதிர்த்தல்.

5. அர்த்தமற்ற கோபம். :- பட்டிக்காட்டு மனைவி மேல் கோபம். அவள் அலங்காரம் கண்டு வியப்பு. ( டாலி பொம்மை )

6. சட்டத்துக்கு மிஞ்சி :- சிறையில் வேறொருவர் இறந்து போதல். அவருக்கு ஏ க்ளாசுக்கு மாற்ற உத்தரவு.

7. அறுபது :- அறுபது வயதாகியும் தாத்தா ஆகாமை. முடிவில் தாத்தா ஆகப் போகும் பெருமை.

8. வெள்ளை - நாய்.. எஜமானன் வீட்டு நாயைக் காப்பாற்றுவது.

9. இருவிதம் :- டாமி அலட்சியமாய்ப் பணம் எறிதல். பிச்சைக்காரனிடம் ( ஏழைச் சிறுவனிடம் ) போலீஸ்காரன் தட்டிப் பறித்தல்.


டிஸ்கி :- மிகப் பல வருடங்களுக்கு முன்பு படித்ததால் சரியாக ஞாபகமில்லை. ஆனால் ரசித்த கதைகளைச் சிறு வார்த்தையில் குறிப்பெடுப்பது, பிடித்த வரிகளை அடிக்கோடு இடுவது என்பது  அப்போதெல்லாம் ஒரு வழக்கமாக இருந்தது. இவை என் தமிழன்னை கொடுத்த புத்தகம் என்பதால் இப்போது என்னிடம் இல்லை. ஆனால் இவற்றின் படிவுகள் மனதில் எங்கோ உறைந்திருக்கின்றன.

அனைவருக்கும் கல்வி. ( RIGHT TO EDUCATION ):-

அனைவருக்கும் கல்வி. ( RIGHT TO EDUCATION ):-

குழந்தைகளைப் படிக்க வைப்பதற்காகக் காசு கொடுக்கிறார்கள். எங்கே என்றா கேட்கிறீர்கள். அமெரிக்காவில்தான். ரோலண்ட் ஃப்ரேயர் ஜூனியர் என்ற பொருளாதார நிபுணர்தான் இந்த வித்யாசமான கல்விப் பரிசோதனையில் ஈடுபட்டிருக்கிறாராம்.

வகுப்பில் நன்கு படிக்கும் மாணவர்களை ”ஏ” என்றும் கொஞ்சம் சுமாராகப் படிக்கும் மாணவர்களை “பி ”என்றும் இருபிரிவாகப் பிரித்து  சுமாராகப் படிக்கும் மாணவர்கள் நன்கு படித்தால் ஊக்கத்தொகை வழங்கிப் பார்த்தார்கள். ஆனால் ரிசல்ட் என்ன வென்றால் ஆரம்பத்தில் சூப்பராகப் படித்த அந்தப் பிள்ளைகள் நாளடைவில் பழையபடிதான் படித்தார்கள்.

இதிலிருந்து காசு கொடுத்துக்  கல்வியை வாங்க முடியாது என்று தெரிகிறது.இயல்பாகப் படிப்பின் மீது தானாக ஆர்வம் வந்தால் ஒழியப் படிக்க வைக்க முடியாது என்பது நிரூபணமாகி இருக்கிறது.

தமிழகத்தில் சமச்சீர் கல்வி, செயல்முறைக் கற்றல் கல்வி என்று முயன்று பார்க்கிறோம். இது நன்கு பரவலாக செயல்பட்டாலே போதும். அனைவர்க்கும் ஒரே மாதிரியான கல்வி கிடைக்கும். அதே சமயம் ஒரே மாதிரியான கல்வித் தரமும் கிடைக்கச் செய்ய வேண்டும்.

அரசுப் பள்ளிகளில் ஸ்டேட் போர்டு சிலபஸ், தனியார் பள்ளிகளில் மெட்ரிக்குலேஷன் கல்வி மற்றும் சென்ட்ரல் போர்டு சிலபஸ் சிஸ்டம், இது தவிர இண்டர்நேஷனல் கல்வி முறை ( STATE BOARD,  METRICULATION, CBSE ( வித்யா மந்திர், கேந்திரீய வித்யாலயா, ) , ICSE,) ஆகியன இந்தியாவில் புழக்கத்தில் உள்ளன.

இப்படி இந்த பள்ளிக் கூடங்களையும் கல்வி முறைகளையும் பார்த்தால்  பெருங்குழப்பம்தான் ஏற்படும். மெக்காலே வகுத்த முறைப்படி இன்னும் கல்வி கற்பிக்கப்படுகிறது. தனி மாணவனின் ஐக்யூ, மூளைத் திறன் , ஏற்புத்திறன் கொண்டு கற்பிக்கப்படுவதில்லை.

பெங்களூருவில் அனைவருக்கும் கல்வி என்ற திட்டம் அமல் படுத்தப்பட்டுள்ளது.  அதன்படி அனைவருக்கும் கல்வி வழங்க அரசுப் பள்ளிகளில் போதிய இடம் இல்லை. எனவே இந்த  இட நெருக்கடியை சமாளிக்க கர்நாடக அரசே தனியார் பள்ளிகளில் அரசுப் பள்ளியில் படிக்கும் குழந்தைகளுக்கு கல்வித் தொகையை வழங்கிப் படிக்க வைக்கப் போகிறது. இதற்காகக் கல்வி மானியமாக   900 கோடி ரூபாய் வழங்கத் திட்டமிட்டுள்ளது கர்நாடக அரசு. அதனால் பக்கத்தில் இருந்த பள்ளியில் மூன்று நாட்களாக அதற்கான விண்ணப்படிவம் வாங்கப் பெரும் கூட்டம்.

அரசுப் பள்ளியில் படித்த பிள்ளைகள் அரசாங்கச் செலவில் தனியார் பள்ளிகளில் உயர்ந்த கல்வி பெறலாமல்லவா. இதற்கு ஈடாக அரசுப் பள்ளிகளின் கல்வித்தரத்தையும் உயர்த்த வேண்டும் . படித்ததை எல்லாம் பேப்பரில் வாந்தி எடுக்கும் நிலை மாற வேண்டும்ஒவ்வொன்றையும் . முடிந்தவரை செயல் முறைக் கற்றல் மூலம் கற்பித்தல் நன்று.

முஸ்லீம் குழந்தைகள்தான் கர்நாடகாவில் பள்ளிக் கல்வி அதிகம் பெறுவதில்லை என்று சொல்கிறார்கள். ஒவ்வொரு வருடத்திலும் கிட்டத்தட்ட 50, 000 மாணவர்கள் பள்ளியிலிருந்து வெளியேறுகிறார்கள். இத்தனைக்கும் இங்கே உருது மீடியமும் கன்னட மீடியமும் இருக்கிறது. இதற்காகக் கர்நாடக அரசு பெரும் முயற்சி எடுக்க  இப்போது அது குறைந்து இன்னும் அதிக முஸ்லீம் குழந்தைகள் கல்வி பெறுகிறார்கள்.

ஆசிரியர்களின் பற்றாக்குறையும் ஒரு காரணம். இதை நீக்க இன்னொரு ஆச்சர்யகரமான விஷயம் என்னன்னா ஜேபி மோர்கன், ஹெச்டிஎஃப்சி போன்ற நிறுவனங்களில் பணியாற்றிய இளம் தலைமுறையினர் வேலையை விட்டு விட்டு ஆசிரியப் பணிக்கு வந்திருக்கிறார்கள். அது தம்மைப் புதுப்பித்து இருப்பதாகக் கூறுகிறார் இது போன்ற உயர் சம்பளம் வரும் வேலையை விட்டு விட்டு மும்பைப் பள்ளி ஒன்றில் ஆசிரியையாகப் பணி புரியும் சௌம்யா சுரேஷ்.

குழந்தைகளின் பள்ளிக்கூடப் பைகளின் கனத்தைக் குறைப்பதற்காக என் ஜி ஓ ஒன்று லைட் வெயிட் பாக்குகள் வழங்க முடிவெடுத்துள்ளது. மேலும் ஒவ்வொரு பருவத்துக்கும் உள்ள புத்தகங்களைப் பிரித்து வெளியிட வேண்டுமென்றும், மேலும் அதிக புத்தகங்களை சுமந்து வரச் சொல்லும் கல்வி நிறுவனங்களுக்கு ஃபைன் விதிக்க வேண்டுமென்றும் கோருகின்றன. சுத்தமான தண்ணீரைப் பள்ளியில் வழங்குவதன் மூலம் அதைக் குழந்தைகள் சுமக்க நேர்வதைத் தடுக்கலாம் என்று கூறுகின்றன.

மதிய உணவுத் திட்டங்கள், உடைகள், பள்ளி நோட்டுக்கள் வழங்குவதன் மூலமும், கல்வி மானியம் வழங்குவதன் மூலமும் குழந்தைகளைப் படிக்க வைக்க அரசுகள் பெரும் முயற்சிகள் எடுத்து வருகின்றன.

இதன் ஒரு படியாக மாணவர்களின் வாழ்வைச் செம்மைப்படுத்திய சிறந்த ஆசிரியர்களுக்கு விருதுவழங்கி கௌரவித்து வருகிறார்கள். டீச்சர்ஸ் டே அன்று டீச்சர்ஸ் எக்ஸலன்ஸுக்காக ( TAFET - TEACHERS AWARD FOR EXCELLENCE IN TEACHING)  இண்டராக்ட் கவர்னர் ஹெச் ஆர் பரத்வாஜ் பெங்களூரு பேலஸில் ஆசிரியைகளுக்கு விருது வழங்கி கௌரவித்துள்ளார்.

ஆசிரியைகள் அனைவரும் நெகிழ்ந்து கூறியது குழந்தைகளுக்குக் கற்பிப்பது போன்ற இன்பமான செயல் வேறேதுமில்லை என்றும், நான் டீச்சராக நேர்ந்தது ஒரு வாய்ப்பு, குழந்தைகளுக்கு படிப்பை மட்டுமல்ல வாழ்க்கையைப் பற்றியும் போதிக்க முடிகிறது. அவர்கள் முகத்தைத் தினம் பார்க்கும்போது  நாம் ஒரு குழந்தையின் வாழ்வை உருவாக்குகிறோம் என்ற மனத் திருப்தி ஏற்படுகிறது என்று சொல்லி இருக்கிறார்கள்.

ரோபாடிக் கல்வி, கம்ப்யூட்டர் கல்வி போன்றவற்றைக் கொண்டுவருவதில் கர்நாடக அரசு தீவிரம் காட்டி வருகிறது. இதன்படி ரோனக் ஜெயின், க்ளென் இம்மானுவேல், ஸ்மிர்னா இவாஞ்சலின் என்ற மூன்று மாணவர்களுக்கு இரண்டு வருடங்களாக ரோபாட்டிக்ஸ் கற்பிக்கப்பட்டு இப்போது  அவர்கள் சென்சார் மூலம் இயங்கும் காற்று ஆலை விசிறியை இயக்கியுள்ளார்கள். இன்னும் நான்கு ரோபோக்களையும் வயர்லெஸ் மூலம் மடிக்கணினியில் ஆணையிட்டு இயக்கும் திறம் பெற்றிருக்கிறார்கள்.

உலகளாவிய கல்வி முறையில் ஆசிய மாணவர்கள்தான் கற்றுக் கொள்வதில் முன்னணியில் இருக்கிறார்களாம். சிங்கப்பூர், ஹாங்காங், தாய்வான், சௌத் கொரியா, ஜப்பான் ஸ்விச்சர்லாந்து ஆகிய நாட்டைச் சேர்ந்த மாணவர்கள்தான் கணித அறிவில் முதலிடங்களில் இருக்கிறார்கள்.

அமெரிக்கச் குழந்தைகளை விட இந்தியச் குழந்தைகள்தான்  உலகளாவிய அறிவிலும் சிறந்து விளங்குகிறார்கள். யதார்த்த வாழ்க்கையையும் எளிதாக அணுகுகிறார்கள். பத்தில் ஒன்பது பெற்றோர்களுக்குத் தன் பிள்ளையின் கல்வி பற்றியும் எதிர்காலம் பற்றியும் பாசிட்டிவான கண்ணோட்டம் இருக்கிறது. படித்தால்தான் முன்னேறலாம் என்பதைப் பிறப்பிலிருந்தே சொல்லிக் கொடுத்து விடுகிறோமே. பிறந்தவுடனே பெயரை கேஜெட்டில் பதிந்தவுடன்  நல்ல பள்ளிக் கூடங்களில் அப்ளிக்கேஷன் பார்ம் வாங்குவதுதானே  இந்திய மிடில் க்ளாஸ் குடும்பத் தலைவன் செய்யும் அடுத்த செயல்  .

குழந்தைகளைத் தானாகக் கற்க ஊக்குவிக்க வேண்டும் என பையோகான் இண்டியா நிறுவனத்தின் சேர்மன்  கிரண் மஜூம்தார் டைம்ஸ் ஆஃப் இந்தியாவின் NIE  (NEWS PAPER IN EDUCATION ) யில் பேசும்போது  கூறி இருக்கிறார்.  ப்ரொஃபசர் ஈன்ஸ்கிராஃப்ட் அறிவியலைக் கற்கும் விதம் பற்றிக் கூறுகையில்  மிகக் கடினமான பௌதீகத்தைக் கார்ட்டூன் மூலம் கற்பிக்கலாம் எனக் கூறி இருக்கிறார்.

நன்கு படிக்கும் குழந்தைகள் தன்னுடைய வகுப்பில் உள்ள மற்ற பிள்ளைகளுக்குப் புரியும்படி செமினார் வகுப்புகள் எடுப்பதன் மூலம் தன்னையும் செழுமைப்படுத்திக் கொள்ள முடிகிறது, மற்றவர்களுக்கும் கற்பிக்க முடிகிறது. ஓவியம் வரைதல், ஸ்போர்ட்ஸ், கவிதை, கட்டுரை, எழுதும் போட்டி, யோகா, மார்ஷியல் ஆர்ட்ஸ் ஆகியவற்றைக் கற்பிப்பதன் மூலமும் அதற்கான போட்டிகள் வைப்பதன் மூலமும் குழந்தைகளின் படிப்புத் தவிர மற்ற ஆர்வங்களைத் தெரிந்துகொண்டு ஊக்குவிக்கலாம்.

வாழ்க்கைக் கல்வி மூலமும், பாரம்பரியத் திருவிழாக்களை அதன் பாரம்பர்யச் புராணச் சுவைகெடாமல் நிகழ்த்துவதன் மூலமும் பள்ளிகள் குழந்தைகளுக்கு நம் பாரம்பர்யத்தைப் போதிக்கின்றன. மற்ற மதத்தினரின் வழிபாட்டையும் இறை நம்பிக்கையையும் மதிக்கக் கற்பிக்கின்றன.

ஆனாலும் பத்து சதவித மக்களே கல்லூரி வரை சென்று பயில்வதாக அதிலும் டெக்னிக்கல் கோர்ஸுகளில் சேர்வதாக சர்வேக்கள் கூறுகின்றன. இதிலும் ட்ரைபல்ஸ், தலித்துகள், ஆகியோர் 1.8 சதவிகிதம்தான் உயர் கல்வி பெறுவதாகவும், முஸ்லீம்களில் 2.1 சதவிகிதத்தினரே உயர் கல்வி பெறுவதாகவும் இன்னும் கிராம மக்கள் தொகையில் 2 சதவிகிதம் பேரே உயர் கல்வி வாய்ப்புப் பெறுவதாகவும் சர்வேக்கள் சொல்கின்றன.

IB  கல்வி முறை ( INTERNATIONAL BACCALAUREATE)  பற்றி  நகரமெங்கும் பேசப்படுகிறது. இது பற்றி சரியான விழிப்புணர்வு இல்லை என்றே கூறுகிறார்கள். ஒரு ஆசிரியை 15 பிள்ளைகளை மட்டுமே கவனிக்க இயலும் என்பதும் அதன்படியே வகுப்பில் மாணவர்கள் அமர்த்தப்படுகிறார்கள் என்பதும் முக்கியம். இதன் கல்வி முறை சுற்றுச் சூழலைப்பொறுத்தும் கற்றுக் கொள்ளும் திறன் பொறுத்தும் கற்பிக்கப்படுகிறது என்பதும் இதற்கு இண்டர்நேஷனல் அங்கீகாரம் இருப்பதும் சிறப்பு.

குழந்தைகளின் கற்கும் திறன் எப்படி இருந்தாலும் பெற்றோர் ஆசிரியர் மீட்டிங்கில் கலந்து கொண்டு பெற்றோர் குழந்தைகள் மீதான அக்கறையைக் காண்பிக்க வேண்டும். அவ்வப்போது பள்ளி டைரியைப் பார்த்து வீட்டுப்பாடங்களை முடிக்கக் கற்பிப்பதும் எளிதாகக் கற்றுக்கொள்வதற்கான வழி. எழுத ஊக்குவிக்க வேண்டும். அமர் ஜோதி பள்ளியில் எழுதிப் பழகி கரும்பலகையில் எழுதி விளக்கிக் கற்பிக்க மாணவர்களுக்கும் போதிக்கப்படுவதால் நிறைய முன்னேற்றம் இருப்பதாகக் கூறுகிறார்கள். இப்படிக் கற்பிப்பதால்  எழுத்தும் செம்மைப்படுவதோடு தாங்கள் நினைக்கும் விஷயத்தைப் பற்றியும் காணும் விஷயத்தைப் பற்றியும் அறிவை வளர்த்துக் கொள்வதோடு அதை சிறப்பாக மொழியில் வெளிப்படுத்தவும் முடிகிறது. இது பல புதிய விஷயங்களைத் தெளிவு படுத்த உதவுகிறது.

 இப்போது இணையக் கல்வியும் பெருகிவிட்டது. தெரியாத விஷயங்களுக்கு இணையத்தைப் பார்த்துக் கற்றுக் கொள்ளச் சொல்லலாம். பாதுகாப்பான இணைய இணைப்பை ஏற்படுத்தித் தருவதும்முக்கியம்.

அதி முக்கிய விஷயம் என்னவென்றால் எல்லாருக்கும் கல்வி கிடைக்க வேண்டுமென்பதில் அரசாங்கங்களே முயற்சி எடுத்தால் போதாது. கல்விக் கூடங்களுக்கும் பெற்றோர்களுக்கும், ஆசிரியர்களுக்கும் கற்றுக்கொள்ளும் மாணவர்களுக்கும் பெரும் பொறுப்பு இருக்கிறது.  இந்தப் பொறுப்பை சரிவர நிறைவேற்றுவதன் மூலம் அனைவருக்கும் கல்வி, ஒரே தரமான கல்வி சாத்யப்படும்.

செட்டிநாட்டுச் சொல்வழக்கு. “ அப்பச்சியும் ஆத்தாவும் “

செட்டிநாடு என்றவுடன் காரைக்குடியைச் சேர்ந்த ஊர்கள் நினைவுக்கு வரும். கிட்டத்தட்ட 96 ஊர்களில் வாழ்ந்திருந்த நகரத்தார் மக்கள் இப்போது 72 ஊர்களில் மட்டும்  வசிப்பதாகக் கூறப்படுகிறது. உலகெங்கும் வசித்து வரும் இவர்கள் மொத்தமாக ஒரு லட்சம் மக்கள் தொகையே உள்ளார்கள்.

நான் இந்தக் கட்டுரைகளில் இவர்கள் ஆதியில் இருந்தது இன்று இருப்பது பற்றி எல்லாம் சொல்லப் போவதில்லை. ( காஞ்சி, பூம்புகார், சிதம்பரம்,  அதன்பின் இளையாற்றங்குடியில் வந்து 9 கோயில்களாகப் பிரிந்து இந்த 96 ஊர்களில் வசிக்கத் தொடங்கியது எல்லாம்  ஏற்கனவே நகரத்தார் வரலாறு என்னும் புத்தகத்தில் எழுதப்பட்டுள்ளது. ). நகரத்தார் திருமண நடைமுறை என்ற புத்தகமும் வந்துள்ளது.

இதில் மொத்தமாக காரைக்குடி , செட்டிநாடு என்று அழைக்கப்படும் கானாடு காத்தான் மற்றும் அதைச் சுற்றியுள்ள ஊர்களில் பெரும்பகுதி மக்களும் நகரத்தார் மக்களும் பேச்சு வழக்கில் உபயோகப்படுத்தும் வார்த்தைகளில் சிலவற்றை எனக்குத் தெரிந்த அளவில் அதன் பொருளோடு கொடுக்க முயற்சிக்கிறேன். இவை பற்றிய சுட்டி ( LINKS ) இருந்தாலும், மேலதிகத் தகவல்கள் இருந்தாலும் பின்னூட்டத்தில் அளிக்கலாம்.

வார்த்தைகளின் ஆவணக் காப்பகம் என்று யாராவது சேகரித்துக் கொண்டிருக்கக் கூடும். அழிந்து கொண்டிருக்கும் தமிழ் மொழியில் காரைக்குடியில் இன்னும் உபயோகத்தில் இருக்கும் --- மிச்சமிருக்கும் சில சொற்களை ஆவணப்படுத்தி வைக்க வேண்டும் என்ற ஆவலிலேயே இந்த முயற்சியை மேற்கொள்கிறேன்.

செட்டி நாட்டுச் சொல்வழக்கு அழகானது. எதையுமே இழிவான மொழியில் சொல்வதில்லை. தரக் குறைவான வார்த்தைகள் என்பதே இருக்காது. எதைச் சொன்னாலும் அது மொழி அழகோடு சொல்லப்படுவதாகும் என்பதே அதன் சிறப்பு.

செட்டிநாட்டில் அப்பச்சி என்பது தந்தையைக் குறிக்கும் சொல். ஆத்தா என்பது தாயைக் குறிக்கும் சொல்.

எங்கள் தந்தையை நாங்கள் சின்ன வயதிலிருந்தே அப்பா என்றுதான்  அழைக்கிறோம். ஆனால் எங்கள் மாமாக்கள், சித்தப்பாக்கள், அத்தைகள், அப்பா, ஆத்தா அனைவரும் அவர்கள் தந்தையை அப்பச்சி என்றும், தாயை ஆத்தா என்றும் அழைப்பார்கள்.

எங்கள் தலைமுறையிலேயே அப்பச்சி என்று அழைக்கக் கூடிய சொல் பழமை வாய்ந்ததாகக் கருதப்படுகிறது. சின்னப் பிள்ளையில்  இருந்தே  வெளியூர்களில் வசித்ததால் எல்லாரையும் போல அப்பா என்று அழைக்கப் பழகி விட்டோம்.

எங்கள் தாயை மட்டும் ஆத்தா என்று அழைக்கிறோம். இப்போது என் பிள்ளைகள் என் கணவரை அப்பா என்றும் என்னை அம்மா என்றும்தான் அழைக்கிறார்கள். முக்கால்வாசி சமயங்களில் மாம் , டாட் என்றுதான் அழைக்கிறார்கள். மம்மி, டாடியின் சுருக்கம். :) சிலர் வீடுகளில் இன்னும் சுருக்கி மா, பா என்று அழைக்கிறார்கள். :)

இப்படியான ஒரு காலகட்டம் என்னை எங்கள் ஊரில் இன்னும் சில உறவினர்கள் தங்கள் தந்தை தாயை விளிக்கும் சொல்லை ஆவணப்படுத்தத் தூண்டியது. வருங்காலப் பிள்ளைகளும் தெரிந்து கொள்ளலாமே., நம் மொழி எப்படிச் சிறப்புடையது என்று.

என் ஆத்தாவும் பெரியத்தாவும் எங்கள் ஐயா இருந்த போது பேசிக் கொண்டது .

என் அம்மா .. எங்க ஆத்தா :- அப்பச்சியையும் ஆத்தாவையும் பார்க்கப் போயிருந்தியே எப்பிடி இருக்காக. நான்ஃபோன் பண்ணேன். நாளைக்குத்தான் பார்க்கப் போகோணும்.

எங்க பெரியத்தா :- அப்பச்சி  குளிச்சிட்டுப் பட்டாலையில சாமி கும்பிட்டுக்கிட்டு இருந்தாக. ஆத்தா அடுப்படியில அப்பச்சிக்குப் பலகாரத்தை எடுத்து வச்சிக்கிட்டு இருந்தாக. எனக்கும் பலகாரம் தந்தாக. பலகாரத்தச் சாப்பிட்டுப்புட்டுக் காப்பியைக் குடிச்சிட்டு நா ஒன்னப் பார்க்கப் போறேன்னேன். ஆத்தா இந்த இனிப்பு இடியாப்பத்தை மாப்பிள்ளைக்குக் (தங்கச்சி ஆம்பிள்ளையானுக்குக்) கொண்டுக்கினு போன்னு கொடுத்தாக.

-- கேக்கும்போதே எவ்வளவு இனிமையா இருக்கு. இவுக பேசிக்கிற அப்பச்சிக்கும் ஆத்தாவும் வயசு 96ம் , 81 ம் இருந்தது( 6  வருஷத்துக்கு முன்னாடி. :). இப்ப இருந்தா நூத்திரெண்டு வயசு  இருக்கும் எங்க ஐயாவுக்கு  )

சரி சரி நானும் எங்க அப்பச்சியையும் ஹாஹா அப்பாவையும் ஆத்தாவையும் பார்த்துட்டு வாரேன்.

இன்னிக்கு எங்க அப்பச்சிக்குப் பிறந்தநாள். பிறந்தநாள் வாழ்த்துக்கள் அப்பா. எங்களை ஆசீர்வாதம் பண்ணுங்க. வாழ்க வளமுடன். நலமுடன். பல்லாண்டு :)

டிஸ்கி :-

1. அப்பச்சி - தந்தை ( FATHER )
2. ஆத்தா - தாய்.  ( MOTHER ).

தேன் பாடல்கள். காற்றும் காதலும்.

61. ஒரு கோப்பையிலே என் குடியிருப்பு

கண்ணதாசன் பாடிய பாடல். ரொம்ப ரிதமிக்கா இருக்கும். உமர்கய்யாமை நினைவுபடுத்துவது போன்ற பாடல் வரிகள். ”நான் நிரந்தமானவன் அழிவதில்லை. எந்த நிலையிலும் எனக்கு மரணமில்லை “ என்ற வரிகள் ஹைலைட்.

62. மன்றம் வந்த தென்றலுக்கு

ரேவதியும் மோகனும் நடித்த படம். மெல்ல மெல்ல காதலனை மறந்து கணவன் வயப்படும் காதல் காட்சி அழகு. 

63 . தண்ணிலவு தேனிறைக்க..

படித்தால் மட்டும் போதுமாவில் சாவித்ரி பாடும் பாடல். பாலாஜி பின்னே வர தண்ணீர்க் குடம் சுமந்து துளசி சுற்றுவது ஒரு கால கட்டத்தினுடைய பெண்களின் டெஃபனிஷன் போல இருக்கும்.

64. சந்திப்போமா.. இன்று சந்திப்போமா..

1966 இல் வந்த படம். விஜயநிர்மலாவும் முத்துராமனும் பாடும் பாடல். ஆக்சுவலா இது பி பி ஸ்ரீனிவாசும் எல் ஆர் ஈஸ்வரியும் பாடும் பாடல். எனக்கு ஸ்ரீனிவாசின் குரலுக்காகவே பிடிக்கும். எம் எஸ் வி யின் இசையும் இதுக்கு ஹைலைட்.

65. காற்றினிலே வரும் கீதம்.

எம் எஸ் பாடும் இந்தப் பாடல் நம்மைக் காற்றினிலே உலா அழைத்துச் செல்லும். மிக மென்மையான அழகான பாடல்.

66. நீயே நீயே

எம் குமரன் சன் ஆஃப் மகாலெக்ஷ்மியில் வரும் பாடல் இது. ஜெயம் ரவியும் நதியாவும் பிள்ளையும் அம்மாவுமாக வரும் பாடல். அம்மாவுக்கு தோசை ஊற்றிக் கொடுப்பார் ரவி . அம்மா உடனே கேட்க தோசைக் கல்லோடு கிட்டே கொண்டு செல்லும் காட்சி செம குறும்பு. மிக ரசிக்க வைத்த பாடல். 

67.பூங்காற்று உன் பேர் சொல்ல

இளையராஜாவின் இசையில் மனதை வருடும் மென்மையான பாடல். கமலும், அமலாவும் ரொம்ப இனிமையாகக் காட்சி அழகைக் கூட்டுவார்கள்.

68. நான் பார்த்ததிலே இவள் ஒருத்தியைத்தான்

மறக்க முடியுமா அன்பே வாவில் சரோஜா தேவியையும் எம்ஜியாரையும். நம் மனம் கவர்ந்த பாடலில் ஒன்றாக கட்டாயம் இது இருக்கும். சின்னக் குடை போல் விரியும் இமையும் விழியும் பார்த்தால் ஆசை விளையும் என்ற வரிகளும் தொப்பியை எம் ஜியார் கரெக்டாக சரோஜாதேவியின் தலையில் பொருந்துமாறு தூக்கி வீசுவதும் அழகு.

69. நீயேதான் எனக்கு மணவாட்டி

ஜெயாம்மாவும் எம்ஜியாரும் பாடும் பாடல். அம்மாவின் ஆளுமையான அழகிற்கு நான் எப்பவுமே அடிமை. குடியிருந்த கோயிலிலிருந்து நம் மனம் புகுந்த பாடல்.

70. ஹாப்பி இன்று முதல் ஹாப்பி.

எப்ப கேட்டாலும் உற்சாகமூட்டும் பாடல். சிவாஜியும் கே ஆர் விஜயாம்மாவும் ஊட்டி வரை உறவில் பாடுவது. ஊட்டியின் எழில் மிகு தோற்றமும் கே ஆர் விஜயாம்மா, சிவாஜியின் கெமிஸ்ட்ரியும் வண்ணமிகு உடைகளும் காட்சியமைப்பும் மெல்லிய நடனமும் அற்புதம்.