கண்ணதாசனும் பதிப்பகங்களும்

கண்ணதாசனின் வனவாசம் ஒரு மனிதன் எப்படி வாழ வேண்டும் என்பதல்ல எப்படி வாழக்கூடாது என்பதற்கான வழிகாட்டி...

உண்மைகளை நிர்வாணமாகவும் துயரங்களைத் தாழ்வு கருதாமலும்., மேன்மைகள் என்று கருதியவற்றை பயத்துடனும்..செய்து வாழ்ந்த ஒரு மகா கவிஞனின் உள்ளீடு இது..

சமுதாயம் நம்மைத்தூக்கி எறிந்தாலும்.. மீண்டும் சமுதாயத்திற்குள் ஓடித்தான் இடம் பிடிக்க வேண்டும் என்பார் கண்ணதாசன்.. கடலில் நண்டு அலை வீசி எறிந்தாலும் திரும்பக் கடலுக்குள் ஓடுவது போல...

காலூன்றாத நண்டு போல் அலை மோதாமல் உயர்ந்த இடத்தில் காலூன்றி விடவேண்டும்,, என்பார்..



இப்படி மோதி மோதி முன்னேறிய ஒரு வாழ்க்கைச் சரிதம் அவருடையது.. சிறுகூடல் பட்டியில் முத்து சாத்தப்பன் செட்டியாரின் எட்டாவது குழந்தையாக பிறந்த அவர் கண்ணனைப் போல பல இடரிலும் விழுந்து எழுந்துதான் கவியரசரானார்.. கண்ணதாசனானார். அதற்கு முன் அவர் எடுத்த முயற்சிகள் எத்தனை எத்தனை .... திரும்பத்திரும்ப முயற்சி செய்ததில் வெற்றி அவர் பக்கம்தான்..

முதலில் ”திருமகள்” பத்ரிக்கைக்காக புதுக்கோட்டையை அடுத்த ராமச்சந்திரபுரத்தில் ஆரம்பித்தது ஒர் கவியரசருக்கான வாழ்க்கை..முதல் கவிதை வந்தது.. அடுத்து ”முல்லை” பதிப்பகம் 1945 இல் .. பின்னர் திராவிட நாடு இதழ்கள் .. குடியரசு வெளியீடுகள்.. கோனாபட்டு நண்பர்கள் பழக்கம்..

முதல் முதலில் கோகலே மண்டபத்தில் அண்ணாவின் பேச்சு கேட்க அதிலிருந்து ஒரு புதிய பயணம் ஆரம்பம்..

அடுத்து ”அருணோதயம்” பதிப்பகம்., அரு்ணாசலமும் குயிலனும் கூட்டாக ”தென்றல்” பத்ரிக்கை நடத்த கவியரசரின் பீலிவளை என்ற சோழன் நெடுமுடிக்கள்ளி பற்றிய சொற்சித்திரம் வந்தது..

புதுக்கோட்டையில் ”தாய்நாடு” நாராயணனுக்கும் ”அணிகலம்” என்ற பத்ரிக்கைக்கும் எழுதினார்.. பின் ”மேதாவி”யின் உதவி ஆசிரியர்..அடுத்து தாய்நாடுவில் பணிபுரியும் போது இரண்டாவது எழுத்தாளர் மாநாடு ..

”பொன்னி”யில் முருகு.சுப்பிரமணியன் நடத்திய பத்ரிக்கையில் பணி.. அதற்கு பெரியண்ணன் கேட்டதால் இரண்டு கதை எழுதினார்..

“வணங்காமுடி” என்ற பெயரில் “குமரன்” பத்ரிக்கையில் “ஜெய்ஹிந்த்” என்ற கதை வந்தது.. பின் மேதாவியில் இருந்து “திரை ஒலி” பாப்பா நடத்திய இரா.தியாகராசன் திரை ஒலிக்கு ஆசிரியராக வந்தார்.

அடுத்து “சக்தி காரியாலயம்” .. திரு வை. கோவிந்தன் நடத்தியது . ஆசிரியர் திரு தி. ஜ. ர... அங்கு ரா. கி. ர ( குமுதம் துணையாசிரியர்.) , கல்கண்டு ஆசிரியராக இருந்த தோழர் தமிழ்வாணன்., ஆகியோர் நெருக்கமானார்கள்..

பின்னர் ”சாயிபாபா புத்தகாலயம்” அதிபர் சண்முகமிடம்., சேலம் மார்டர்ன் தியேட்டருக்காக சண்ட மாருதம்., பின் ”கஜலெட்சுமி” அச்சகம்..

தென்றல் என்ற சொந்த பத்ரிக்கை உதயம்.. முதல் தென்றல் இதழில் இறந்துபோன காதலர்கள் ஒன்று சேர்ந்து பேசுவது போல ஒரு படைப்பு.

தமிழர் திருமணத்தில் தாலி பற்றி மபொசியின் கருத்துகளுக்கு எதிர்க்கருத்துக் கொண்டிருந்தது .. திருடித்தான் புகழ் பெற்றான் ஷேக்ஸ்பியர் என இவர் சர்ச்சைக்குரியது பற்றியும் பத்ரிக்கைகளில் துணிந்து கருத்து வெளியிட்டவர்..

கிட்டத்தட்ட 1942 இல் இருந்து 1961 வரையான கால கட்டத்தில் சுமார் ஒரு 20 பத்ரிக்கைகளில் பணியாற்றியும் .. சொந்தமாக பதிப்பகம் நடத்தியும் சேர்த்த அனுபவம் அளவிலடங்கா.. அதன் பின் அரசியலிலும் திரைத்துறையிலும் புகுந்து பின் கவியரசராக வென்ற சரித்திரம் அறிவோம்..

ஆனால் அந்தக் கவிஞரைப் புடம் போட்டு பாதை அமைத்துத் தந்தது இந்தப் பத்ரிக்கைகைப் பணியும் பதிப்பகங்களும்தான்.. ஆரம்ப கால கட்டங்களில் மிகச் சொற்ப பணத்துக்காக கூட எழுதியுள்ளார்.. எனவே ஒரு கவியரசருக்கே இவ்வளவு கஷ்டமும் முயற்சியும் வேண்டியிருக்கையில்... வலைப்பதிவராகிய நாமெல்லாம் இன்னும் சீரிய முயற்சி எடுத்து மென்மேலும் சிறப்பானதைக் கொடுக்க முயல்வோம்.. நாம் இல்லாவிட்டாலும் நம் படைப்புகள் பேசப்படும்.. நூறாண்டுக் கவிஞராயில்லா விட்டாலும் நல்ல படைப்புகளுக்குச் சொந்தக்காரராவோம்.. நன்றி கவியரசரே.. முயற்சி உடையோம் .. இகழ்ச்சி அடையோம்.. உங்கள் பிறந்த நாளில் உங்கள் ஆசீர்வாதத்தோடு..

டிஸ்கி:- ஏசு காவியம் உட்பட மன வாசம் மன வாசம் என பல எழுதி இருந்தாலும் நான் அவரின் ஆரம்ப காலக்கட்ட முயற்சிகளையே... அவரின் எல்லாவற்றிற்குமான .. அடிப்படையான... அவரை செதுக்கிய கருவியாகக் கருதுகிறேன்