சும்மா: காரைக்குடிச் சொல்வழக்கு. சுவீகாரம், திருவாதிரைப் புதுமைப் புகைப்படங்கள்.

வியாழன், 15 டிசம்பர், 2016

காரைக்குடிச் சொல்வழக்கு. சுவீகாரம், திருவாதிரைப் புதுமைப் புகைப்படங்கள்.

581. கோயில் மாலை வருதல். - முறையான அங்கீகாரம். ஒன்பது கோவில்கள் உண்டு. அவை நகரச் சிவன் கோயில்களாகவும் இருக்கும். மாப்பிள்ளை பெண் இருவர் சார்ந்த கோயிலிலும் இருந்து மாப்பிள்ளை பெண் இருவருக்கும் கோயில் மாலை வந்தால்தான் அவர்கள் கோயில் புள்ளியாக அங்கீகரிப்படுவார்கள். முதலில் அந்த மாலையைத்தான் மாப்பிள்ளையும் பெண்ணும் அணிவார்கள்.

582. வாழைப்பழம் தடவுதல் :- திருமணச் சடங்குகளில் ஒன்று. திருப்பூட்டி முடிந்ததும் மாப்பிள்ளைக்கு மச்சினன் கொழுந்தியாளும் மணப்பெண்ணுக்கு நாத்தனார் கொழுந்தனார்களும் வாழைப்பழத்தை வாயில் ஊட்டுவதாகத் தடவி விடுவார்கள் . ( இன்றைய பர்த்தே பார்ட்டிகளில் கேக்கை அப்புவது போல :)

583. சாப்பாடு போடுவது :- திருப்பூட்டி முடிந்ததும் மணவறையில் மாப்பிள்ளை அமர்ந்திருக்க பெண் சாப்பாடு போடுவார். ஒரே பாத்திரத்தில் புதிதாகச் சமைத்த சாதம் குழம்பு கறி எல்லாவற்றையும் ( ஐயர் சொல்லச் சொல்லப் ) பெண் போட மாப்பிள்ளை அதை ஆட்காட்டி விரலால் தொடுவார். அதன்பின் கைகழுவ மாப்பிள்ளைக்கு அதிலேயே தண்ணீரை ஊற்றுவார் மணப் பெண். இது ஒரு சடங்கு மட்டுமே. சில ஊர்களில் மாப்பிள்ளைக்கு இலை போட்டு முட்டை எல்லாம் அவித்து வைத்துப் பரிமாறுவார்கள்.

584. தலைச்சீலையில் முடிவது :- பெண்ணிடம் ஒரு வெற்றிலை பாக்கைக் கொடுத்து இடுப்பில் முடிந்து வைத்துக் கொள்ளச் சொல்வார்கள்.

585. சதுர ஆலாத்தி & நீராலாத்தி:- இட்லியில் மஞ்சள், சுண்ணாம்பு, விளக்கெண்ணெய் விட்டுப் பிசைந்து நான்கு சிவப்புக் கூம்புகளாகச் செய்து அதில் திரியைச் செருகி வைப்பார்கள். பெண்ணழைக்கும்போது சதுர ஆலாத்தி எடுப்பது வழக்கம். நீராலாத்தி என்பதில் மஞ்சள், சுண்ணாம்பை நீரில் கலந்து அதில் வெற்றிலையைக் கிள்ளிப் போட்டு மாப்பிள்ளை பெண்ணைச் சுற்றி ஆலாத்தி எடுத்து திருஷ்டி கழியட்டும் என்று கொட்டுவது வழக்கம்.

586. காப்பு அவிழ்த்தல் :- திருமணத்தன்று காலை பகவணம் செய்து ஐயர் கொடுக்கும் காப்பைக் கட்டுவார்கள். (காப்பு என்பது சிவப்புப் பட்டுத் துண்டில் ஒரு சிறிய வெள்ளிக் காசை முடிந்து மணிக்கட்டில் கட்டுவது.) முதலில் மணமகனுக்கும் பின் மணமகளுக்கும் மணையில் அமர்ந்து சடங்குகள் செய்யும்போது அவரவர் மாமக்காரர்கள் கட்டுவார்கள்.

587. காப்புக் கழட்டிக் கால்மோதிரம் இடல்.:- திருமணம் முடிந்ததும் நாத்தனார் அல்லது மாமியார் மணப்பெண்ணின் கரத்தில் தன்னுடைய காப்பை அணிவித்து அதன் பின் கால்மோதிரம் எனப்படும் மிஞ்சியை ( மூன்று வெள்ளி வளையங்கள் ) அணிவிப்பார்கள். இதற்காக முன்பே அளவெடுத்துச் செய்து வைத்திருப்பார்கள்.

588. கும்பிட்டுக்கட்டிக்கொள்ளுதல் - மாப்பிள்ளையும் பெண்ணும் பெரியோர் அனைவரிடமும் விழுந்து வணங்கி ஆசீர்வாதம் பெற்றுக் கொள்ளுதல்.

589. பெண்ணழைத்தல் :- பெண் வீட்டில் அனைவரிடமும் சொல்லிக்கொண்டு மாப்பிள்ளை வீட்டார் தங்கள் வீட்டில் மாலை நேரத்தில் மேளதாளம் முழங்க உறவினர் சூழ பால் பானையோடு பெண்ணை அழைத்து வருவார்கள்.

590. குலம்வாழும் பிள்ளை எடுத்தல் :- பெண்ணழைத்தபின் சில சடங்குகள் நடைபெறும் அதில் ஒன்று குலம்வாழும் பிள்ளையை எடுத்தல். சாமி வீட்டின் முன் பொங்கல் சமைக்கப்பட்டு மூன்று இலைகளில் போடப்பட்டிருக்கும். அதன் முன் மூன்று செம்புத்தவலைகளில்/அண்டாக்களில் நீர் நிரப்பி வைக்கப்பட்டிருக்கும். அந்தத் தண்ணீரில் பெண், மாப்பிள்ளையின் மாமக்காரர்கள் இருவர் கரத்தையும் பிடித்து உள்ளே விடுவார்கள். அதில் ஒரு குழந்தை உருவம் வைக்கப்பட்டிருக்கும். அதை மாப்பிள்ளை தேடி எடுத்துப் பெண் கையில் கொடுக்கவேண்டும்.

591. திருப்பூட்டும் சடங்கு - மாப்பிள்ளையின் அம்மா செய்துகொள்வது. நிறைநாழி, கத்திரிக்காய் வைத்தும், சிலேட்டு விளக்கு வைத்தும், சடங்குத்தட்டு வைத்தும் கெண்டிச் செம்பில் வெத்திலை. பாக்கில் பால் ஊற்றிச் சடங்கு செய்வார்கள். மணப்பெண் மணையில் நிற்க மாமியார் கீழே நின்று சடங்கு செய்வார்கள். தன்னைப் போல நிறைவாக மணமகளும் வாழவேண்டும் என்று வாழ்த்தவே இச்சடங்கு செய்யப்படுகிறது.

592. மணவறைச் சடங்கு - மாப்பிள்ளையின் சகோதரி செய்துகொள்வது. மேலே கூறியது போலச் செய்வார்கள்.

593. பெண்ணழைத்த சடங்கு. - இதை மாமியார், நாத்தனார் அல்லது மாப்பிள்ளையின் பாட்டியார் ( தந்தைவழி ) கூடச் செய்து கொள்ளலாம்.

594. அரசாணிக்கால் அவிழ்த்தல். :- திருமணம் முடிந்ததும் நல்ல நேரம் பார்த்துப் பங்காளிகள் அரசாணிக்காலை அவிழ்ப்பார்கள். இதில் கிலுவைக் கம்பு பாலைக் கம்பு அரச இலை ஆகியவை கட்டப் பட்டிருக்கும்.

595. பாக்குப் பணம்.- திருமணம் சொல்லப்போகும் இடத்திலெல்லாம் உறவினர்கள் சொல்ல வந்தவர்களுக்குப் பாக்குப்பணம் கொடுப்பார்கள். இது அன்றைக்கு அணாவில் இருந்தது இன்றைக்குப் பத்து ரூபாயாக உயர்ந்திருக்கிறது :)

596. மாத்துக் கட்டுதல்
நீல மாத்து திருமணத்துக்கு சிவப்பு மாத்து கேதத்துக்கு

திருமணப் பந்தலின் மேல் நீல மாத்துக் கட்டுதல் சிலப்பதிகாரக்கண்ணகி காலத்திலிருந்தே இருக்கிறது . மேலிருந்து பல்லி போன்றவை மணமக்கள் மேல் விழுந்துவிடாமல் இருக்கவே கட்டப்பட்டது இன்று சும்மா தூணுக்குத் தூண் கட்டிவிட்டுப் போகிறார்கள். இதைக் குடிவண்ணார் செய்வார்கள். இன்று வீட்டுக்குத் துணி அயர்ன் செய்து தருபவர்கள் செய்கிறார்கள்.

597. சிவப்பு மாத்து விரிப்பது.

இது இறந்தபின் கட்டத்தலத்துக்கும் போகும் சிவபதவி வண்டியின் முன்னால் விரித்துச் செல்வது. இதற்கு இறந்தவரின் பெண்பிள்ளைகள் இந்தச் சிறப்பைத் தங்களின் தாய்/தந்தைக்கு வழங்கச் சொல்லி விரிக்கும் ஊழியருக்குப் ( குடிவண்ணார் ) பணம் கொடுப்பார்கள். ரெட் கார்பெட் வழியனுப்புவிழா.

598. உபதேசம் கேட்டல் - கணவன் மனைவி இருவரும் உபதேசம் கேட்பார்கள் . தினம் குளித்தபின் ஐந்தெழுத்து மந்திரம் ஓதி உடலெங்கும் திருநீறு பூசிக் கொள்வார்கள், ஆண்கள் கோவிலூர் மடத்திலும் பெண்கள் துலாவூர் மடத்திலும் உபதேசம் கேட்பார்கள்.

599. சுவீகாரம். :- பிள்ளை இல்லாதவர்கள் உறவிலோ தங்கள் கோயில் சார்ந்தவர்களின் பிள்ளைகளையோ தங்கள் பிள்ளையாகத் தத்தெடுப்பது உண்டு. இதில் இப்போது பெண் பிள்ளைகளையும் சிலர் தத்தெடுத்துக் கொள்கிறார்கள். இதில் இருப்பவர் எனது சின்னச் சித்தப்பா. பிள்ளை வளரச் சென்றபோது எடுத்தது இந்தப் புகைப்படம்.