5.
ஆஸ்டின் கார் - அந்தக்காலக் கார் வகைகளில் ஒன்று.
வக்கூடை - மூடி போட்ட பிரம்புக் கூடை
வெளையாட்டுப் பொட்டி வேவு - குழந்தை பிறந்தவுடன் ஆயா வீட்டார்
இறக்குவது. இதில் குழந்தைக்குத் தேவையான அனைத்துப் பொருட்களையும் தங்கம் வெள்ளியிலிருந்து
உடை வரை ஆயாவீட்டார் சீராகக் கொடுப்பார்கள். இதற்கு ஆயா வீட்டுப் பங்காளிகளுக்கும்
உறவினர்களுக்கும் அப்பத்தா வீட்டில் வடிப்பார்கள். ( விருந்து வைப்பார்கள்)
சிட்டிக - குழந்தைக்கான விளையாட்டுச் சாமான்கள்.
நடவண்டி - குழந்தைகளை நடக்க வைக்க இப்போது வாக்கர் போல அந்தக் காலத்தில் பயன்பட்ட மரத்தால் ஆன நடை வண்டி.
வெள்ளித் தொட்டி - குழந்தைகளைப் படுக்க வைக்கப் பயன்படுத்திய
உயரத் தொட்டில். வெள்ளியால் கைப்பிடி, கம்பிகள் பலகைகள் பிடித்திருப்பார்கள்.
பூச்சரம் - வைர நெக்லஸ். பூச்சரம், கண்டசரம், மங்கலச்சரம்
என்று பலவகை உண்டு. பூச்சரம் என்றால் குறைந்த அளவு வைரங்கள் பதித்த நெக்லஸ். குழந்தைகளுக்கும்
செய்து போடுவார்கள்.
6.
சாமி வீடு - சாமி படங்கள் வைக்கப்பட்ட பூஜை அறை.
மூன்று கட்டு - முதல் கட்டு, இரண்டாம் கட்டு, மூன்றாம் கட்டு
என மூன்று கட்டுகள் கொண்டதாக அமைந்திருக்கும் நகரத்தார் இல்லங்கள்.
மக பொறந்திருக்காளே - குழந்தை பிறந்ததும் வீட்டிற்கு வருபவர்கள்
விசாரிப்பார்கள்.
பெட்டகம் - இரும்புப் பெட்டகம். வீட்டின் முக்கிய தஸ்தாவேஜுகள்,
பாண்டுகள், பங்குப் பத்திரங்கள், தங்கம், வெள்ளி, வைரம் ஆகியவை வைக்கப் பயன்பட்ட அந்தக்கால
லாக்கர். இதை நான்கு பேர் சேர்ந்தாலும் தூக்க முடியாத அளவு கனமாக இருக்கும்.
முட்டாய் ரொட்டி - சாக்லெட், பிஸ்கட்.
பொட்டியைப் பிரித்தல் - அந்தக்காலங்களில் சுமார் 40, 50 ஆண்டுகளுக்கு
முன்பு கொண்டு விக்கப் போனவர்கள் வீட்டிற்குத் திரும்பியவுடன் கொண்டு வரும் பெட்டிகளை
உறவினர்கள் முன்னிலையில் திறந்து அனைவருக்கும் அதில் உள்ள பொருட்களைப் பகிர்ந்தளிப்பார்கள்.
அமக்கு - நமக்கு.
பிள்ளைக் காப்பு - குழந்தைக்குப் போடும் வளையல்
ஜிலேபிக் காப்பு - ஜிலேபி போன்ற முறுக்கு டிசைனில் இருபக்கமும்
இணையாமல் இருக்கும். கங்கணம் போல குழந்தை கைக்கு ஏற்றாற்போல அட்ஜஸ்ட் செய்து போடும்
வளையல்.
மிட்டாய் ஸ்டாண்டு - குழந்தை பிறந்தவுடன் வீட்டிற்கு வருபவர்களுக்கு
மிட்டாய் வைக்கும் கப் போன்ற 4 அல்லது 6 வெள்ளித் தொன்னைகள் அடங்கிய வெள்ளி ஸ்டாண்டு.
பொட்டு ஸ்டாண்டு - குழந்தை பிறந்தது கேட்க வருபவர்கள் முதலில்
இந்த பொட்டு ஸ்டாண்டில் இருக்கும் கண்ணாடியில் பார்த்து அதில் இருக்கும் சந்தனம் கலர்
குங்குமங்களை இட்டுக் கொள்வார்கள்.
கம்போஸா தாம்பாளம் - அர்ச்சனைத் தட்டாகவும் பயன்படும் வெள்ளித்
தாம்பாளம். இதில் நகைகளைப் பரப்பிக் காண்பிப்பார்கள்.
செட்டு சமையக்காரவுக - ஒரு மேஸ்திரி/சமையல் கலைஞரின் தலைமையில்
இயங்கும் சமையற்காரர்களுக்குச் செட்டு சமையக்காரர்கள் என்று பெயர்.
சோறுண்ணதும் - மதிய உணவு உட்கொண்டதும்.
வேவுப் பலகாரம் - விளையாட்டுப் பொட்டி வேவுக்குச் செய்யப்பட்ட
பலகாரங்கள்.
அடியாத்தி - அளவுக்கதிமான வருத்தத்தில் கூறப்படும் வார்த்தை.
தாக்கல் - நல்ல அல்லது கெட்ட செய்தி.
கருத்துகள் இல்லை:
கருத்துரையிடுக
சும்மா ( பத்தி ) உங்க கருத்தையும் பதிவு செய்ங்க :)