சாட்டர்டே ஜாலி கார்னர். :- சஷிகா செய்த முதல் ரசம்

சஷிகா என்ற பெயரில் வலைப்பூவில் எழுதிவரும் எங்கள் அன்பு தங்கை மேனகா சத்யா மிக ருசியாக வகைவகையாக சமைப்பார். அது மட்டுமல்ல செக்ஷன் வாரியாகப் பிரித்து தொகுத்திருப்பார். தினம் ஒன்று ஜொள்ளு விட வைக்கும் அளவு இருக்கும். எந்த உணவுக்கு எது காம்பினேஷன் என்றும் கரெக்டாக ஜோடி சேர்த்து காம்போ வழங்குவதில் அவருக்கு இணை அவரே . 

சஷிகா என்ற பேரின் பின்னணியிலும் ஒரு தகவல் இருக்கு. மேனகாவின் கணவர் சத்யா. மகள் பெயர் ஷிவானி. சத்யாவிலிருந்து "ச " ஷிவானியிலிருந்து "ஷி" மேனகாவிலிருந்து "கா" என எடுத்து இணைத்து "சஷிகா" ஆகிவிட்டார்.   

அவரிடம் சாட்டர்டே போஸ்ட்டுக்காகக் கேட்டபோது அவர் முதல் முதலில் சமையல் செய்யும்போது என்னென்ன சொதப்பல்கள் செய்தார் எனக் கேட்டிருந்தேன். அதற்கு அவர் இதை அனுப்பினார். இரு குழந்தைகளுடன் வலைப்பூவிலும் அவர் எழுதிக் கொண்டிருப்பது பிரயத்தனமான செயல். அதற்காக அவருக்கு என் அன்பும் வாழ்த்தும்.

இனி அவர் சொன்னது இங்கே.

என்னை பற்றி

என் பெயர் மேனகா சத்யா...சஷிகா என்னும் வலைப்பூவில் சமையல் குறிப்புகளை எழுதி வருகிறேன்.சொந்த ஊர் புதுச்சேரி,இரண்டு குழந்தைகளுடன் வசிப்பது பிரான்சில்...

அன்றாடம் செய்யும் சமையல் குறிப்புகளையே வலைப்பூவில் விளக்கபடங்களுடன் எழுதுகிறேன்.

தற்போது ஆங்கில வலைப்பூவிலும் எழுதி வருகிறேன்..


நீண்ட நாட்களாக தேனக்கா சாட்டர்டே ஜாலி கார்னரில் எழுத சொல்லி கேட்டபோது முடியவில்லை.இந்த மாதம் எழுதி தருகிறேன் என்று சொல்லி மறந்துவிட்டேன்.மீண்டும் அக்கா நினைவுபடுத்தி கேட்ட போது உடனடியாக எழுதி அனுப்பி விட்டேன்.

தாமதத்திற்கு மன்னிக்கவும் அக்கா..

நான் சமையல் செய்ய ஆரம்பித்ததே வேடிக்கையானது தான்.6ஆம் வகுப்பு படிக்கும் போது சமையல் செய்யும் ஆர்வத்தில் ரசம் வைத்தேன்.

எப்படி செய்யனும்னு கூட கேட்காமல் நானே என் இஷ்டபடி அஞ்சறைபெட்டியில் இருக்கும் அனைத்து சாமானும் போட்டு ரசம் வைத்து என் அப்பாவுக்கு தான் பரிமாறினேன்.

நானே செய்த ரசம் என சொன்னதும் அப்பாவும் ஆஹா நீ ரசம் வைத்தது நான் வேலை செய்யும் இடம் வரை செம வாசனை வந்தது என சொல்ல நானும் மகிழ்ச்சியில் இன்னும் சாப்பிடுங்கப்பா என ரசத்தை ஊற்ற அப்பா மெல்லவும் முடியாம முழங்கவும் முடியாம சாப்பிட்டார்.

பிறகு நான் சாப்பிடும்போது தான் தெரிந்தது ரசம் படுகேவலமா இருந்தது.அப்போழுதுதான் அப்பாவின் அன்பை இன்னும் அதிகமாக உணர்த்திய தருணம் அது.

அம்மா அப்பாவிடம் நல்லா இல்லாதபோது எதுக்கு சாப்பிட்டீங்கன்னு கேட்க,அதற்கு அப்பா பிள்ளை மனது கஷ்டபடும் என்றும் இப்போழுதே ஊக்கபடுத்தி செய்தால் இன்னும் நல்லா செய்வாங்கன்னு சொன்னார்..

அதற்கு பிறகு சமையல் நன்றாக செய்ய கற்றுக்கொண்டேன்.

தங்கள் வலைப்பூவில் எழுத வாய்ப்பு கொடுத்த உங்களுக்கு நன்றிக்கா !!
https://sashiga.blogspot.fr/

டிஸ்கி:- சமையல் செய்யும்போது எல்லாரும் செய்யும் எரர்தான் இது. இதை விட அதிகமாவே செய்திருக்கோமாக்கும். ( சப்பாத்தி மாவுன்னு நினைச்சு உளுந்து மாவைப் பிசைஞ்சு அப்புறம் அதை கட்டைல வைச்சு அமுக்கி அமுக்கிப் பிழிஞ்சு முறுக்கா சுட்டது., கடலெண்ணெய்னு  நினைச்சு நல்லெண்ணையில் பூரி சுட்டதுன்னு. ).

அப்பாக்களுக்கு பெண்கள் செய்தால் அது அமிர்தம்தான். அதுனாலதான் மகள் செய்த ரசத்தை ரசிச்சு சாப்பிட்டுருக்காரு. அப்பாக்கள் வாழ்க. :) உங்க வேலைகளுக்கிடையிலும் சேட்டை செய்யும் பிள்ளைகளை சமாளித்து பிலாக்கிலும்  எழுதிக்கொண்டு சாட்டர்டே ஜாலி கார்னருக்கும் எழுதி அனுப்பியமைக்கு அன்பும் நன்றியும்டா.