சும்மா: கலாச்சாரப் பயிற்றுவிப்பு முகாம் .:-

திங்கள், 17 அக்டோபர், 2016

கலாச்சாரப் பயிற்றுவிப்பு முகாம் .:-

கெட்டி மக்கள் நம் செட்டி மக்கள்.:-
****************************************************
NBIG (Nagarathar Business Initiative Group ) துபாயின் ஏற்பாட்டில் IBCN - 2017, செயலாளரான திரு. ரமேஷ் ராமனாதன் அவர்களின் சோழபுரம் இல்லத்தில் (பங்களா ) வெளிநாடுகளில் வசிக்கும் நகரத்தார் குழந்தைகளுக்கு நம் கலாச்சாரத்தைப் பயிற்றுவிக்கும் முகம், முகாம் ஒன்று ஆகஸ்ட் 10 ஆம் தேதி வரை நடைபெற்றது. அதன் பார்வையாளராகப் பங்கேற்கும் வாய்ப்புப் பெற்றேன்.

சர்வதேசநாடுகளில் வசிக்கும் செட்டிநாட்டுக் குழந்தைகள் தமது வேர் பற்றி அறியவும் தாம் எந்தப் பாரம்பர்ய விருட்சத்தின் பெருமைமிகு கிளைகள் என்று கற்றுணரவும் தொலைநோக்குப் பார்வையுடன் இம்முகாமுக்கு முதன் முதலில் செயல்வடிவம் கொடுத்த கோட்டையூர் வள்ளியம்மை ஆச்சி போற்றுதலுக்குரியவர்.

திரு ரமேஷ் ராமனாதனின் பெற்றோர் திரு ராமனாதன் செட்டியார் & விசாலாட்சி ஆச்சி இருவரும் தங்களது சோழபுரம் பங்களாவை நேர்பட நிறைபட நிர்வகித்து வருகிறார்கள்.இந்த இல்லம் பற்றிச் சொல்லியே ஆகவேண்டும். சீரும் சிறப்புமாய் ஜொலித்த இவ்வில்லத்தில் இல்லத்தாரின் இதயத்தைப் போல அறைகள் விசாலமானவை. எண்ணிலடங்காதவையும் கூட. நட்ட நடுநாயகமாக நான்முக யானை வாகனத்தில் தங்கநிற விநாயகப் பெருமான் எழுந்தருளி இருக்கிறார். அவர் எதிரே கோலமிடப்பட்ட இடத்தில் துளசி மாடமும் செடியும் அதன் முன்னே அலங்காரப் பூந்தொட்டியும் அழகூட்டுகின்றன. வீட்டில் நுழைந்ததும் நம்மை விடுதலை வேட்கை நோக்கி அழைத்துச் சென்ற அண்ணலின் இரும்புருவத்தைத் தரிசிக்கலாம். மிக அழகாக வடிவமைக்கப்பட்டுள்ள சிலை அது. அதே போல் நாலா பக்கமும் காற்றோட்டமுள்ள வடிவமைப்பில் கட்டப்பட்ட வீடு அது.

கலாச்சார பயிற்றுவிப்பு நிகழ்ச்சி ஆகஸ்ட் 7,8,9,10 ஆகிய தினங்களில் நடைபெற்றது. முதல்நாள் திரு ப்ளாஸம் அழகப்பன் அவர்களும் இரண்டாம் நாள் பேராசிரியர் திரு அய்க்கண் அவர்களும், மூன்றாம் நாள் திரு எம் சி எம் மாணிக்கம் அவர்களும் வள்ளி அண்ணாமலை அவர்களும், நான்காம் நாள் திரு முத்துராமன் அவர்களும் குழந்தைகளுடன் உரையாற்றினார்கள். முழுமையுமே இந்த நிகழ்வை முன்னெடுத்துச் சென்றது திரு முத்துராமன் அவர்களும் அவரின் துணைவியாருமே ஆவார்கள். இவர்களுடன் நன்றி (NANRI) என்று அயல்நாட்டு வாழ் இந்தியரின் முதிய பெற்றோருக்காக ஒரு அமைப்பை நடத்தி வரும் ,கோல்டன் சிங்கார் ஹோட்டலில் உரிமையாளர் திரு சிங்காரம் அவர்களும், மதுரையைச் சேர்ந்த டாக்டர் அங்கையற்கண்ணி அவர்களும், நாட்டரசன்கோட்டை அரசுப் பள்ளியில் தலைமையாசிரியராகப் பணிபுரிந்து ஓய்வுபெற்ற வெற்றியூர் திரு அரு சுந்தரம் அவர்களும் கரம் கோர்த்தார்கள்.இவர்களுடன் வலைப்பதிவர்கள் திருமதி தேனம்மை லெக்ஷ்மணன் அவர்களும் அவர்களின் தாயார் திருமதி முத்து சபாரெத்தினம் அவர்களும் இணைந்துகொண்டார்கள்.

பெருகி வரும் முதியோர் இல்லம், அதிகரித்து வரும் கலப்புத் திருமணங்கள், பெற்றோரை நிராகரிப்பது, நாம் யார், எங்கிருந்து வந்தோம், நம்முடைய தொன்மையான கலைகள், சமையல், தெய்வ வழிபாடு, கலாச்சாரம் என்ன என்பன பற்றிய போதிய விழிப்புணர்வினை இளைய தலைமுறையினரிடம் எடுத்துச் சொல்லவே இந்த முகாம் நடைபெற்றுள்ளது.

தனவணிகம், அரசியல், பொருளாதாரம், பங்குச் சந்தை, வங்கிகள், பல்கலைக் கழகங்கள், பசு மடங்கள், அறப்பணிகள், சமூகப் பணிகள்,சத்திரங்கள், துறவறம், தீட்சை, பத்ரிக்கைப் பணி, திரைப்படங்கள் தயாரித்தல் எனப் பன்முகம் கொண்ட கெழுமிய பின்னடையாளங்களைப் பெற்றுள்ள நாம் பெற்றுள்ள சரிவை முன்வரும் காலங்களில் இம்மாதிரி முகாம்கள்தான் மீட்டுத் தரவேண்டும்.

ஐக்கிய அரபு நாடுகளிலில் இருந்து 19 குழந்தைகளும், இங்கிலாந்திலிருந்து 6 குழந்தைகளும் இதில் பங்கேற்றுள்ளனர். இவர்கள் 5 வயதிலிருந்து 20 வயதிற்குட்பட்டவர்கள். இவர்கள் இவ்வாறு நம் கலாச்சாரத்தைக் கற்றுவரவேண்டும் என ஆவலாய் அனுப்பிய பெற்றோர் அனைவருக்கும் வாழ்த்துகள். இந்தக் குழந்தைகளில் முதல் வருடம் டாக்டருக்கும், ஆடிட்டிங்கும் படிக்கும் மாணாக்கர்களும் உண்டு.

விடியற்காலையில் எழுந்து பச்சைத் தண்ணீரில் குளித்துவிட்டு வீட்டில் நடுமையத்தில் உள்ள முற்றத்தில் அனைத்துக் குழந்தைகளும் (பையன்கள் வேட்டி சட்டையில்) ஆஜராக இறைவணக்கமும் , யோகாவும் தியானமும் நடைபெற்று அதன் பின் காலை உணவும் கலந்துரையாடலும் நடந்தது.

முதல்நாள் ஐந்து நகரத்தார் திருக்கோயில்களுக்கும் அடுத்த நாள் நான்கு நகரத்தார் திருக்கோயில்களுக்கும் குழந்தைகள் அழைத்துச் செல்லப்பட்டிருக்கின்றார்கள். ஒவ்வொருவருக்கும் அவர்கள் சார்ந்த கோயில்களில் பரிவட்டம் கட்டி முதல் மரியாதை வழங்கப்பட்டிருக்கின்றது. ஆத்தங்குடியில் இத்தாலியன் மார்பிள்களுக்குச் சவால்விடும் பாணியில் அந்தக்காலத்திலிருந்தே தயாரிக்கப்பட்டுவரும் ஆத்தங்குடி டைல்ஸ் மேக்கிங்கில் இச்சிறார்களும் டிசைன் செய்துள்ளார்கள்.

இரண்டாம் நாள் கடியாபட்டியில் உள்ள கடியாபட்டியில் உள்ள சிதம்பரவிலாஸ் என்ற ஹெரிட்டேஜ் ஹோமுக்குச் சென்றதாகவும் அங்கே பொம்மைக் கொட்டகை, கல்யாணக் கொட்டகை ஆகியவற்றைப் பார்த்ததாகவும் சிறுவன் மகேஷ் தெரிவித்தார். இந்த நிகழ்வை பாகனேரியைச் சேர்ந்த நமது செட்டிநாடு இதழின் புரவலர் திரு முத்து கணேசன் அவர்கள் ஏற்பாடு செய்து உள்ளார்கள். நகரத்தார் வீடுகளின் கட்டிடக் கலை அமைப்புகளையும் கானாடு காத்தான் அரண்மனையில் கண்டு களித்திருக்கின்றார்கள். அதே போல் அங்கே தறியில் புடவைகள் நெய்யப்படுவதையும் பார்வையிட்டிருக்கின்றார்கள்.

மூன்றாம் நாள் கோயிலூர் மடத்திற்குச் சென்ற குழந்தைகள் அங்கே இருந்த அருங்காட்சியகத்தைக் கண்டு களித்தனர். நம் செட்டிநாட்டின் பாரம்பர்யப் பொருட்கள், விவரங்கள், வலசை வந்தது, அதன் மடாதிபதிகள் பற்றிய விவரங்கள் அறிந்தனர். கோயிலூர் மடத்தின் PRO திரு சேதுராமன் குமரப்பன் அவர்கள் குழந்தைகளிடம் உரையாற்றினார். துலாவூர் மடம், பாதரக்குடி மடம் பற்றியும் தீட்சை பெறுதல் பற்றியும் நகரத்தார் உறையும் 76 ஊர்கள் பற்றியும் கேட்டறிந்தனர். இங்கே ப்ரஸ் மீட் நடைபெற்றது.