பூனைச் சொப்பனம். ( சொல்வனத்தில் )

எண்ணெய்ப்புகை காரம் இழுத்து

வெளியெறியும் மின் போக்கிவழி 

கரேலென்று உள்நுழைந்து

தொலைக்காட்சி அட்டைமேல்

சுருண்டு துயிலும் அது.

தடைபட்ட மின்சாரம் வேர்வையூற்ற

சமையலறை இருளில்

தாகமடக்க நீர்விழுங்கி

மல்லாந்திருக்கும் போது

பரணில் மின்னும் இரட்டை வைரம்

படபடவெனப் பதட்டமூட்டும்.

என்னசைவு கண்டு வெருண்டு

உருண்டு புரண்டு அட்டை சரசரக்க

மின் இறகசைத்து நுழைந்து

வெளிப்பறக்கும் கருமூட்டையாய் அது.

வரவு தடுக்க வெண்குழல் எரித்தும்

வந்த மின்சாரம் பிடித்து விசிறியசைத்தும்

விழித்து விழித்து நான் காணும் சொப்பனத்தில்

எத்தனையோ கடவு தாண்டியும்

பதுங்கிப் பதுங்கி இருக்குமந்த கறுப்புப் பூனை.

டிஸ்கி :- இந்தக் கவிதை மார்ச் 16 - 31 , 2015 சொல்வனம் மின்னிதழில் வெளியானது.