நம்பர் ஒன்..

நம்பர் ஒன்...:-
**************
பெட்டிகள் முடிவு செய்கின்றன..
நம்பர்களை..
பெட்டிங்குகள் தீர்மானிக்கின்றன.
காமிராக்களின் ஃப்ளாஷ்களில்
ஷாம்பெய்ன் திறப்பவரை..

சேணங்கள் மாட்டி
திப்புவின் காலத்தில்
போரிட்டவை இன்று
நாட்டியமும்., ஜட்காவும்
மூக்கணாங்கயிற்றில் மாட்டி.


சந்தையில் சுழி பல்பிடித்து
தேர்ந்து வாங்கியது
சேணம் தகர்த்து
சூறாவளிப் பாய்ச்சலில்
பணக் கொள்ளு நோக்கி..

ஆறு அமர ஆடு.,
நாலு ..நின்று ஆடு
ரெயின் ரெயின் கோ அவே
ரன் ரன் கமான்..கமான்..
அதிகப்படி பந்தயத்தில்..

விளம்பரங்களுக்காய் ஆடி
காய்த்துக் காயம்பட்டு
பாய்ச்சல் ஒடுங்கும்போது
பக்கத்துப் பலகைகளில்
தாய்தேசம் நம்பர் ஒன் ஊழல்களில்..

டிஸ்கி:- இந்தக் கவிதை ஆகஸ்ட் 15, 2011 உயிரோசையில் வெளிவந்தது.