என்னைக் குழந்தையாக்கியவள்

நேற்று அவள் இல்லாமல்
என் உலகம் ஸ்தம்பித்திருந்தது..
அவள் சூலுறாத கர்ப்பம் நான்..
ஆனால் என்னைப் புதிதாய்ப் பிரசவித்தவள்,,

இருக்கிறேனா எனக்கூடத்
தெரியவில்லை..
சுவாசம் போல அவளையும்
அடிக்கொருதரம் எதிர்பார்த்து..


பற்றற்ற சருகு போல
மனம் அலைய..
ஒவ்வொரு வாசலிலும் சென்று...
தேடித் தேடி..

அவள் அழைப்புமணி
அழுத்திய படமும்.,
அள்ளிக் கொட்டியிருந்த
அன்பு வார்த்தைகளும்
ரசித்து வந்தேன்..

நிசப்தம் பூட்டிய காலம்
என் காதுகளில்
அறைந்து கொண்டிருந்தது..

அவளின் மணிச்சத்தம் இல்லாமல்.,
மாலை வணக்கம் இல்லாமல்.,
அணைப்பு இல்லாமல்
அணைந்து கிடந்தேன்..

சாமக் கோழிகளின் சத்தத்தில்
அவள் இருந்ததற்கான
அடையாளம் துழாவி., மூழ்கி ., அமிழ்ந்து.,

கூர்மையான காதுகள்
ஒலிக்காய் ஏங்கி ...
இல்லாத கனவோடு தூங்கி..,

உதயமாகி விட்டது..
உயிர்ப்பிக்க வருவாள் ..
செல்ல அதட்டலுடன்...
என்னைக் குழந்தையாக்கியவள்..ம்ம்ம்