சும்மா: பணத்திருப்பேடும் குடிவழியும்.

1621. கும்பிட்டுக் கட்டிக் கொள்ளுதல் :- திருமணம் முடிந்ததும் பெரியோர் அனைவரின் காலிலும் விழுந்து ஆசி பெறுதல். இச்சமயம் அவர்கள் பணமோ பொன்னொ கொடுத்து ஆசீர்வதிப்பார்கள். மற்றையோரும் பொருளோ பணமோ கொடுத்து ஆசி வழங்குவார்கள்.

1622. திருமண வாழ்த்துப்பா படித்தல். :- இச்சமயம் திருமணத் தம்பதிகளை வாழ்த்தி அவர்களின் சகோதர சகோதரியரோ, அவர்களின் குழந்தைகளோ வாழ்த்துப் பாக்களைப் படிப்பார்கள். இதை அவர்களேயும் இயற்றி இருக்கலாம். அல்லது தமிழறிஞர்களிடம் எழுதி வாங்கியும் படிப்பார்கள். இவ்வாழ்த்துப் பாக்களை 200, 300 என்ற அளவில் அச்சிட்டு வந்திருந்தோருக்கும் கொடுத்து மகிழ்வார்கள்

1623. பொட்டலம் பிரித்தல். :- இது ஒரு கேளிக்கை நிகழ்ச்சி. மணமக்கள் இருவருக்கும் உறவுக்குழந்தைகள் இரு பொட்டலங்களைக் கொடுத்துப் பிரிக்கச் சொல்வார்கள். யார் முதலில் பிரிக்கிறார்கள் என்பதைக் கண்டறிய. இக்குழந்தைகள் அதில் சாக்லேட், குழந்தைகளின் பாட்டில், ரப்பர், ஜால்ரா, விசில் போன்ற பொருட்களைப் பேப்பர்களில் பலமுறை சுற்றிக் கட்டிப் பொட்டணமாகக் கொடுத்துப் பிரிக்கச் சொல்வார்கள். இந்நிகழ்ச்சியை உறவுக்காரர்கள் அனைவரும் கண்டு களிப்பார்கள். இதேபோல் வாழைப்பழத்தையும் மணமகனுக்கும் மணமகளுக்கும் ஐத்தை மக்கள், அம்மான் மக்கள் தடவுவார்கள்.

1624. பணம் எழுதுதல்:- மணவறைச் சடங்கு முடிந்ததும் மணமகன்/மணமகள் வீட்டுப் பங்காளிகள் தனித்தனியாகக் கூடி ஓரிடத்தில் அமர்ந்து பணம் எழுதுவார்கள். அதற்குப் பதிவேடாக பணத்திருப்பேடு பயன்படும். இதுவும் இசைகுடிமானம் போல் ஒரு ஆவணமாகும்.

1625. பணத்திருப்பேடு.:- புதுமை, திருவாதிரைப் புதுமை, கார்த்திகைப் புதுமை, மணிவிழா, புதுமனை புகுவிழா போன்ற நிகழ்ச்சிகளில் கலந்து கொண்ட தாய பங்காளிகள் பணம் எழுதித் தங்கள் வருகையைப் பதிவு செய்வதே பணத்திருப்பேடு. இதை மொய்ப்பண ஏடு என்றும் சொல்வார்கள்

1626. குடிவழி :- பணத்திருப்பேட்டில் வரிசை முறைப்படி பங்காளிகளின் குடிவழியைப் பின்பற்றி எழுதப்படுவது. வாரிசு முறைப்படி எந்தெந்த ஐயாவீடு முதலில் வருமோ அந்தந்த ஐயாவீட்டின் வரிசைப்படி எழுதுவது. அதேபோல் பாட்டையா, ஐயா , மகன் பேரன் என்ற வரிசைப்படி எழுதுவார்கள்.

1627. காப்புக் கழட்டிக் காமோதிரம் இடுதல்:- மாமியார் மணமகளின் கரத்தில் தனது காப்பைக் கழட்டிப் போட்டு காலில் மிஞ்சி அணிவித்தல். மிஞ்சியைக் காமோதிரம் என்பார்கள். அதன் பின் தன் வளையலை மாமியார் திரும்பி வாங்கி அணிந்து கொள்ள வேண்டும்.

1628. மஞ்சள் நீராடுதல்.:- மாப்பிள்ளையும் பெண்ணும் மஞ்சள் நீராடுவார்கள். பண்டாரம் இந்நிகழ்வின்போது இருவரின் காலிலும் ஊற்றச் சொல்லிச் சொல்லுவார். அதேபோல் மணமக்களின் பெற்றோர் இருவரும் தமது வேஷ்டிகளின் நுனியிலும் சேலைகளின் நுனியிலும் ஒருவர் மற்றவருக்கு மஞ்சள் நீர் தந்து நனைத்துக் கொள்வார்கள். அன்றையக் காலகட்டத்தில் மஞ்சள் நீர் ஊற்றி மஞ்சள் நீராடி இருப்பார்கள் போல் தெரிகிறது.

1629. பிள்ளை எடுக்கிக் கொடுத்தல் / குழவி கொடுத்து வாங்குதலும் சொல்லிக் கொள்ளுதலும். :- மாப்பிள்ளை வீட்டில் பங்காளிகளிடத்தில் பெண் பட்டுத்துணியில் சுற்றிய குலம்வாழும்பிள்ளையைக் கொடுத்துக் கும்பிட்டு விழுந்து வாங்கி ஆசி பெற்றுக் கொள்வார். நல்ல குலம் வாழும் பிள்ளை பிறக்க வேண்டுமென. அதன் பின் தனது தாயாதிகளிடம் பெண் சொல்லிக் கொள்வார். இப்போதும் விபூதித் தட்டுக் கொடுத்துக் கும்பிட்டு விபூதி பூசிக் கொள்வதுண்டு.

1630.பெண் அழைத்துக் கூட்டி விடல் :- பெண் வீட்டில் நிலைக் கோலத்தில் மணமக்களை நிற்கவைத்து பெண்ணின் அத்தை அல்லது அப்பத்தா ஸ்லேட்டு விளக்கு ஏற்றி வைத்து ஆலாத்தி காட்டி விபூதி பூசி மாப்பிள்ளை வீட்டுக்குப் பெண்ணைக் கூட்டி விடுவார்கள்.

செவ்வாய், 13 அக்டோபர், 2020

பணத்திருப்பேடும் குடிவழியும்.

2 கருத்துகள்: