சும்மா: காரைக்குடிச் சொல்வழக்கு :- அப்புராணியும் உக்கிராணமும்.

1061.குடைக்கொசுவலை/தொட்டிக் கொசுவலை - குழந்தைகளைப் படுக்கையில் தூங்கவைக்கும்போது குடைக்கொசுவலை போட்டு வைப்பதுண்டு. தொட்டிலைச் சுற்றிக் கட்டவும் கொசுவலையை உயரமான பாவாடை போல் தைத்து உபயோகிப்பார்கள்.

1062. கைப்பண்டம் கருணைக்கிழங்கு - கஞ்சம்பிடித்தவர் கையில் இருந்து ஒரு பொருளையும் வாங்க முடியாது. அவர்களின் கைப்பண்டத்தை அடுத்தவர்களுக்குக் கொடுக்க யோசிப்பார்கள். ஆனால் அடுத்தவர்களை தானம் செய்யும்படி வலியுறுத்துவார்கள். அப்படிப்பட்டவரைக் குறிப்பிடும்போது அவர்களின் கைப்பண்டம் கருணைக்கிழங்கு என்று சொல்வதுண்டு

1063. அப்புராணி - அப்பாவி, ஒன்றும் அறியாதவர் , பழிபாவம் தெரியதவர், வெள்ளந்தி, வெகுளி, குற்றமற்றவர்.

1064. உக்கிராணம் - ஒரு விசேஷம் என்றால் அதற்குத் தேவையான மளிகை, அரிசி, பருப்பு பயறு வகைகள், காய்கறி , கனி, பால், தொன்னைகள், பாக்குமட்டைத்தட்டுகள், வாழை இலை, பழக் கப்புகள், முந்திரி, பாதாம், நெய், பழ டின்கள், போன்ற பொருட்களை ஓரிடத்தில் அல்லது ஒரு அறையில் சேர்த்து வைப்பார்கள். அதற்கு மொத்தமாக உக்கிராணம் என்று பெயர். இதை சமையல் ஆள் அல்லாத ஒருவரிடம் ஒப்படைத்து விடுவார்கள். அவர் அந்த விசேசத்தின் போது சமையலுக்குத் தேவையான பொருட்களை உக்கிராணத்தில் இருந்து அளந்து எடுத்துக் கொடுப்பார். இதைப் பொதுவாக பெண்கள் மேற்பார்த்துக் கொள்வதால் அவருக்கு உக்கிராணக்காரக்கா என்று பெயர்.

1065. ஊவுதி, உவ்வூதி, துண்ணூரு, விவூதி, திருநீறு, திருநீர் - நெற்றியில் மூன்று பட்டையாக இடும் சைவச் சின்னம், சிவச்சின்னம், விபூதி.

1066. பட்டியக்கல் - கீழ்வாசலை பத்தியுடன் இணைக்கும் பகுதியில் இது இருக்கும். இந்தப் பட்டியக்கல் ஒரேமாதிரியாக பட்டி போல் பத்தியில் நீளப்படையில் அமைக்கப்பட்டிருக்கும் கல்லாகும்.

1067. மரவுதட்டி - மறைவு தட்டி. சின்ன பார்ட்டீஷன் போல. ஆல்வீடு, பத்தி, பட்டாலை போன்றவற்றில் சின்னத் தடுப்புப்போல மறைக்க உதவுவது. புள்ளிகள் அதிகம் உள்ள வீட்டில் பல பங்குக்காரர்கள் இருப்பதால் இவ்வாறு தங்கள் பக்கங்களை மறைவுதட்டி வைத்து மறைத்து அலமாரி போன்றவற்றை வைத்துக் கொள்வார்கள். இதில் மறைக்க மரத்தட்டி இருக்கும். சிலவற்றில் நாற்புறமும் உருண்டை ஆணி மாட்டி துணித்தட்டியாக வைத்துக் கொள்ளும் வசதி இருக்கும்.

1068. சொட்டாங்கி - சொட்டாங்கிக் கல் விளையாட்டு. ஐந்து கூழாங்கற்களை அல்லது ஐந்து சிறு கருங்கல் சல்லிகளை வைத்து விளையாடப்படும் விளையாட்டு. இது கண்ணுக்கும் கைக்கும் பயிற்சி கொடுக்கும். இருவரில் இருந்து பலர் வரை விளையாடலாம். ஒன்றிலிருந்து பத்துவரை இதில் விளையாட்டுக்கள் உள்ளன.

1069. சோமாத்தி - அலுக்கை, களைப்பு தீர ஓய்வெடுத்தல், உடல் நோவால் உடலை நெளித்து எங்காவது சுருண்டு கொள்ளுதல் அல்லது படுத்துக் கொள்ளுதல், ஒரு வேலையைச் செய்யச் சோம்பல்பட்டு ஒதுங்குதல், ஓய்வு, அலுப்பு, சோம்பல், ஓய்ந்தமர்ந்து சுகம் காணுதல், ஒன்றும்செய்யாமலிருத்தல்.

1070. வருந்தொட்டியும் - வரும்வரைக்கும், சென்றவர் திரும்பி வருகின்ற வரைக்கும்,

1071.உசுப்புதல் - எழுப்புதல், தூக்கத்திலிருந்து எழுப்புதல், ஒரு விஷயத்தைச் செய்யத்தீவிரப்படுத்தல்.

1072. வீட்ட இருக்கையில் - வீட்டில் இருக்கையில்.

1073. கினா - கனவு, கனா

1074. கெடை - மேலுக்கு முடியாமல் இருப்பது & வீட்டுத் தூரம் கிடப்பது, பலத்த உடல்நலமின்மை, எழுந்து அமரமுடியாமல் படுத்த படுக்கையாய் இருப்பது, வயதால் நோவால் எழாமல் படுத்திருப்பது.

1075. சிப்பாணி - சிரிப்புப் பொங்குதல்,

1076. கள்ளிப்பொட்டி/கலியம்பொட்டி - கலிங்க மரம் போன்ற உறுதியான மரத்தால் செய்த பெட்டி,

1077. சத்தவடம் - சத்த நேரம், கொஞ்ச நேரம்,

1078. யாது இல்லை - ஞாபகம் இல்லை.

1079. இதுன்னப்ப - ஒரு விஷயம் நடந்தபோது அதைப்பற்றிக் குறிப்பது.

1080. தெரியணுமின்ன - தெரியவேண்டும் அல்லவா,/ தெரியவேண்டும் இல்லையா,