சும்மா: காரைக்குடிச் சொல்வழக்கு :- புரியாதவளும் பொல்லாதவளும்.

871. ஒக்கிடுதல். - சீர் செய்தல். உடைந்த ஒரு பொருளை ரிப்பேர் செய்து வைத்துக் கொள்ளுதல். வீட்டை ஒக்கிட்டு வைத்துக் கொள்வது .

872.மரவுதட்டி/மறைவுதட்டி. :- மறைப்புக்காகப் பயன்படுவது. மரச்சட்டங்களால் ஆனது. முழுவதும் மரத்தால் ஆன மரவுதட்டியும் உண்டு. சிலவற்றில் ஸ்கிரீன் போடப்பட்டிருக்கும். ஒரே சதுரமாகவோ அல்லது இரட்டைச் சதுரங்களாகவோ மரச்சட்டங்களால் செய்யப்பட்டிருக்கும். கீழே கால் வைக்கப்பட்டிருக்கும். இச்சட்டங்களில் கொடுக்கப்பட்டிருக்கும் உருட்டு ஆணிகளில் ஸ்க்ரீனை மாட்டி உபயோகிக்கலாம். பொதுவாக ஆல்வீட்டில் அல்லது வளவில் அல்லது அடுப்படியில் ஒருவர் பங்கிலிருந்து மற்றவர் பங்கை மறைக்கப் பயன்படுத்துவது.

873. உள்ளதைப் போல :-சுமாராக. பெண் எப்படி இருப்பாள் என்று கேட்டால் அது ரொம்ப உள்ளதைப் போல இருக்கும். என்பார்கள். திருத்தம் பத்தாது, அழகு போதாது என்பது அவர்கள் கணிப்பு.

874.புரியாதவளும் பொல்லாதவளும்.. :- ”பொல்லாதவளோட கூட இருந்துறலாம். அடி இந்தப் புரியாதவளோட இருக்க முடியாது” என்பது சொலவடை.

875.கசம் பிடிச்சவ :- மகா, மெகா சிக்கனக்காரி. எச்சில் கையால் காக்காய்கூட ஓட்ட மாட்டாள் என்று அர்த்தம்.

876.காதோலை. :- காதில் அணியப்படும் ஒரு அணி. இதைப் பொதுவாக காது வளர்த்த அக்காள்கள் போட்டுக்கொண்டிருப்பதுண்டு. தோடையும் இப்படிக் குறிப்பிடுவார்கள்.

877.ஓவியமா வளர்த்தாக/ஓவியமா வைச்சிருந்தாக/ஓவியமா இருந்துச்சு. :- மிகச் சிறப்பாக இருப்பதை இப்படிக் கூறுவதுண்டு.

878. அப்பச்சிவண்டி :- தந்தையின் மூத்த தாரம்/மனைவி. அல்லது தாய்க்குப் பின் வந்த இளையதாரத்தைக் குறிப்பிடுவது.

879. பின்னடைய வேண்டாம்.:- ஒரு செயல் செய்யும்போது தடங்கல் ஏற்பட்டால் அதற்காகப் பின்னடைய வேண்டாம் என்று தைரியம் கூறுவது.

880.மேவேலை. :- வீட்டில் செய்யக்கூடிய வேலைகள். வீடு கூட்டுதல், மெழுகுதல், பாத்திரம் துலக்குதல், துணி துவைத்தல் முதலியன. சமையல் தவிர உள்ள இதர வேலைகள்.

881. ஒண்ணுமத்தவுக. :- சிலரைப் பற்றி விசாரிக்கும்போது இப்படிச் சொல்வார்கள். அவர்கள் எதையும் செய்யமாட்டார்கள், கொடுக்கமாட்டார்கள் என்பதற்காக அவுக ஒண்ணுமத்தவுக என்பார்கள்.

882. ஒரம் விழுதல் :- கைக்குழந்தையைத் தூக்கும்போது கழுத்து நிற்காத குழந்தையின் கழுத்தையும் உடலையும் சேர்த்து சரிவரத் தூக்காவிட்டால் குழந்தைக்கு ஒரம் விழுந்துவிடும். அதாவது கழுத்தில் சுளுக்கு போன்ற ஒன்று விழுந்துவிடும். உடனே குழந்தை அழத்துவங்கும். இதற்காக தொட்டில் சீலையில் குழந்தையைப் போட்டு உருட்டுவார்கள். இதற்கு ஒரம் எடுத்தல் என்று பெயர். இதையும் ஜாக்கிரதையாகச் செய்யவேண்டும்.

883.குளுதாடி:- நீர் வைக்கும் ஜாடி, இது ஒரு வகை களிமண்ணால் செய்யப்பட்டிருக்கும். நல்ல இரும்பு போல உறுதியாக இருக்கும்.

884.குத்தாலந்துண்டு/உடுத்திக் குளிக்கும் துண்டு. :- எண்ணெய்க் குளியல் ஆடும்போது குற்றாலந்துண்டு என்ற துண்டை உடுத்திக்கொண்டு குளிப்பார்கள் பெண்கள். இதில் கட்டம் போட்ட குத்தாலந்துண்டு , ப்ளெயின் குத்தாலந்துண்டு என்ற இருவகை உண்டு. இரண்டிலும் கெட்டி ப்ளெயின் பார்டர் இருக்கும். ஒரு முழு ஆளையும் மறைக்கக்கூடிய உயரம் இருக்கும். இவற்றை ஓரம் மூட்டி அமயம் சமயத்தில் குழந்தைகளுக்கான ஸ்பிரிங் தொட்டிலில் மாட்டி தொட்டிச்சீலையாகவும் உபயோகிப்பதுண்டு.

885. வரையோடு :-மர உரலில் நெல் அரிசி போன்றவற்றைக் குந்தாணியால் (உலக்கையால் ) இடிக்கும்போது அவை அதிக அளவில் இருந்தால் வெளியே துள்ளித் துள்ளிக் கொட்டும். (இதில் கோதுமை போன்றவற்றையும் குத்தித் தோல் எடுப்பார்கள்). இதைத் தவிர்க்க உரலின் மேல் போடப்படும் பெரிய துளை உள்ள வட்டமான/வளையமான தட்டுக்குப் பெயர் வரையோடு.

886.பங்காளிகள் :- ஒரே குடும்பத்தின், ஒரே வீட்டின் சகோதரர்கள் & ஒரே கோயில் ஆட்கள்.

887.பெரும்பங்காளிகள் :- ஒரு குடும்பம் கிளைவிட்ட பின்பு அதன் மூத்த குடியில் உள்ள பெரியவர்களும் அவர்கள்கிளையில் பிறந்த மக்களும் பெரும்பங்காளிகள்.

888.கூடிக்கிற பங்காளிகள் :- சிலர் ஒரே கோயிலாக இருப்பார்கள். ஆனால் வெவ்வேறு ஊர்களில் இருந்து வந்து கூடிக் கொள்வார்கள். இவர்களுக்குக் கூடிக்கிற பங்காளிகள் என்று பெயர். இதில் ஆண்கள் மட்டுமே கூடிக் ( விசேஷம் என்றால் வந்து கலந்து) கொள்வார்கள்.

889. ஐயாக்கள் வீடு :- ஒரே கொள்ளுப் பாட்டையாவுக்குப் பிறந்த பிள்ளைகள் பலர் இருப்பார்கள். அதன் பின் அவர்களின் வாரிசுகள் கொள்ளுப்பேரன்கள் எள்ளுப் பேரன்கள் என்று ஆனபின்னும் , ( பல்வேறு கிளைகளாக பிள்ளை குட்டிகள் என்று ஆனபின்பும் ) ஐயாக்கள் வீட்டோடு கூடிக் கொள்வார்கள்.

890.தாயபிள்ளைகள்.:- அண்ணன் தம்பி, ஆச்சி தங்கச்சி, அம்மான், சித்தப்பா, பெரியப்பச்சி, பெரியத்தா,சின்னத்தா, அம்மாமிண்டி, ஆயா, ஐயா, அப்பத்தா, ஐயா, அண்ணமிண்டி, தம்பிவண்டி, ஆகிய உறவுகளே தாயபிள்ளைகள். ஆயாவீட்டு உறவுகளும் அப்பத்தா வீட்டு உறவுகளும் தனதுவீட்டு உறவுகளும் சேர்ந்ததே தாயபிள்ளைகள். ( இதில் சம்பந்தப்புரத்தை சேர்க்கமுடியாது )