சும்மா: மாங்க்ஸ்டன் ரயில்வே பாலம் - நூறாண்டுகால இரும்பின் சா(ஆ)ட்சி.

5000 டன் எஃகு இரும்பில் அமைக்கப்பட்டு கிட்டத்தட்ட 123 ஆண்டுகளுக்கும் மேலாக புழக்கத்தில் உள்ள ஒரு ரயில்வே பாலத்தை ஜெர்மனியில் தோழி கௌசி கூட்டிச் சென்று காட்டினார். நதியின் போக்கில் ஒரு பில்லர் கூட வராமல், நதியின் ஓட்டத்தைத் தடுக்காமல் மாசுபடாமல் நதியின் இரு கரையிலும் ட்ரஸ் ஆர்ச் ஃபார்மில் கட்டப்பட்ட வித்யாசமான பாலம் இது.

ஜெர்மனியில் மிக உயரமான ரயில் பாலம் இந்த மங்கஸ்டன் பாலம். கிட்டத்தட்ட 351 அடி உயரத்தில் அமைந்துள்ள இது ஒன்றரை கிலோமீட்டர் தூரத்துக்கு நதியின் மேலே சென்று பூமியின் இரு உயர்ந்தபகுதிகளை இணைக்குது . வூப்பர்டால், ஓபர்பார்மேன், ஸோலிங்கன் ஆகிய ரயில்வேக்களின் ஒரு பகுதியாக இது அமைக்கப்பட்டுள்ளது. ரெம்ஷெய்ட் நகரையும் ஸோலிங்கன் நகரையும் இணைக்கும் இது ஸோலிங்கனில் வூப்பர் நதியின் மேல் அமைக்கப்பட்டுள்ளது.

ரைன் - ரூர் - எஸ்பான் எஸ் 7 என்ற தடத்தில் ஓடும் ரயில்கள் ப்ரத்யேகமாக இதில் செல்கின்றன.

1897 இல் கட்டப்பட்ட பாலமான இது சில மராமத்துப் பணிகளுக்காக 2013 இல் மூடப்பட்டு அதன்பின் 2015 இல் பல்வேறு வசதிகளுடன் புதுப்பிக்கப்பட்டுத் திறக்கப்பட்டுள்ளது. 2018 இல் ஒரு தரமும் இது மூடப்பட்டுள்ளது. அப்போதெல்லாம் மிக ஷார்ட் கட்டில் ரெம்ஷெய்ட் சென்றுகொண்டிருந்த மக்களுக்கு பேருந்தில் சுற்றிச் செல்வதுதான் ஒரே வழி.

முதலில் இந்தப் பாலத்திற்கு சக்கரவர்த்தி வில்ஹெல்மின் பேரைச் சூட்டி இருக்கிறார்கள். அதன்பின் மாங்க்ஸ்டன் என்ற பேர் மாற்றப்பட்டுள்ளது.

முடியாட்சி முடிந்தவுடன் இது இடத்தின் பெயராக நீடிக்கிறது.

ரெம்ஷெய்ட் , ஸோலிங்கனை இணைக்க இந்த ரயில்வே பாலம் கட்டலாம் என்று 1889 இலேயே முடிவெடுக்கப்பட்டுள்ளது. ஆனால் 1893 இல் தொடங்கப்பட்டு 1897 இல் தான் கட்டி முடிக்கப்பட்டது.

யூ வா வளைஞ்ச ஆர்ச்சுக்கு நடுவுல பார்த்தீங்கன்னா ஆறு சப்போர்ட்டிங் அமைப்பைப் பார்க்கலாம். இவைதான் ரயில் விசையோட கடக்கும்போது அந்தப் பாலத்தோட அழுத்தத்தைத் தாங்கிக் கொடுக்கின்றன. கிட்டத்தட்ட 950,000 ரிவெட்டுகள் இந்தப் பாலத்தைத் தாங்குகின்றனவாம்.

இப்பாலத்தை வடிவமைச்ச ஆண்டன் வான் ரைப்பல் என்ற ஒரு பொறியாளர்தான் இதை பல்லாண்டுகள் ( 1926 வரை) பொறுப்பாக நிர்வகித்து வந்தாராம்.

நல்லா உத்துப்பார்த்தீங்கன்னா தெரியும் இது இரட்டைப் போக்குவரத்து அமைக்கப்பட்ட பாலம்னு.

முதலில் ஒற்றைப் போக்குவரத்துப் பாலமா அமைக்க முடிவு செய்து அப்புறம் இரட்டைப் போக்குவரத்துப் பாலமா மாத்தி இருக்காங்க. ஸோலிங்கனில் இருந்து ரெய்ம்ஷெட் 42 கிலோமீட்டர். ஆனா இந்த ரயில்வே பாலம் மூலமா போனா வெறும் 8கிமீ தான். ! எவ்வளவு எரிபொருள் மிச்சம். !

1890லேயே பிரஷியன் பாராளுமன்றம் இந்தப் பாலம் கட்ட சுமார் 5 மில்லியன் அளவு பணம் செலவு செய்ய ஒப்புதல் கொடுத்தது.

1894 இல் முதன் முதலா இப்பாலத்தை அமைக்க பூமியை வெடி வைச்சுத் தகர்த்தாங்களாம். ( பூமி பூஜை :) இதுக்கு கிட்டத்தட்ட 1400 கிலோ டைனமைட்டும், 1600 கிலோ கருப்புத் தூளும் கட்டுமானத்துக்குத் தேவைப்பட்டதாம்.

சொல்லப்போனா 1897 ஜூலை 15 இல் நடந்த இதன் அதிகாரபூர்வ திறப்புவிழாவில் அப்போது சக்கரவர்த்தியாயிருந்த இரண்டாம் வில்ஹெல்ம் கலந்து கொள்ளவே இல்லை. ஏனெனில் இந்தப் பாலம் வில்ஹெல்ம் 1 என்ற அவரது முன்னோர் பெயரில் அமைக்கப்பட்டுவிட்டது என்ற அதிருப்திதான் காரணம்.

அந்தவிழாவில் இரண்டாம் வில்ஹெல்முக்கு பதிலா ப்ரஷியாவின் மன்னரான ப்ரெடெரிக் லியோபோல்ட்தான் கலந்து கொண்டிருக்கிறார்.

அதுக்கப்புறம் இரண்டாம் வில்ஹெல்ம் மன்னர் இரண்டாண்டுகள் கழித்து ஆகஸ்ட் 12, 1899 இல் தான் தன் கோபம் தணிந்து இந்தப் பாலத்தைப் பார்வையிட்டாராம்.

விக்டோரியன் ஈராவின் மாஸ்டர் பீஸ் என இந்தப் பாலத்தைப் புகழ்கிறார்கள்.

இந்தக் காலத்திலேயே இது மற்ற நாடுகளுடன் ஒப்பு நோக்கும்போது நவீன கட்டமைப்புத்தான் என்றால் அந்தக்காலத்தில் இதன் பெருமையைக் கேட்கவா வேண்டும்.