சங்கடம் . ( ஆனந்தவிகடன் சொல்வனத்தில்..)

வெள்ளையடித்தபின்னும்
மின்னும் க்ரேயான் பொம்மைகள்.
மிச்ச தேதிகளோடு
தொங்கும் நாட்காட்டி
பால்கனிக் கொடியில்
காற்றிலாடும் கிளிப்புகள்.
சுவற்றலமாரியில் கிடக்கும்
பாச்சை உருண்டைகள்
தாளிதத்தின் தெறிப்புகளை
சுமந்திருக்கும் சமையலறை மேடை.

கதவைத் திறந்ததும்
சோப்பு வாசத்தையும்
குழந்தை சுவாசத்தையும்
குழப்பி வைத்த காற்று.
சங்கடமாகத்தானிருக்கிறது
முன்பு குடியிருந்தவர்களின்
நினைவைச் சுமந்து தவிக்கும்
வீட்டுக்குள் புதிதாய்க் குடி புக..

 டிஸ்கி:- இந்தக் கவிதை 15.8.2012 , ஆனந்தவிகடன் சொல்வனத்தில் வெளியானது.