மல்லிகை மகளில் உலா வரும் முத்தம்..

காலையில் அலுவலகம்
செல்லுமுன்
வாயிலின் பின்புறம்
கணவன் ஒரு முத்தத்தை
மனைவிக்குப் பரிசளித்துச் செல்கிறார்.


மனைவி மதியத்தில்
வீடு வரும் குழந்தைகளுக்கு
சாப்பாட்டு மேசையில்
உணவோடு முத்தத்தைப்
பகிர்ந்தளிக்கிறாள்.

மாலைநேரப் பூங்காவில்
சறுக்கு மரம் வழுக்கியதும்
கைபிடித்த பாட்டிக்கு
இரட்டை முத்தங்களைக்
குழந்தைகள் பங்களிக்கின்றன.

இரவு படுக்குமுன்
ஞாபகமாய் மருந்தோடு
அந்த முத்தங்களையும்
பாட்டி தாத்தாவுக்கு
அணைத்துப் போர்த்துகிறாள்.

களைத்துத் தூங்கும் முத்தம்
தினம் விடியலுக்காய்
காத்திருக்கிறது அந்தவீட்டின்
வாயில் கதவோரம்
அடுத்த சுற்று உலா வர..

டிஸ்கி:- இந்தக் கவிதை நவம்பர் 2011 மல்லிகை மகளில் வெளிவந்துள்ளது.