வெளியேறவில்லை நீ
வெட்டித்தான் பிரித்தார்கள்
உன்னையும் என்னையும்.
******************************
எத்தனை விளம்பரங்கள்
எத்தனை உடைகள் கண்டாலும்
அத்தனையிலும்
உன்னைப் பொருத்தி
அழகுபடுத்தி ரசிக்கிறது மனது.
********************************
பள்ளி செல்ல
நீ அழுவாயோவென
நான் கண் கசிந்தது பார்த்து
என் கண் துடைத்துச்
செல்கிறாய்.
வாய் பொத்திச் சிரிக்கிறது
காம்பவுண்டுக் கதவு.
*****************************
அதேதான் வேண்டுமென்று
பிடிவாதம் பிடித்தழுகிறாய்.
அதைக் கொடுத்ததும்
அடுத்தது கேட்டு.
******************************
நீயாகப் பாடுவாய்.
பாடச் சொன்னால்
வாய் மூடிக் கொள்வாய்.
வாய் மூடச்சொன்னால்
பாடுவாயா.
*********************************
குறும்புக்காய்
அடி வாங்குவாய்.
அடிக்கும்போதே
வலிக்கும் எனக்கும்.
********************************
புறங்கை கட்டிப்
பெரிய மனிதனாய்ப்
பார்ப்பாய்.
சின்னப் பிள்ளையாவேன்
நான்.
***********************************
டீச்சர் விளையாட்டு
நீ விளையாடும்போதெல்லாம்
உன்னைக் கற்கும்
மாணவியாய் நான்.
**************************************
வீட்டுப் பாடங்களும்
உணவு டப்பாக்களும்
ஓய்வெடுக்கின்றன
உன் ஞாயிறுகளில்.
டிஸ்கி:- இந்தக் கவிதைகள் டிசம்பர் 2011 மல்லிகை மகளில் வெளிவந்தன.
அனைத்தும் அருமை அக்கா!
பதிலளிநீக்குஅத்தனையும் அருமை:)!
பதிலளிநீக்குநன்றி வரலாற்று சுவடுகள்
பதிலளிநீக்குநன்றி ராமலெக்ஷ்மி.
வலைப்பதிவர் ஒற்றுமை ஓங்கட்டும்.!
பதிலளிநீக்குஎன்றும் நம்முள் வலிமை பெருகட்டும்.!