செவிலி... யாதுமான சக்தி நீயுமாகி!

செஞ்சிலுவை சுமந்துவரும்
வெள்ளுடை தேவதையே...

சேவை செய்ய வந்த
பாவை விளக்கே...

வாழ்வின் திசையில்
வளையக் கற்றுத் தந்த
நதியோர நாணலே...



கருவாகி உருவாகி
தாயுமான தாதி
உடல் நோவிலெல்லாம்
உடன் நிற்பவளே..

உன் புன்னகையில்
உயிர்த்தெழுகிறேன்
மருந்துவக்கும் மருத்துவச்சி..
மனித ரூபம் எடுத்த சக்தி..

துயருற்ற போதெல்லாம்
என்னருகே நீயிருந்தாய்
தோளணைத்து எனைச்சுமந்து
உடல் துவட்டி மருந்தூட்டி

படுக்கையை சீர்செய்து
பாடிஸோர் வராமல் காத்து
வெளியாகும் எச்சமெல்லாம்
வெறுக்காமல் சுத்தம் செய்து...

வியாதியுடன் போராட
வாழ் நாளெல்லாம் கூட வந்து
இறைமைக்கு அடுத்தவள் நீ
அத்தனை பொறுமை உனக்கு...

யுத்தமோ பேரழிவோ
யுகயுகமாய் உன் சேவை
தெரசாவாய் நைடிங்கேலாய்
தன்னுயிரைத் துச்சமாக்கி...

நடுநிசியோ வைகறையோ
ரணகளத்திலும் முதலுதவி...
அரு மருந்தே அர்ப்பணிப்பே
ஆற்றலோடு வந்த அருங்கொடையே..
.
யாதுமான சக்தி
தாயுமானவளே
வாழ்ந்திடு நீ
எல்லோருக்குமாய்
என்றென்றென்றும்!

http://youthful.vikatan.com/youth/Nyouth/sakthi2010/thenammaipoem050410.asp

டிஸ்கி:- ஒரு சகோதரர் எனக்கு யூத்ஃபுல்
விகடனின் லிங்கை அனுப்பி வைத்தார்,..
சகோதார் கோபிநாத் முத்துசாமி
(http://bhrindavanam.blogspot.com/)யின்
அன்பு அம்மாவுக்காக அர்ப்பணிக்கப்பட்டதை
உங்கள் பார்வைக்கு வைக்கிறேன்..

இது சர்வதேச மகளிர் தின ஸ்பெஷல் .
சக்தி 2010 யூத்ஃபுல் விகடனில் வந்தது..