புத்தகங்கள்

புங்கைப் பூக்கள் மிதக்கும்
குளத்தின் கல்லில்
கால் நனைத்து அமர்ந்து...
மீன்களைப்போல் எண்ணங்கள்
என்னைக் கடித்துக்கொண்டு...
தொலைந்து போகிறேன் ...
ஒவ்வொரு சின்ன அலையிலும் ...
அழித்து அழித்து எழுதுகிறது ..
ஒவ்வொரு பெயராய்...

புத்தகங்கள் கொடுத்த
அனைவரையும் அடுத்தடுத்து...
கற்றுக் கொடுத்த தகப்பனாய் ..
கற்றுக்கொண்ட மகனாய் ..
கடிந்து கொள்ளூம் சகோதரனாய் ..
கனிந்து நிற்கும் நண்பனாய்...
அதற்கும் மேலான
அனைத்துமான ஒருவனாய்...
என் வீட்டின் புத்தக அலமாரியில்
ஏகப்பட்ட புத்தகங்கள்...
பிரிக்கப்படாமல் ...
பிரிக்கப்பட்டு படிக்கப்படாமல்...
அரைகுறையாய் சில...
சில மட்டுமே முழுமையாய் ...
சில அனுபவித்து விழுங்கி ...
சில ஆவியோடு சேர்ந்து...
தினம் பார்க்கிறேன்., தொடுகிறேன் .,
படிக்கிறேன்., உணர்கிறேன் ....
உணர்வுகளின் வெம்மையையும்.,
கதகதப்பையும் .,குளுமையையும் ...
சூரியன் குளத்து நீரில்
மீன்செதில்கள் போல் மினுமினுப்பாய் ...
அழித்து அழித்து எழுதிக் கொண்டு
இருக்கிறது காற்றும் அலையும்....