சோகி சிவா சொல்வழக்கு - 1

 1.

பத்தி - வளவு, முகப்பு ஆகியவற்றில் புழங்கும் பகுதி.

பஞ்சாட்சரம் - சிவனின் ஐந்தெழுத்து மந்திரம். நமச்சிவாய

உபதேசம் - சிவகோத்திரத்தைச் சேர்ந்த நகரத்தார் இன மக்கள் துலாவூர், பாதரக்குடி ஆகிய மடங்களில் தங்கள் குருக்களிடம் சிவதீட்சை பெற்று உபதேசம் பெறுவார்கள். இதில் ஆண்கள் பாதரக்குடியிலும் பெண்கள் துலாவூரிலும் சமய தீட்சை பெறுவார்கள். 

வேடுகட்டி - ஜாடி, கண்ணாடி சீசா போன்றவற்றில் வாய்ப்பகுதியைத் துணியால் மூடிக் கட்டுதல்.

பெரியப்பச்சி மகமிண்டி - பெரியப்பாவின் மருமகள்

ஒடைகஞ்சி - அரிசியை உடைத்து வைத்த கஞ்சி

பாயிவரப்பாய்ங்களா - பாவி வரப்பான் என்ற வசை மொழி

பட்டுக்கிடப்பாய்ங்களா - பட்டுக் கிடப்பான் என்று வசைமொழிதான் ஆனாலும் பட்டில் கிடக்க வேண்டும் என வாழ்த்தாகவும் அமையும்

ஆக்கி அவிச்சமணியம் - எப்போதும் உணவைத் தயாரித்துக் கொண்டே இருத்தல்.

உண்ணுக்கினே - சாப்பிட்டுக்கொண்டே

மோர்மான் ஜாடி - அந்தக் காலத்தில் இங்கிலாந்தில் இருந்து கொண்டு வரப்பட்ட ஜாடி வகையறா. ஊறுகாயைக் கெடாமல் பத்திரப்படுத்தப் பயன்படுவது.

சீசா - கண்ணாடி பாட்டில்

மலயா - மலேஷியா

அரசாளுவைகளா - திட்டுவதுதான் . ஆனால் அரசை ஆளுவீர்கள் என்று வாழ்த்தாகத் திட்டுவது.

ஓவியம் என்ன - அருமை பெருமை

 

2.

சம்பாப்பாவாடை - சாதத்தால் கடவுளுக்கு வேண்டுதல் செய்தல். சாதம், ஜிலேபி, காய்கனி போன்றவற்றால் இறைவன் திருவுருவை அலங்கரித்தல்.

காரைக்குடியார் மடத்துக் கட்டளை - வேத பாடசாலை, மடம் போன்றவற்றிற்கு வயல், கோசாலை போன்றவற்றிலிருந்து வருமானம் வரும்படி ட்ரஸ்ட் அமைத்து  அதன் மூலம் கோவில் திருவிழா, மண்டகப் படிகளில் பங்களிப்பார்கள்.

சிகண்டி பூரணம் - பல மணிகள் சேர்ந்து ஒலிக்கும் வித்யாசமான மணி ஓசை

பிரதக்ஷிண அப்பிரதக்ஷிண உலா - பிரதோஷ காலத்தில் ஈசனை நந்தியிலிருந்து சண்டீசர் வரை வலம் வரும் ஈசனின் ரிஷப வாகனத்தோடு மும்முறை சென்று வரும் உலா. 

ப்ளஷர் கார் - காரை அந்தக் காலத்தில் ப்ளஷர் கார் ( மகிழுந்து ) என்று சொல்வார்கள்.

வலியன் குருவி - இது இடமிருந்து வலமாகப் பறந்தால் தீமை என்பார்கள்.