சும்மா: சிவப்பு ஓலைக் கொட்டான்கள் & வெள்ளி வேவுக் கடகாம்கள்.

சிவப்பு ஓலைக் கொட்டான்கள்.

சிவப்புஓலைக் கொட்டான்கள் அலங்காரக் கொட்டான்கள். மற்ற அலங்காரக் கொட்டான்களிலும் வீட்டு விசேஷங்களுக்கு வருபவர்களுக்கு பூ, பிஸ்கட், மிட்டாய் போன்றவற்றை வைத்துக் கொடுப்பார்கள்.

திருமணங்களில் முன்கால முறைச்சிட்டைகளில் இந்த சிவப்பு ஓலைக்கொட்டான்கள்தான் எல்லா இடத்திலும் சீராக மாற்றி மாற்றி வழங்கப்பட்டிருக்கும். இப்போது ப்ளாஸ்டிக் பக்கெட்டுகளோ அல்லது சில்வர் வாளிகளோ சட்டிகளோ தருகின்றார்கள்.

அதாவது ஒரு விசேஷம் என்றால் ( திருமணம் பேசி முடித்துக் கொள்ளுதல், பிள்ளை பிறந்ததுக்கு, சமைஞ்சதுக்கு மற்றுமுள்ள அனுவல்களுக்கு ) இன்று எவர்சில்வர் வாளி மற்றும் சட்டிகள் கொடுத்து அதில் வகைப்பழங்கள், தேங்காய் வெற்றிலை பாக்கு முறைப்பணம் எல்லாம் வைத்துக் கொடுக்கிறார்கள். ஆனால் ஐம்பது வருடத்துக்கு முன் எல்லாம் சிவப்பு ஓலைக் கொட்டான்தான் இந்தப் பரிமாற்றத்துக்கு எல்லாம் பயன்பட்டிருக்கின்றது. எனவே இதுக்கு கிராக்கி அதிகம். :)

சிவப்போலைக் கொட்டான்களில் திருகையை வைக்க முடியாது. மாவு திரிக்கும் திருகையை அகலக் கொட்டான்களில் வைத்து உப்புமா போன்றவை திரிப்பார்கள். அவை பெரிய கொட்டான்கள்.

சாதா வெள்ளைக் கொட்டான்களில் பொங்கலன்று அரிசி களைந்து அரித்து வைப்பார்கள் வடிகட்டி போல ஒரு பாத்திரத்தின் மேல் சாய்வாக வைத்து அரிசியை அரித்து நீர் வடிய வைப்பார்கள்.

காய்கறிகள் பழம் வைக்க தனித்தனி கொட்டான்கள் உண்டு. அதே போல் துணி வைக்கவும் கூட.

ஓலையை ஊறவைத்துக் கீறி சாயத்தில் நனைத்து முடையும் இத்தொழிலை பர்மியர்களிடமிருந்து கற்றுக்கொண்டிருக்கக்கூடும் செட்டிநாட்டார். ஏனெனில் செய்கோன் ரெங்கோனுக்கு கொண்டுவிக்கச் சென்ற செட்டியார்கள் இம்மாதிரிப் பொருட்களை வாங்கி வந்திருக்கலாம். அதைப் பார்த்தும் அங்கே சென்ற ஆச்சிகள் அதைப் பார்த்தும் ஓலைக்கொட்டான்கள் முடையக் கற்றுக் கொண்டிருக்கலாம்.

நீலச் சாயமும் சிவப்புச் சாயமும் பச்சை சாயமும் தோய்த்துக் கொட்டான்கள் முடையப்பட்டிருக்கின்றன. பனை ஓலையைக் கீறியும் மெல்லிய பிரம்பைக் கீறியும் கொட்டான்கள் முடையப்பட்டிருக்கின்றன.

கொட்டான்களில் விளிம்பு உருட்டி மடித்துத் தைத்திருப்பதும் பட்டியை அழகாக ஆக்கியிருப்பதும் சிறப்பு. சில கொட்டான்களில் பாசி வேலைப்பாடும்., சில கொட்டான்களில் எம்பிராய்டரி வேலைப்பாடும், சிலவற்றில் க்ரோஷா வேலைப்பாடும் செய்திருக்கும்.

சுதந்திரக் கொடி, பூக்கள், விலங்குகள் ஆகியன டிசைன் கொண்டு முடையப்பட்டிருக்கும். சிவப்பும் நீலமும் கலந்த டிசைன் கொட்டான்கள். ,சிவப்புப் பட்டி முடையப்பட்டிருக்கும் கொட்டான்கள்., உள்ளும் புறமும் வேறு வேறு டிசைன்களில் கொட்டான்கள் என வெரைட்டியாகக் கொட்டான்களை முடைந்து மகிழ்ந்திருக்கின்றார்கள்.சில டபுள் சைடட். உள்ளே ப்ளெயின் வெளியே கலர் ஓலைகள் கொண்டது. சிலது டபுள் சைடிலும் டபுள் டிசைன் கொண்டது. ஹ்ம்ம் எப்படித்தான் பொறுமையா இதெல்லாம் முடைஞ்சாங்களோ தெரியல. :)

பெரிய கொட்டான்களைக் கடகாம் என்றும் ஓலைப் பெட்டி என்றும் சொல்வதுண்டு. வேவு இறக்கும் கடகாம் கூட இதே போல வெள்ளியில் செய்யப்பட்டிருக்கும்.

கொட்டான் என்றால் சிறிய ஓலைப்பெட்டி, கடகாம் என்றால் பெரிய ஓலைப்பெட்டி, பழம் காய்கறி வைப்பது பழப் பெட்டி, வக்கூடு என்றால் கைப்பிடி உள்ள ஓலைப்பெட்டி. இதில் பிரயாணங்களில் துணி மணி வைத்துச் செல்வார்கள். இது பிரம்பில் முடையப்பட்டதுபோல் திக்காக இருக்கும். இதற்கு மூடியும் இருக்கும்.