சாணக்கியர்கள்.

7.5.86.

29. *நான்

கண்டனக்காரர்களை

இழந்துவிட்டேனே.

*என்னின்

வேர்கள் அவர்கள்.

ஆனால் கிளைகளாய்ப்

பிரிந்து போனார்கள்.

*என் மாட்டுக் கொட்டிலைக்

கூரை மாற்றுவதற்குள்,

என் கவிதைத் தோட்டத்தின்

களை பிடுங்குவதற்குள்,

என்னை அரைகுறைக் கட்டிடமாய்

விட்டுவிட்டுக் காணாமல் போய்விட்டார்களே.

*எங்கே என்னைச் சாணைதீட்டும்

அந்தச் சாணக்கியர்கள் ?

*விமர்சகர்களே,

கட்டிடங்கள் என்ன சுயம்புலிங்கங்களா?

அஸ்திவாரங்களின்மேல் எழுந்துகொள்ள ?

*தடுக்கும் ஏணிகளாய்

நீங்கள் இல்லாமல்

என் முன்னேற்றம்

தடைபட்டுக் கிடக்கிறது.