தனியே இருக்கும் ஒருவன்..

தனியே இருக்கும் ஒருவன்.;-
******************************

குடும்பம், குழந்தை, குட்டி என
பிக்கல் பிடுங்கல் இல்லாமல்
பிரம்மச்சாரி வாழ்க்கையை
அனுபவித்துக் கொண்டிருக்கிறான்
தனியே இருக்கும் ஒருவன்.


இரவில் வெகுநேரம் விழிப்பதும்
அலுவலகம் செல்லும்
நேரம்வரை தூங்குவதுமாகக்
கழிக்கிறான் வாரநாட்களை.

பகலில் பழச்சாறுகளிலும்
இரவில் பஃபேக்களிலும்
டிஸ்கோதேக்களிலும்
சுற்றிக் கழிக்கிறான்.

வார இறுதியில் பீர் குடிப்பதும்
மிஸ்டுகால் கொடுக்கும் பெண்ணை
பைக்கில் வைத்துச் சுற்றுவதுமாக
செல்கிறது பொழுது.

மோவாய்வரை கிருதா வளர்ப்பதும்
மீசையில்லாமல் தாடி வளர்ப்பதும்
கொஞ்சமுடியைக் கோரையாக்கிக் கொள்வதும்
ஃபாஷன் என நினைக்கிறான்.

குண்டாக இருந்தால்
வாக்கிங் போவதிலும்
ஒல்லியாக இருந்தால்
ப்ரோட்டீன் பவுடரிலும்
நம்பிக்கை கொள்கிறான்.

சுட்ட கோழியைப் பூராத் தின்று
முடி கொட்டியபின்
தைலம் வாங்க அலைகிறான்.

ஃபிட்னெஸ் செண்டர், ட்ரைவிங் க்ளாஸ்,
ஸ்விம்மிங் க்ளப்,
கிடார் கற்றுக் கொள்ளல் என
பணத்தைக் கரைக்கப் பார்க்கிறான்.

கரைக்கமுடியாப் பணத்தில்
உடைகள்,செருப்புகள், ஷூக்கள்,
கெடிகாரங்கள், செல்ஃபோன்கள்,
வாசனைத் திரவியங்கள்
வாங்கிக் குவிக்கிறான்.

ஒரு பக்கம் அழுக்குத் துணிகள்
ஒரு பக்கம் காயும் துணிகள்
ஒரு பக்கம் அணியும் துணிகள்
இவற்றின் நடுவே
மெத்தையில் துயில்கிறான்.

கண்டிக்க ஆள் இல்லாததால்
கே எஃப் சியில் பல்துலக்கி
கொக்கோ கோலாவில்
வாய் கொப்பளிக்கிறான்.

கல்லூரியில் எப்படி இருந்தோம்
வேலை சென்ற புதிதில்
எப்படி இருந்தோம் என
கண்ணாடி பார்த்து
ரசித்துக்கொள்ளும் ஒருவன்

அம்மா அப்பாவுடன் இருந்ததை
அவர்கள் கண்டிப்பை
மறக்க முயல்கிறான்.
நான் உங்கள் பொம்மை அல்ல
என கண்ணாடி பார்த்துக் கூவியபடி.

சம்பாதிக்கும் பணத்தை எல்லாம்
நன்கு செலவழிப்பது எப்படி
என மட்டுமே கற்ற அவனுக்கு
சிறுதுளி்யாவது சேமிப்பது எப்படி
என்ற வித்தை கடைசிவரை
கைவரவேயில்லை.

டிஸ்கி:- இந்தக் கவிதை பிஃப் 15 - 29  இன் அண்ட் அவுட் சென்னையில் வெளிவந்தது.