சுருண்ட இறால்கள்

விரும்பியது கிடைக்காவிட்டால்
கிடைத்ததை விரும்பும்
உயர்மத்தியதரம்...

கணினியில் நிபுணனான
என் மகன் சிறுவயதில்
"டிங்குவைப்போல் ஒரு பிள்ளை"...

இன்றுஅவனுக்கு
வியர்ப்பதேயில்லை
உடைகளும் அழுக்கேயாகாமல் ...

கண்களும் காதும்
கழுத்தும் கையும்
கணினியில் தேய்ந்து தோய்ந்து...

தனக்கான வேலையைத்
தானே தேடிக்
கண்டடைந்து...

நான் உறங்கும் நேரமெல்லாம்
அவன் உழைத்து
அவன் உறங்கும் நேரமெல்லாம்
நான் விழித்து....

பாசத்தைக்கூடப் பகிரமுடியாத
கண்ணாமூச்சி
இருவருக்கிடையேயும்...

முதல் சம்பளத்தில்
மொத்தக்குடும்பத்துக்கும்
விருந்து சைனா டவுனில்...

வல்கனோ பிரான்ஸ்
சாப்பிடுங்கம்மா என அவன்
பரிவுடன் சொல்ல...

விழித்துப் பார்த்தேன் கிண்ணங்களில்
இரவுத் தூக்கமற்று
சோர்வுற்றுக் களைத்துக்கிடந்த

அவன் கண்களை
வெள்ளைக் கருவிற்குள்
சுருண்ட இறால்களாய்...