வலைத்தளத்தின் காதலி

வெகுஜனப் பத்திரிக்கையில்
தானியங்களைக் கொத்திக்கொண்டிருந்த
என் பச்சைக்கிளி எதேச்சையாக
பல தானியங்கள் பரத்தியிருந்த
வலையைப் பார்த்தது...

என்று சென்று அமர்ந்ததோ
அன்றிலிருந்து மீளமுடியாமல்
அசையாமல் அதுவும்
அன்றிலாய் நானும்....

என் மோஹினி யட்சிணி தேவதை
ராட்சசி காந்தர்வக் க(ன்னி)ண்ணி
என்வருகைக்காகக் காத்திருக்கும்
வெண்புறா வனமோஹினி...

இன்று இறக்கை படபடக்க
தனக்கான வலைக்குள் ..

குடும்ப அட்டையில் மட்டுமே
உறுப்பினராயிருந்த அவள் இன்று
எல்லா வலைத்தளங்களிலும் ஊடுருவி..

நளினமாய் உடையணியும் அவள்
இன்று நகங்கள் கூட வெட்டாமல்
வாராத தலையுடன் தட்டச்சில்

நளபாக சமையல்காரி
நான் ஊரிலில்லாவிட்டால்
ரொட்டித்துண்டுகளைக் கடித்துக்கொண்டு

என்னைப் பார்ப்பதைவிடவும்
வலைத்தளத்தின் காதலியாய் இருப்பதே
இப்போதெல்லாம் இன்பமாய்
இருக்கிறது அவளுக்கு ...

மணக்க மணக்க சந்தனமும் சாம்பிராணியும்
பாமாலையும் பூமாலையும் சூடிக்கொண்டிருந்த
சாமிகளெல்லாம் போற்றுவார்
இல்லாத் தனிமையில் ...

தன் முகவரியைப் பதிக்க எண்ணிக்
கணினியையே கணநேரமும் பார்த்துக்
கொண்டிருக்கும் ஏற்கனவே பெரிதான
அவள் கண்கள் இன்னும் பெரிதாய்..

எங்களுக்கான உடல் நலத்தில் கனிவும்
உணவில் காமதேனுவாகவும்
பிரயாணத்தில் தெய்வத்துணையும் அனுப்பும்
அவள் தன் அடையாளம் தேடித்திரும்பும் வரை
அவளுக்காகக் காத்து நான்....